Read Q'anjob'al Jer 42 Bible Online

Jer 42 - Q'anjob'al bible

Jer 42

¹Masanil eb yajawil eb soldado ajun yetok Johanán, c'ajol Carea, c'al yetok Azarías c'ajol Osaías, yetok masanil eb ajun yetok, eb ay yelapnok c'al eb c'am yelapnok, max jayoc eb c'atan Jeremías is chekbej Dios.

²Max yalon eb axca ti': —Ay wal jun tzet yetal ok co k'an ayach tinani', man ok a ten ayon: Tewan bay Jehová co Diosal juj, jaywan on maxto on cancan ti'. A yet yalantok, xiwil co beyi, palta tinani' asanxanej ch'an jaywan on chon eloc ti'.

³Tewan bay Jehová co Diosal juj on yet watx' ok tx'ox ayon tzet beal ok ji', c'al tzet watx' ok junej, ẍi eb.

⁴Max tak'wi Jeremías bay eb, max yaloni: —Ok in tewok bay Jehová co Diosal e yuj xin, axca wal max yun e k'anon ayin. A tzet ok yut tak'wok ba Cham ayin, axca wal tu' ok yun walon ayex. C'am wal jabok ok in c'ubaj elok, ẍi cham.

⁵Max tak'wi eb bay cham: —Aokab Jehová tu' testigo wal yin yel jin on, tatol man ok jikej axca wal tzet ok yun yalon ayach tu'.

⁶Caxc'al ok cha' co c'ul, ma man ok cha' co c'ul tzet ok yun paktzen ayach, ok jikej bay Jehová co Diosal, bay max co k'an ayach tol ok a k'an bay, yet watx' watx' ok on elocok, ẍi eb.

⁷Lajonebxa c'u tu', catatu' max k'anjab Jehová bay Jeremías,

⁸xan max awtelay Johanán yetok eb yajawilal eb soldado c'al yetok masanil eb anima yuj Jeremías tu'.

⁹Max yalon axca ti': A Jehová co Diosal ayon Israel on ti', bay max in tewi yuj tzet max e yal ayin, chi yal axca ti':

¹⁰Ta chi yochej e c'ul chex cancan cajan bay jun tx'otx' ti', ok aj can watx'ilal ayex. Manxa ok ex wak' lajwok, yujtol ya' max wabej yuj max watok jun miman yailal tu' e yiban.

¹¹Ayin wal caw Jehová in chi wala': Manchakxa ex xiw bay reyal Babilonia, jun tol caw wal chex xiw bay. A tinani' manchakxa ex xiwi, yujtol ok in ayjokc'al ec' e yetok, ok ex in colil yul k'ab tu'.

¹²Ay in yabenc'ulal e yin. Ok wak'on yun c'apax jun rey tu', tol ok cusoc c'ul e yin axa e chalay meltzoj bay e tx'otx'al tu', ẍi Jehová.

¹³Palta ta ayex ti', c'am che yochej chex can bay jun conob ti', ta ok e ten bay tzet chi yal Jehová co Diosal;

¹⁴ta che yal axca ti' xin: Ok on tok cajay bay Egipto, bay manxa ok jil owal, bay manxa ok jab yoc nuk' trompeta, tamwal ok on cam yuj wajil, ta quex chi,

¹⁵ta axca tu' che yunej, abek ayex lanan e cancan bay Judá, tzet wal chi yal Jehová, Cham Yajaw yin Masanil, Cham co Diosal: Ta che yochej chex toj cajan bay Egipto,

¹⁶a owal, c'al wajil bay chex xiwi, ok apnokc'al oc e yin bay tu'. Ok ex camc'alta'a.

¹⁷A masanil mactxel chi toj cajan bay Egipto, ok camc'alta' eb yuj owal, yuj wajil, c'al yuj ilya' bay tu'. C'am mactxel ok cancan yin yiquisal, c'am mactxel ok elaj bay yailal ok wak'a', ẍi Cham.

¹⁸A Jehová, Cham Yajaw yin Masanil, co Diosal, chi yal axca ti': Axca wal max yun jayoc yowal in c'ul yiban eb cajyom bay Jerusalén, axca wal tu' ok yun yay c'apax c'ay yowal in c'ul e yiban ayex ti', tatol ok ex tok cajan bay Egipto. Ok jay catab e yiban. A yet ok ex yilon oc juntzanxa nación, ok xiwaj eb, c'al e buchlay yuj eb. C'amxa yechel ok e yil jun e tx'otx' ti' junelokxa, ẍi Jehová.

¹⁹A pax ayex chexto cancan bay Judá xin, a wal Jehová lanan yalon ayex tol c'am chex toj bay Egipto. Ojtaknejek elok tol ayin lanan walon ayex tinani',

²⁰tol miman wal e tenomtakil lanan e yaonocok, yujtol max in e chek in k'anlej bay Jehová co Diosal, max e yalon ayin axca ti': Tewan bay Jehová co Diosal juj on, cax ok ak'on jojtaknej el masanil tzet ok yala'; ok jikeni, quex chi.

²¹Mayal wal wak' e yojtaknej el tzet yetal max yal Jehová co Diosal ayex, palta c'am pax chi yal e c'ul che yikej.

²²Yuj wal tu', ojtaknejek elok tol ok ex cam yuj owal, yuj wajil, c'al yuj ilya' bay jun conob bay che yochej chex toj cajan tu', ẍi cham Jeremías bay eb.