Read Q'anjob'al Jer 7 Bible Online

Jer 7 - Q'anjob'al bible

Jer 7

¹Max k'anjab Jehová bay cham Jeremías max yaloni:

²Ocan waan bay puertail templo, cax chalon juntzan k'anej ti' bay eb anima: Masanil ex cajyom bay Judá, mac ex chex octok bay jun puerta ti' yin e yoc yin ayilal bay Jehová, chi cam wal e yaben jun k'anej ti',

³yet Jehová Cham Yajaw yin Masanil, a ton co Diosal: Ta ok e watx'nej oc e beybal c'al e yunben, ok ex wak' c'al cajay ec' bay sat jun tx'otx' ti'.

⁴Manchak e yaoc e nabal yin juntzan eb chex etk'aneneni tol chi yal eb axca ti': Jojtak wali tol c'am tzet ok on onok, yujtol a cayti' ayic' is templo Jehová, a ton is templo Jehová ti', ẍic'al eb.

⁵Ta che watx'nej oc e beybal c'al e yunben, cax watx'c'al che yut e ba ayex junjun ex;

⁶ta c'am che yetnej eb tx'ok conobal, eb unin c'amxa is mam c'amxa is txutx, c'al eb xal camnakxa yichamil ayic' e xol; tamwal che mak'cam eb anima tol c'am is mul; tamwal chex oc ayilal bay juntzan comon dios tol chex etnen elok,

⁷Ta caytu' che yunej, ok ex wak'can cajay ec' bay jun tx'otx' ti', a ton tx'otx' max wak' yin junelnej bay eb e yichmam.

⁸Ayex ti', che yaoc juntzan k'anej tol c'am jabok yelapnok yin e c'ul.

⁹Chex elk'ani, chex mak'wi cam anima, chex mulji, che yak' e ti' yin lek'tial, che yak'on tz'a incienso bay Baal, cax chex oc yin ayilal bay tx'ok diosal, lananto e yojtaknen el tinani'.

¹⁰Chi lajwinaj tu' cax chex jay pax oc in satak bay in templo ti', che yaloni: C'am tzet ok on onok, quex chi, cax che beybalnenc'al juntzan tzet yetal tol chin yaja'.

¹¹¿Chi mi e na' tol a in templo ti', lajan axca junok nach'en bay chi c'ubaj ba eb elk'om? Ayin wal caw Jehová in chi wala' tol chi wilc'al masanil juntzan che yun ti'.

¹²Asek bay Silo bay ec'lejnak in cajlobal, a ton jun tu' max in sic'can el yin babelal bay max in ayji, cax ok e yilon tzet max wun yetok yuj is mul eb e yichmam tu'.

¹³Max wal ayex junel cayel yuj e beybal, tokwal ay janic'ok che yikej tzet chi wala', tamwal max ex tak'wi ayin.

¹⁴Yuj tu' xan ayin wal caw Jehová in chi wala', tol axca wal max wun yetok bay Silo, axca tu' ok wun yetok in templo ti', a ton jun max wak' bay eb e yichmam c'al ayex ti', a ton jun che yaoc yipok e c'ul tinani'.

¹⁵Ok ex wi wal el in satak, axca wal max yun wion el eb e yican in satak yet yalantok, a ton eb yinatil Efraín, ẍi Jehová, cachi bay eb.

¹⁶Ach ti' Jeremías, manchak ach txajli yuj jun conob ti'. Manchak al ayin tamwal oc tean win yuj. C'am chach tewi oc win yuj, yujtol c'am chin tak'wi ayach.

¹⁷¿Tom c'am chel tzet chi yun eb bay conoblak yet Judá c'al bay yulak calle yet Jerusalén?

¹⁸Ilab tol a eb uninalej chi sayontek te si', axa eb mamej chi nubon oc k'ak'ej, axa eb txutxej chi watx'nen ixim c'oxox yet chi yak' eb bay is diosal, xal chi yik yajawilal satcan.*fn* Caw wal chin is tx'em eb, mawal axca yet chi yak'on eb vino bay tx'ok diosal.

