Read Q'anjob'al Jer 38 Bible Online

Jer 38 - Q'anjob'al bible

Jer 38

¹A Sefatías is c'ajol Matán, yetok Gedalías is c'ajol Pasur, c'al Jucal is c'ajol Selemías, c'al Pasur is c'ajol Malquías, a wal eb tu' max aben tzet max yalil cham Jeremías satak eb conob:

²Tix max yun yalon Jehová ti': A mac chi cancan yul conobal ti', ok cam yuj owal, yuj wajil, ma yuj ilya'. Axa mac chi el xin, cax chi yaon oc ba yul k'ab eb aj Babilonia, a eb tu' okto colchaj el eb.

³Ok waoc jun conob ti' yul k'ab eb soldado reyal Babilonia. A eb tu' ok ak'on ayc'ayok, ẍi Jehová, ẍi Jeremías.

⁴Xan max yal eb yajaw tu' bay cham rey axca ti': —Mak'cam jun winak ti', yujtol chi cabax aj c'ul eb soldado ayto ec' bay yul conobal ti' yuj k'anej chi yala', cax chi yak'on somchaj aj c'ul eb anima. A jun winak ti', c'am jabok chi say is watx'ilal eb jet conob ti', palta tol chi yetnejtok is nabal eb, ẍi eb.

⁵Cax max tak'wi cham rey Sedequías axca ti': —Chi je' e yunen yetok tzet chi yochej e c'ul, c'am jabok tzet chi je' walon e yin, ẍi cham.

⁶Max mitx'lay Jeremías yuj eb, cax max yaon aytok eb yetok lasu bay yul jun olan bay chi wajay aej. A jun olan tu' yet Malquías is c'ajol cham rey; a tu' ay bay amak', bay ayic' eb taynem despacho. A bay yul jun olan tu' c'amxa aej, asan tz'otz'ew ay, xan a yet max ayapnok tu', max toj cham yich tz'otz'ew tu'.

⁷A yet chotan ay cham rey bay puerta yet Benjamín, max yaben cham Ebed-melec tol mayal alay aytok cham Jeremías bay yul jun olan tu'. A jun winak tu' aj Etiopía, ay yopiso bay is despacho cham rey.

⁸Axa yeltek Ebed-melec bay yul despacho cham rey tu', cax max yalon bay cham axca ti':

⁹—Mamin rey, caw wal yob tzet max yun juntzan winak ti' yin Jeremías is chekbej Dios, tol max yaytok eb bay yul olan. A bay tu' chi cam yuj wajil, yujtol c'amxa wal loj bay yul conobal ti', ẍi.

¹⁰Cax max cheklay Ebed-melec yuj cham rey, max yalon axca ti': —Itok junok 30 winak etok cayti', cax chi toj e yion ajtek Jeremías bay yul olan tu', yak'ban c'amto chi cami, ẍi cham.

¹¹Axa toj Ebed-melec yetok eb nak winak tu' bay yalan c'uanbalil yet despacho, cax max bet yiontek juntzan icham k'ap. Max yaon aytok an k'ap tu' yetok tx'an lasu bay Jeremías bay yul olan tu'.

¹²Max yalon axca ti': —Aoctok juntzan k'ap tu' yalan a k'ab, yet watx' c'am chach lajwi yuj tx'an lasu ti', ẍi cham. Xan axca tu' max yut cham Jeremías.

¹³Max yaon aytok eb winak tu' jun tx'an lasu, cax mitx'bilcan txam yuj eb, cax max ilay ajtek cham yuj eb yetok tx'an. Max lajwi tu xin, cax max cancan cham Jeremías bay amak' bay ayic' eb taynemal despacho.

¹⁴Max yalon Sedequías tol chi ilaytek cham Jeremías tu' bay is satak masantac'al bay yet is yox puerta bay yul templo. A bay tu' max yal cham rey tu' axca ti': —Ay junok in k'anlebal ok wak' ayach; chi wochej tol tz'akan ok yun a paktzen ayin, ẍi cham.

