Read Q'anjob'al Jer 39 Bible Online

Jer 39 - Q'anjob'al bible

Jer 39

¹A yet lajoneb waay xajaw, yet is baloneb abil yoc Sedequías yin reyal bay Judá, a yet tu' max jayoc Nabucodonosor reyal Babilonia yetok is soldado ul yoymanen aj Jerusalén.

²A yet baloneb c'ual waay yet is can xajaw yet usluq'ueb abil yoc Sedequías yin yajawilal, a yet tu' max jak eb soldado yet Babilonia jun olan bay murallail conob tu'.

³Max octek masanil eb soldado yet Babilonia tol mimek yikbej. Max ayji ec' eb bay puertail nan yul conob. A eb mimek yajaw a ton eb ti': Nergal-sarezer, Samgarnebo, c'al Sarsequim, yetok c'apax junxa chi yik Nergal-sarezer.

⁴A yet max yilon cham rey Sedequías yetok eb is soldado tzet yetal lanan yuji, max elaj eb yet ak'balil. A tu' max ca yeltok eb bay nan xol yawoj eb rey, max elapnok eb bay jun puerta ay nan xol cab muralla. Caytu' max yun yoc eb yul beal bay jobe chi apni bay a' Jordán.

⁵Palta max tzakloj eb soldado yet Babilonia yintak eb, max michchaj Sedequías yuj eb bay yac'alil Jericó. Max yiontok eb bay cham rey Nabucodonosor. A tu' ayic' bay conob Ribla bay yul makbej Hamat. A bay tu' max yal Nabucodonosor tzet ok yunej. Satak wal Sedequías tu' max chek cham rey mak'lay cam eb c'ajol Sedequías tu', yetok masanil eb mimek winak yayji bay Judá.

⁷Lajwi tu xin, max chek cham Nabucodonosor tu' yilay eltek bak' sat cham Sedequías, max c'al-lay yetok cadena, cax max ilaytok bay Babilonia.

⁸Axa eb aj Babilonia max aon oc k'ak'al despacho, c'al yetok masanil na ay bay Jerusalén. Max tenon c'apax ec' bulnaj eb murallail jun conob tu'.

⁹Axa yin lajubal xin, a Nabuzaradán, comandante yayji yin eb taynemal cham reyal Babilonia, max yitok masanil anima aj conob yin presoal, a ton eb maxto cancan yul conob yetok eb maxax ec'tok yetok eb aj Babilonia.

¹⁰Axac'al juntzan eb meba' max cancan bay tx'otx' Judá, a ton eb caw wal c'am jabok tzetak yetal ay bay. A yet tu' max ak'lay awoj uva bay eb c'al juntzanxa awoj.

¹¹Maxax yak' Nabucodonosor reyal Babilonia, jun chekbanilej bay Nabuzaradán, comandante yin eb taynemal cham, yuj tzet chi utlay Jeremías:

¹²Itok, cax cha tayneni; c'am chetnej, palta tol a masanil tzet chi k'ana', ak' bay, ẍi cham rey.

¹³Catatu' a Nabuzaradán, yetok Nabusazbán c'al yetok Nergal-sarezer, yetokc'al juntzanxa eb ay c'apax yopiso bay cham reyal Babilonia,

¹⁴max chekon eb yilay eltek Jeremías bay amak' bay ayic' preso. Max yaoncan oc eb yul k'ab Gedalías is c'ajol Ahicam, is yitxiquin Safán, yet chi ya'ilneni. Max yitok bay yatut; caytu' max yun cancan cajan cham Jeremías xol eb is yet conob.

¹⁵A yet ayto ec' cham Jeremías bay amak', bay ayic' eb taynemal despacho, max k'anjab Jehová bay, max yalon axca ti':

¹⁶Asi' bay Ebed-melec aj Etiopía, cax chalon bay: Tol ayin Jehová Yajaw in yin Masanil, Diosal in Israel chi wala': Ok wak' yun tzet yetal max wal yin jun conob ti', a ton yailal, cax manak watx'ilal. Ok el juntzan tu' yet ok ujok.

¹⁷Ayin wal caw Jehová in chi wala', tol ok ach in taynej, yet watx' man ok ach ayc'ay yul k'ab juntzan anima bay chach xiw tu'.

¹⁸Ayin wal caw chi wala', tol ok ach in colil yul k'ab eb, xan man ok ach mak'lay camok, yujtol ayoc a nabal win, ẍi Jehová, cachi bay, ẍi Cham.