¹⁹Ayin wal caw Jehová in chi wala', tol man asanok ayin chin yetnej eb; palta ac'al oc eb chi yetnej ba chi yi el eb is q'uixwil.

²⁰Yuj wal tu xin, ayin wal caw Jehová, Yajaw in, chi wala', tol ok wawaltok yowal in c'ul yiban eb anima cayti', c'al yiban no no' c'apaxok, c'al yiban te te', c'al yiban masanil awoj. Lajan wal ok yun jun ti' axca wal junok bolob tol c'amxa chi tani, ẍi Cham.

²¹A Jehová is Diosal Israel, Cham Yajaw yin Masanil chi yal bay is conob: Ak'ek e nabal e chion no xajanbal chi ak'lay tz'aok yetokc'al juntzanxa no xajanbal.

²²A yet max wion eltek eb e yichmam bay Egipto, max wak' chekbanilej bay eb, palta man asannejok yuj yak'on eb xajanbal c'al ofrenda.

²³A tzet max wal bay eb yin babelal, tol yikem eb ayin. Catatu xin, ayin ton is Diosal in eb, axa eb ok occan in conobok. Cax max waloni tol chi yikej eb axca wal tzet max wala', yet watx'c'al chi eloc eb.

²⁴Palta xin, majwal cha eb yabej, tamwal max yikej eb. A ti' yet eb, tol max yak' pitbok el eb is nabal, cax max yiken eb bay tzet yob chi yochej is c'ul. Yelxac'al max yetnej el ba eb. Majxac'al watx'nej oc ba eb.

²⁵Yettax max eltek eb e yichmam bay Egipto masantac'al tinani', max in chekc'al in chekbej.

²⁶Palta ayex ti', tokwal max e cha e yabej. Tenomtakc'al che yut e ba. Yelxac'al yob max e yut e ba yintak eb e yichmam tu'.

²⁷Axa ach Jeremías, al masanil juntzan ti', caxc'al man ok cha yab eb ayach.

²⁸Al bay eb axca ti': A wal ayex ti' junelnej tol tenomtak ex, c'am chi yal e c'ul chex ak'lay cuenta yuj co Diosal. C'amxa chi binaj yikemal e xol, cachi bay eb.

²⁹¡Ex aj Jerusalén, tzukek el xil e jolom yuj cusc'ulal, cax che k'okon elok! A bay tzalanlak bay mayayi chi toj e bitnej bit yet cusc'ulal, yujtol mayal ex in bekcan yuj yowal in c'ul, ẍi Jehová.

³⁰Axca wal ti' yalon Jehová: A eb anima bay Judá, caw wal yob tzet chi yun eb in satak. Max yaoctok eb is diosal tol yajbejtak bay yul in templo, axca tu' max yun yetnentok eb.

³¹A bay jobeal Ben-hinom, a tu' max watx'nej aj eb altar yet Tofet yet chi yak' tz'a eb is c'ajol c'al is cutz'in bay tu'. Tokwal ayin max in chek yun eb. Tamwal ay bay max ec' yin in nabal jabok.

³²Yuj tu' xan ayin wal caw Jehová in chi wala', ok apnok c'ual, tol a jun jobe tu', manxa ok yik Tofet, tamwal Jobe Ben-hinom, palta ok yik axca ti': Jobeal yet eb mak'bil camok. Yujtol ok muklay anima bay Tofet masantac'al ok yal nojilok. C'amxa bay ok je' muklay eb.

³³Yuj tu', a is mimanil juntzan anima ti', ok oc chibejok no ostoc c'al no chiwajwom no' xolak te'. C'amxa mac ok xibten el no'.

³⁴Ok wak' c'ayaj anima bay conoblak yet Judá. Axa bay yulak calleal conob yet Jerusalén, c'amxa bit yet k'in, tamwal ayto tzalojc'ulal. C'amxa bital yet nupayil chi oqui. Axcaxac'al tz'inan tx'otx' ok yuncan jun nación ti', ẍi Cham.