Read Q'anjob'al Jer 52 Bible Online

Jer 52 - Q'anjob'al bible

Jer 52

¹21 abil wal is k'inal Sedequías yet max oc yin reyal, 11 abil max yak' reyal bay Jerusalén; a is txutx chi yik Hamutal, is cutz'in Jeremías aj conob Libna.

²Yelxac'al yob tzet max yun satak Jehová, lajan wal axca max yun Joacim.

³Yuj wal tu' xan max tit yowal c'ul Jehová yin eb aj Jerusalén, c'al yin eb aj Judá, xan max yiel is satak. Tenomtak max yut ba Sedequías bay cham reyal Babilonia,

⁴xan a yet lajoneb c'u waay yet lajoneb xajaw yet baloneb abil yoc Sedequías yin reyal, max tit Nabucodonosor reyal Babilonia yin Jerusalén yetok is soldado. Max jayoc ul yoyon ajok, cax max watx'nen aj is campamento bay satak conob tu'. Max watx'nej aj eb is walub bay yinlak conob yet chi yak' ayc'ayok.

⁵Oybilxac'al aj conob tu' masantac'al max tz'aknaj usluq'ueb abil yoc Sedequías yin reyal.

⁶A yet balonebxa c'ual waay yet is can xajaw yet jun abil tu', max aj wal can wajil bay yul conobal tu'; caw wal c'amxa jabok tzet chi lo eb anima.

⁷Max yolon eb soldado caldeo jun olan bay yin is murallail conob tu'. Caxc'al oybil aj conob yuj eb soldado tu', palta a yet ak'balil max elaj cham rey yetok masanil is soldado. A tu' max ca yeltok eb bay nan xol yawoj eb rey, max elapnok eb bay jun puerta bay nan xol cab muralla. Caytu' max yun yoc eb yul beal bay jobe chi apni bay a' Jordán.

⁸Palta max uktelay cham rey Sedequías yuj eb soldado yet Babilonia. A tu' max michchaj yuj eb bay yac'alil Jericó; max beklaycan yuj masanil eb is soldado, cax max saklemtok eb.

⁹Axa michchaj cham rey Sedequías tu' yuj eb soldado, max yiontok eb bay cham reyal Babilonia ayic' bay Ribla, bay yul makbej conob Hamat. A bay tu' max yal Nabucodonosor tzet ok utlay cham Sedequías.

¹⁰Satak wal Sedequías tu' max mak'lay cam eb is c'ajol, c'al yetok eb mimek winak aj Judá.

¹¹Axa pax Sedequías tu xin, max cheklay yilay eltek is bak' sat, max c'al-lay yetok cadena, cax max ilaytok preso bay Babilonia. A bay tu' max cami.

¹²A yet lajoneb waay yet is so' xajaw yet 19 abilxa yoc Nabucodonosor yin reyal bay Babilonia, max apni oc Nabuzaradán bay Jerusalén. Sat yajaw yayji oc bay cham rey Nabucodonosor, cax comandante yayji yin eb chi taynen cham rey tu'.

¹³A' max ul yak'on tz'a templo, yetok despacho eb rey, c'al yetok is na eb mimek winak bay conob tu'.

¹⁴Axa masanil eb soldado ajun yetok, max tenon ay eb is murallail conob Jerusalén tu'.

¹⁵Cax max yiontok Nabuzaradán eb anima bay Babilonia, mawal axca eb maxto can bay conob tu', yetokc'al eb max yaoc ba yetok cham reyal Babilonia, c'al yetok junxa bulan eb conob.

¹⁶Axac'al junjunxa eb caw wal meba' max cani, yuj mulnaji c'al yawwi uva eb.

¹⁷Cax max mak'on poj eb soldado yet Babilonia masanil mitx'k'abej naba bronce bay templo: is yoyal, c'al yich, yetokc'al jun miman pila yet aej. Cax max yiontok eb masanil bronce tu' bay Babilonia.

¹⁸Max yion c'apax tok eb netal bay chi wajay tik'ak'il tan, c'al pala, c'al juntzanxa ch'en axca teẍeliẍ, c'al juntzan mimek palangana, c'al cucharón c'al masanil mitx'k'abej naba bronce chi k'anlay yet chi oc ayilal.

¹⁹Ac'ala' c'apax cham comandante yayji xol eb soldado tu', max yitok mitx'k'abej oro c'al plata: mawal palangana, c'al netal tza k'ak', c'al mimek sec' bay chi wajay tik'ak'il tan, c'al tzektebal, c'al cucharón, yetok juntzan vaso bay chi ak'lay vino yin ofrendail.

²⁰Maj nachaj elok jantak wal yalil juntzan tzet yetal naba bronce yak'nak Salomón watx'jok bay templo, a ton cab oy, c'al yetok jun miman pila bay chi wajay aej, yetokc'al lajcaweb yechel toro chi mitx'on waay yich jun pila tu'.

²¹Junjunc'al oy tu', ec'ban 8 metro is tel, cax axca mi nan is wak metro yin; palta olan yul, cax ay 7 centímetro is pimal.

²²Junjunc'al oy tu' ay is makil chon, ec'ban cab metro is tel, cax naba bronce. A yinlak tu' ayoc rejail naba bronce, ayxac'al oc yechel an granada is yelbubok. Lajanc'al yayji cab oy tu'.

²³A yin junjun rejail ayoc 100 yechel sat granada, a bay miman txequel, ay 96 ayocok.

²⁴A cham comandante Nabuzaradán max mitx'on Seraías, cham sat sacerdote, c'al Sofonías, cham yet is cab, c'al yetok oxwan eb chi taynen ti' templo.

²⁵Axa xol eb anima aytocan bay Jerusalén, max ilaytok jun yajawilal eb soldado, yetok ukwanxa winak ayoc yin opiso yak'on serbil cham rey bay conob tu', jun sat ajtz'ib yayji xol eb soldado (a inej oc is listail eb), yetok c'apax 60 eb aj conob tol mimek yikbej bay yul is conobal tu'.

²⁶A Nabuzaradán max iontok masanil juntzan ti' bay satak cham reyal Babilonia, a tu' ayic' bay Ribla bay yul makbej conob Hamat. A bay tu' max chek cham reyal Babilonia mak'lay cam eb. Axca tu max yun yilay el conob Judá bay is nación.

²⁸A is bisil eb anima max ilaytok yuj Nabucodonosor, a ton eb ti': A yet is suk abilxa yoc yin reyal, 3,023 eb anima bay Judá max ilaytok;

²⁹axa yet 18 abil xin, max ilaytok 832 eb aj Jerusalén;

³⁰axa yet abil 23, cax max yiontok Nabuzaradán junxa 745 eb aj Judá. Yuj tu xin, max ajapnok is bisil eb max ilaytok yin 4,600 eb anima yin masanil.

³¹A wal yet 25 waay yet 12 xajaw yet 37 abilxa yilay el rey Joaquín bay Judá, max oc Evil-merodac yin reyal bay Babilonia. A cham tu' max tx'ox is watx'c'ulal bay Joaquín, cax max yion eltek bay yul preso.

³²Caw wal watx' max yut c'ul yin, yintak juntzanxa rey ayoc preso bay Babilonia.

³³Catatu xin, max je' q'uexon el cham Joaquín is pichil chi k'an bay yul preso, cax axac'al yetok cham rey max lowi yin jantakto tiempoal iquis.

³⁴Max yak'on c'apax cham reyal Babilonia is gasto masantac'al max yal camtok.