Read Q'anjob'al Jer 46 Bible Online

Jer 46 - Q'anjob'al bible

Jer 46

¹A ton is k'anej Jehová bay Jeremías yin masanil nacionlak ti'.

²Max babji yalon yin Egipto jun k'anej max yal yin yejército Necao reyal Egipto, a ton jun max ayc'ay bay Carquemis, cawilal a' miman Éufrates, yuj Nabucodonosor reyal Babilonia. A yet is can abilxa yoc Joacim c'ajol Josías yin reyal bay Judá, a yet tu' max uj jun ti'.

³Chi awji eb yajawil eb soldado: Watx'nejek e makbal julbalej. Asek yin owal.

⁴Aek oc tz'um no chej, cax ocokab eb soldado yiban no'. Aek aj e ch'en toctor cax che txolon e ba. Nikek txam e lanza. Aek oc makil txam e c'ul, ẍi eb.

⁵Chi yal Jehová: ¿Tzet yetal chi wila'? Chi meltzoj eb soldado Necao yin xiwc'ulal. Sakleminakxac'al chi yun tojcan eb ak'om owal. C'amxa chi yil eb yintak yel xuyuyok yuj xiwc'ulal.

⁶C'amxa chi je' yel eb tol jelantac'a beyi. A eb tec'an, majxa je' yelaj eb; a bay norte bay a' miman Éufrates chi telc'ojtok eb.

⁷¿Mactxel jun chi aj can tu', axca chi yun a' Nilo, axca junok aej chi pulil yul is be?

⁸¿A mi Egipto lanan yaj can, axca chi yun yaj can a' Nilo, axca junok aej chi pulil yul is be? Max yal eb aj Egipto axca ti': Ok on aj can, cax ok jak'on nojil sat tx'otx' tx'otx'; ok jak' lajwok conoblak c'al yetok masanil eb cajyom bay, ẍi eb aj Egipto.

⁹Yak'okab no chej yanej, tokokab c'apax carruaje. Tokokab eb soldado aj Etiopía, c'al eb aj Libia, caw wal ibil oc makbal julbalej yuj eb. Tokokab c'apax eb soldado aj Lidia, caw wal jelan eb julwaji.

¹⁰A ton wal is c'ual Jehová ti', Cham Yajaw yin Masanil, a ton wal jun c'ual yet ok pakon ba yin eb ajc'ul oc yin. A ch'en espada, ok yak' lajwok ch'en masanil, masantac'al ok yal bonchaj ch'en yuj chic', yujtol a Cham ok mak'on cam xiwil anima bay jun nación bay norte, cawilal a' miman Éufrates.

¹¹Ex conob aj Egipto, asek bay Galaad sayoj ambal. Caxc'al tzet ambalil che k'ana', c'amxac'al tzet ok ocok, yujtol c'amxa ambal chi je' colwaj e yetok.

¹²Yojtakxa masanil nacionlak tol lanan yel e q'uixwil; masanilxac'al bay yulyibank'inal chi ablay yel e yaw. Toxac'al chi tenlej ec' ba eb ak'om owal yeq'ui; junejxac'al bay chi ec' balbon eb sat tx'otx', ẍi Jehová.

¹³Max k'anjab Jehová bay Jeremías yin tzet ok yun toj yak'on Nabucodonosor owal yin Egipto:

¹⁴Alil bay yul makbej Egipto, bay Migdol bay Menfis, c'al bay Tafnes: ¡Jelan che yut e ba! ¡Makwajanek, yujtol lanan yak'lay lajwok eb anima e yinlak yuj espada!

¹⁵¿Tzet yuj xan mayal elaj Apis, jun yechel toro bay chi oc ayilal? ¿Tzet yuj xan maj je' tec'ban ba? Caytu' chi yunej, yujtol ayin Jehová in max wuch lajwok.

¹⁶Chi letc'oj eb soldado, chi ayc'ay eb, cax chi yal-len eb bay junjun: Elokonek cayti', cax chon tojcan bay co conobal, bay co nación bay max on alji. ¡Elokonek aj bay lanan co lajwi el yuj owal ti'! ẍi eb.

¹⁷Ak'ek yik reyal Egipto axca ti': Cham Lues yintakilxac'al chi tz'ak yunej, quex chi yin.

¹⁸Ayin rey in, tol ayinc'al ec'ok. Ayin chi wik Jehová, Yajaw in yin Masanil, chi wak' in ti' tol axca witz Tabor yelc'al can ayaj xol juntzanxa witz, axca witz Carmelo yelxac'al can ayaj yiban a' mar, caywal tu' yayji yipal jun chi jayoc e yin.

¹⁹Yuj tu', ayex cajyom ex bay Egipto ti', watx'nejek e ba yujtol ok ex ilaytok yin presoal. A conob Menfis ok cancan yin tz'inanil, toxac'al ok uchchajcantok, cax c'amxa mactxel ok cajayok.

²⁰A wal Egipto ti' lajan wal axca junok k'opoj wacax watx' yili chi wila', a bay norte chi tit junok miman aja' chi ul chionok.

²¹A juntzan soldado manbiltek, caw wal bak'ech eb, axca no' bak'ech wacax, palta ajun eb ok tok elajok. Manxa ok je' tec'ban ba eb, yujtol chi jay c'ual yet ok lajwok ay eb, c'al yorail yailal eb.

²²Ayin wal caw Jehová in chi wala', tol a Egipto ti' toxac'al ok uẍlok yelaj axca junok no labaj yet ok jayoc eb soldado ul yak'on owal yin eb. Ok jayoc eb ajc'ul tu' yin, axca wal toj eb winak yetok yechej k'akoj te'.

²³Ayin wal caw Jehová in chi wala', tol ok k'aklay aj eb axca chi yun k'aklay aj mimek k'akte'. Xiwil is bisil eb soldado tu' axca no chapulín, tok ayto mac chi je' bisoni.

²⁴A eb aj Egipto ti' ok q'uixwok aj eb, ok ayc'ay yul k'ab eb conoblak petoj bay norte, ẍi Jehová.

²⁵A Jehová, Cham Yajaw yin Masanil, is Diosal Israel chi alon axca ti': Ok wak' lajwok el Amón, is diosal eb aj conob Tebas. Ok wak' c'apax lajwok Egipto yetokc'al is diosal, c'al is reyal. Ok wak' ayc'ay reyal Egipto c'al yetok eb chi yaoc c'ul yin.

²⁶Ok waoc eb yul k'ab eb ajc'ul ok ak'on cam eb, a ton Nabucodonosor reyal Babilonia yetokc'al is soldado. Palta ayin wal caw Jehová in chi wala', tol axa yet yajtok tu xin, ok cajay pax anima bay Egipto tu' junelxa, axcac'alta' yayji, ẍi Cham.

²⁷Ex Israel, yinatil Jacob, in chekbej ex, manchak ex xiwi, yujtol ok ex in colil yetokc'al e yuninal bay jun nación najat bay max ex ilaytok yin presoal. Ayin wal caw Jehová in chi wala': Ok ex cajay junelxa yin junc'ulal, yin tol c'amxa mactxel ok ex xibtenok.

²⁸Manchak ex xiw ex conobal Jacob, tol in chekbej e yayji ocok. Ayinc'al oc e yetok, cax ok wak' lajwok ay masanil juntzan nacionlak bay max ex in saklemnejtok. Palta ayex ti', man ok ex wak' lajwok; asan tol ok waoc yailal e yiban, axca wal is mojalil; man ok ex can c'apax yin tol man ok waoc e yailal, ẍi Cham.