Read Q'anjob'al Jer 6 Bible Online

Jer 6 - Q'anjob'al bible

Jer 6

¹¡Ex anima yul is makbej Benjamín, sayek bay che col e ba! ¡Elanek aj bay Jerusalén! Xuek trompeta bay Tecoa, aek oc mub yin yechelejal bay Bet-haquerem yujtol ay jun miman yailal c'al uchwal chi tit bay norte.

²Ti wal chi wak' lajwok ay Sión tol manxa watx'ilok yili.

³A eb rey yetok is soldado chi jayoc yin jun conob tu', chi watx'nej ay eb is campamento bay yinlak. Junjunxac'al chi watx'nej ay ba bay chi cani.

⁴A eb e yajc'ul chi yal eb axca ti': Co watx'nejek co ba yet chi jak'on owal yin. Titanek, yet wal chuman c'u cax chon oc yin jak'on owal. Palta xin, mayal ay c'u, najat-xa chi toj enelej.

⁵A tinani' xin, a yet ak'balil cax ok on oc jak'on owal yin, ok juchay is torre eb, ẍi eb ajc'ul tu'.

⁶A Jehová Cham Yajaw yin Masanil, a' max ak'on jun chekbanilej ti': Tzoq'uek el te te', che watx'nen aj junok walubej yet ok ex oc e yak'on owal yin Jerusalén. Ok waoc yailal yiban jun conob ti', yujtol asan yin etnewomal ayocok.

⁷A wal bay Jerusalén tu' chi pitzc'oj aj yobtakilal, axca wal chi yun yajol nuk' junok a' aej. Asan mak'wal c'al uchwal chi binaj bay. Asannej yas c'al yailal chi wil bay xol conob tu'.

⁸Watx'nejek oc e ba ex aj Jerusalén, yet watx' c'am chi wiel in nabal e yin. Ta c'amak, ok wak'can e tx'otx' yin tz'inanil. Ok can wal can yin tol c'amxa junok mactxel okto cajay can ec'ok, ẍi Jehová.

⁹A wal Jehová Cham Yajaw yin Masanil max yal ayin axca ti': Lajanxac'al ok yuncan conob Israel axca junok awoj uva tol siq'uiq'uixac'al chi yun yel lajub sat. Xan a yet c'amto chi uj jun tu', colcan el jantak mac chi je' yelcanok, axca ton wal chi yun yec' is k'ab jun wajom uva yin k'ablak, ẍi Cham ayin.

¹⁰Max in tak'wi: ¿Mactxel ok aben pax ayin, tatol ok in k'anjab elok yin walon jun abix ti'? Mamin, axca wal tol makan txiquin eb, c'am chi je' yaben eb. Toc'al chi buchwaj eb, c'am chi cha' c'ul eb a k'anej.

¹¹Junlajan chi yun waben yowal a c'ul yin jun conob ti' etok Mamin. C'amxa chi je' in mitx'on waayok, quin chi. Max yalon Jehová ayin axca ti': Bekay yowal in c'ul tu' yiban eb unin chi ec' bay yulak calle, c'al yiban eb ach'ej bay wajan ec' eb. Ok mitx'lay eb winak, yetokc'al yistzil, yetokc'al eb caw wal icham animaxa.

¹²Masanil is yatut eb, is mulnajil eb c'al yistzil eb, tx'okxa mac ok ioncanok. Yujtol ayin wal caw Jehová in chi wala' tol ok wiaj in k'ab yin waon oc yailal yiban masanil mactxel cajan bay jun nación ti'.

¹³A eb mimek winak, c'al eb c'am yelapnok, asanxanej yion eb tzet yetal yin yobtakilal chi na'. Toltax eb in chekbej c'al eb sacerdote, asanxanej elk'an chi yun eb.

¹⁴Cac'al tu' chi yochej eb chi watx'nej ay jantak is yailal in conob, cax chi yalon eb tol watx'c'al yayji masanil, ti tol man pax watx'ok.

¹⁵Watx' mi wali tol chi q'uixwi eb yuj juntzan tzet yetal c'am chi techaj wuj chi yun eb tu'. Palta c'am chi q'uixwi eb; manxa yojtakok eb chi cakbi sat yuj q'uixawc'ulalil. Yuj wal tu', ayin wal caw Jehová in chi wala' tol ok ayc'ay eb xol eb ayc'aynakxa. Yet ok waon oc yailal yiban eb, ok lajwok ay eb, ẍi Cham.

