Read Q'anjob'al Jer 43 Bible Online

Jer 43 - Q'anjob'al bible

Jer 43

¹A yet max lajwi yalon Jeremías masanil tzet max chek Jehová yal bay eb,

²axa Azarías c'ajol Osaías, Johanán c'ajol Carea, yetokc'al juntzanxa winak tol caw wal ch'aan, max yalon eb bay Jeremías: ¡Lek'tial juntzan k'anej chal tu'! Yujtol a Jehová co Diosal maj yal ayach tol c'am chon toj cajan bay Egipto.

³A Baruc, c'ajol Nerías, a' chi alon juntzan k'anej tu' jin, tol chi yun axca tu', yet watx' chon ayc'ay yul k'ab eb aj Babilonia yet chon mak'cam eb, ma chon yitok eb yin presoal bay Babilonia tu', ẍi eb.

⁴Axca ton tu' max yun yoc is tenomtakil Johanán, yetok eb yajawilal eb soldado, c'al yetok masanil eb anima. Maj can eb bay Judá axca yalon Jehová.

⁵Palta axa max yun eb xin, a Johanán yetok eb yajawilal eb soldado max iontok eb anima aj Judá bay Egipto, a ton eb max saklemtok bay nacionlak, palta mayal wajbaj pax oc ba eb bay Judá, yet chi cajay eb junelxa bay tu'.

⁶Max yitok eb eb winak, eb ix ix, eb unin, c'al eb ix cutz'in cham rey, a ton eb max alaycan oc yul k'ab Gedalías yuj cham comandante Nabuzaradán. Max ilay c'apaxtok Jeremías yetok Baruc yuj eb.

⁷C'am wal jabok max yikej eb tzet max yal Jehová. Masanil eb tu' max toj bay Egipto. Atac'al tu' max apni oc cajan eb bay jun conob chi yik Tafnes.

⁸A bay conob Tafnes tu' max k'anjab Jehová bay Jeremías, max yalon axca ti':

⁹Iaj juntzan mimek ch'en satak eb et conob aj Judá ti', cax cha mukon xol ixcab tx'otx' bay amak' satak despacho is reyal Egipto yul jun conob ti'.

¹⁰Cax chalon bay eb axca ti': A Jehová, Cham Yajaw yin Masanil, a ton co Diosal ayon Israel on ti' chi aloni: Ok witek in chekbej Nabucodonosor reyal Babilonia, a tu' ok wak' yaay is trono, c'al is mantiado yenelok bay yiban juntzan ch'en max a mukaytok ti'.

¹¹Ok jayok, cax ok yak'on lajwok ay jun nación Egipto ti'. A mactxel tol t'inanc'alta' cam yuj ilya', ilya' ok on camok; a mactxel tol t'inanc'alta' ok ilaytok yin presoal, ok ilaytok; a mactxel tol t'inanc'alta' ok mak'lay cam yin owal, a yin owal tu' ok mak'lay camok.

¹²Ok oc k'ak'al juntzan is templo is diosal eb aj Egipto ti', ok ak'lay tz'a c'apax is diosal eb tu', ma xin, ok ilaytok axcaxac'al yin presoal chi toji. Axcac'al yion el junok ilom calnel no sip yin is pichil, caytu' ok yun yiontok Nabucodonosor beyomal ay bay Egipto ti', cax ok tok yin tzalojc'ulal.

¹³Ok uchlay ay c'apax juntzan obelisco*fn* yet Heliópolis, bay Egipto; axca tu xin, ok oc k'ak'al masanil templo is diosal eb aj Egipto, ẍi Jehová, cachi bay eb, ẍi Cham.