Read Q'anjob'al Jer 47 Bible Online

Jer 47 - Q'anjob'al bible

Jer 47

¹A ton wal jun k'anej ti' max yal Jehová bay Jeremías yin eb filisteo, yet c'amto chi apni oc reyal Egipto yak'on owal yin conob Gaza:

²Axca ti' yalon Jehová: A bay norte ok tit wal jun miman bulan soldado, axca wal junok miman aej tol chi el yul is be tita. Ok yak' lajwok el eb masanil jun nación ti', yetok masanil tzet yetal ay bay, c'al jantakxa conoblak. A masanil eb cajyom bay conob eb filisteo ti', ok el yaw eb. Masanil anima ok el wal yaw yuj yailal.

³A wal yet ok yaben eb bil yay yakan no chej, c'al yaben eb bil tit carruaje, caw wal ok pax yip eb, a eb mamej c'al eb txutxej ok bekcan eb yuninal.

⁴Yujtol mayal apni oc c'ual yet chi ak'lay lajwok eb filisteo. Ok lajwok ay eb chito colwaj yin Tiro c'al Sidón, ẍi Cham. A Jehová ok ak'on lajwok el eb filisteo, a ton masanil eb titnak bay Creta nan xol a' mar.

⁵A masanil eb anima bay Gaza ok tzukil eb xil jolom yuj cusc'ulal; toxac'al ok tz'injokcan el eb anima bay Ascalón. Ayex cajyom ex bay yac'alil ti a' mar, ¿bak'in ok e bek e yak'on yasjok e mimanil yuj e tx'oxon el e cusc'ulal?

⁶¡Ay, a yespada Jehová! ¿Bak'in ok oc wanajok? ¡Matawal chi alay aytok yul is tz'umal junelxa, cax chi oc wanajok, c'amxa tzet chi yunej!

⁷Palta ¿tzet wal ok yun yoc wanajok? Tol a wal caw Jehová max aloni tol axca tu' chi yunej, tol a wal caw max aloni, tol chi oc owal yin conob Ascalón c'al yin masanil eb bay tilak a' mar.