¹⁵Max yalon Jeremías axca ti': —Ta chin paktzej ayach mamin rey, chi mi in a chek mak'lay camok; ta chi wak' junok nabalej ayach, tom ok a cha abej, ẍi Jeremías.

¹⁶Palta yin ewantakil max yak'on cham rey Sedequías is ti' bay cham Jeremías axca ti': —Satak Jehová Cham chi ak'on co cawil, chi wak'on in ti' ayach, tol man ok in chek a mak'lay camok, tamwal ok ach waoc yul k'ab eb chi yochej chach mak'on camok, ẍi cham.

¹⁷Cax max yalon cham Jeremías bay cham Sedequías axca ti': —A Jehová, Cham Yajaw yin Masanil, a ton co Diosal, a' chi alon axca ti': Tatol chak' a ba yul k'ab eb general cham reyal Babilonia, ok ach colchaj el yetok masanil eb cajan etok bay atut. Axca tu' man ok ak'lay tz'a jun conob ti'.

¹⁸Ta man ok aoc a ba yul k'ab eb xin, ok yi' eb jun conob ti', ok yak'on tz'a eb, cax manxa ok je' a colon a ba, ẍi Jehová, ẍi Jeremías.

¹⁹Max tak'wi cham rey Sedequías axca ti': —Chin xiw bay eb jet conob mayal ec'tok yetok eb aj Babilonia tu'; talaj chin alay oc yul k'ab eb, ok'bal c'ul mi chin yut eb, ẍi.

²⁰Cax max tak'wi cham Jeremías axca ti': —C'amak mamin rey, man ok ach alay oc yul k'ab eb. Ikej wal is k'anej Jehová max wal ayach, axca tu' ok ach colchajok, cax watx' ok ach elocok.

²¹Yujtol a Jehová mayal tx'ox ayin tzet yetal ok ujok. Tatol man ok aoc a ba yul k'ab eb tu' mamin rey,

²²masanil eb ix ix chito cancan bay a despacho, yowalil ok ilay eltek eb, cax ok alay oc eb yul k'ab eb general yet reyal Babilonia, cax ok yalon eb xal ix tu' axca ti': A eb caw wal yamigo cham rey, toc'al max yetk'anenej eb, xan max ayc'ayi. Max beklaycan cham yuj eb xol tz'otz'ew, axa yel eb bay, ẍi mi eb xal.

²³—Masanil eb xal estzil, c'al eb oninal, mamin rey, ok alay oc eb yul k'ab eb aj Babilonia; axa ach ti', majxa ach el yul k'ab eb, palta tol ok ach alay oc yul k'ab reyal Babilonia tu', cax ok ak'lay tz'a jun conob ti', ẍi Jeremías.

²⁴Cax max tak'wi Sedequías bay cham Jeremías axca ti': —Ta chochej c'am chach cami, manchak al jun ti' bay junok mactxel.

²⁵Ta chi yojtaknej el juntzanxa eb yajaw tol max ach k'anjab wetok, ok jay eb, cax ok k'anlen el eb tzet max al ayin, c'al tzet max wal ayach. Ok yal eb ayach, tol man ok ach mak'cam eb, tatol tz'akan ok yun alon bay eb.

²⁶Palta ok al bay eb, tol asan chach tewi oc ayin tol c'amxa chach toj preso bay yatut Jonatán yet c'am chach cam bay tu', cachi, ẍi Sedequías.

²⁷Axca ton tu' max yun xin. Masanil eb yajaw tu' max toj ilon cham Jeremías, cax max yak'on eb k'anlebal bay cham. Palta axca wal max yun yalon cham rey bay, axca wal tu' max yut tak'wok ba. Yuj tu xin, max bek eb k'anlen bay, yujtol c'am wal junok max aben tzet yetal max yal Jeremías yetok cham rey.

²⁸Yuj tu xin, max canc'al cham Jeremías bay amak' bay ayic' eb taynemal despacho, masantac'al yet max ayc'ay Jerusalén.