¹⁶Max yal Jehová bay is conob axca ti': Ocanek wal waan bay chi chalej ba be cax che yiloni. Che k'anlen ec' juntzan icham belak cax baytal ay be watx'. A yul be watx' tu' chex toji, cax ok ilchaj xewilal e yuj, quin chi. Palta max e yala': C'amak, c'am chi jochej chon toj bay tu', quex chi.

¹⁷Max waon oc jun e taynemal, max walon axca ti': Acbajek e txiquin bay ok oc nuk' ch'en trompeta yuj jun e taynemal tu', quin chi. Palta max e yal axca ti': C'am chi yal co c'ul chi jabej, quex chi.

¹⁸Yuj tu' xan chi wal axca ti': Abek xin ex nacionlak, ojtaknejek el tzet ok on in conob ti'.

¹⁹Abek e masanil bay sat tx'otx' ti'. Ok witek junok yailal yobxac'al yiban jun conob ti', yuj yobtakil chi na eb yuneni; yujtol maj cha yab eb in k'anej. A ti' yet eb, tol max yintaknej el eb cuybanilej max wala'.

²⁰Ex in conob, ¿tzetto wal chi oc che yitek incienso yet conob Sabá ayin, c'al sumumial jabil an ac'un chi tit bay juntzanxa nación tol najat ay? C'amxa chi cha in c'ul e xajanbal che yak' tz'aok, tamwal juntzanokxa e sabal, quin chi, ẍi Jehová.

²¹Yuj tu' xan max yal Jehová ayin axca ti': Ok waoc chipbal akanej satak jun conob ti', cax ok ayc'ayok. Eb mamej, eb c'ajolej, eb cajan is cawilal eb, c'al yetok eb is yamigo eb, lajanc'al ok yun cam eb masanil, ẍi Cham.

²²Max yalon Jehová axca ti': Atac'al bay najat tx'otx' bay norte chi watx'nej ba jun nación caw wal ay yipalil tita'.

²³Ibil oc is julbal eb, c'al lanza. Caw wal yelxac'al yob eb; c'amxac'al yabenc'ulal bay eb. Axca wal bil a' mar, caywal tu' jaben bil eb chi tit yiban chej. Watx'xa yayji eb yet chi jayoc eb yak'on owal e yin, ex cajyom bay Jerusalén, ẍi Jehová.

²⁴Chi yal eb anima bay Jerusalén axca ti': Mayal jab jun k'anej tu', mayal pax jip yuj xiwc'ulalil. Caw wal ya' yoc chi jabej, axca yailal chi jayoc yiban junok ix ix yet chi ajapnok c'ual watx'ji c'ul yuj unin.

²⁵¡Manchakxa ex eltok mulnajil, manchakxa ex eltok ec'jab bay yulak be! Ayxac'al ec' eb ajc'ul yetok is mitx'k'ab yet owal. Tzanxac'al bay ay xiwc'ulalil, ẍi eb anima.

²⁶¡Ex in conob, aek oc el pichilej yuj e tx'oxon el e cusc'ulal! ¡Balek ec' e ba xol tik'ak'il tan! ¡Ocanek yin cusc'ulal c'al yin ok'il wal sic'libil, axca wal yet chi cam junok e yuninal tol junnej, yujtol a mactxel ok jay con ul yak'on lajwok, toxa chi jayoc jin!

²⁷Max yalon Jehová ayin axca ti': Chach waoc yet chak' porobal in conob ti'. Chi cam a beyc'ulnen elok, cax chelon wal tzetbil yayji oc is beybal.

²⁸Masanil eb caw wal yob is beybal. Anima tol c'amxa is nabal, alom k'umal eb. Max cawbi el eb. Lajanxac'al eb axca ch'en bronce ma ch'en hierro.

²⁹A yet chi xuon junok xubal k'ak'ej yin ip, chi cakbi k'ak'ej, cax chi ulji el ch'en plomo xol ch'en plata. Axa in conob, c'am jabok yelapnok ta chi watx'nelay oc eb, yujtol a eb yobtakwom, c'am chi c'ayil eb xol eb.

³⁰Ok mi ak'lay yik eb plata tol k'okbil elok, yujtol ayin Jehová in ti' max in k'okilok, ẍi Cham.