Read Q'anjob'al Jer 8 Bible Online

Jer 8 - Q'anjob'al bible

Jer 8

¹Axca ti' yalon Jehová: A yet jun tiempoal tu', ok ilay eltek bakil eb rey bay yul is mukbanil, c'al bakil eb yajawil eb aj Judá, yetokc'al yet eb sacerdote, c'al yet eb max yaloc ba in chekbejok, c'al yet eb max cajay ec' bay Jerusalén.

²Cax ok cancan bulan juntzan bak tu' bay yakan c'u, bay yakan xajaw, c'al bay yakan waycan. A yet iquisto eb, max camc'ulnej eb juntzan tzektebalej tu'. Max yal ba eb bay, c'al yoc eb ayilal bay. Yuj tu' man ok wajlay aj is bakil eb tu', tamwal ok muklayok. Ok canc'al can bay tu' axca chi yuncan bulan is tza' no no'.

³Ayin Jehová, Yajaw in yin Masanil chi wala', tol a eb anima chito can yin yiquisal xol jun conob ti', ok yochejxac'al eb tol ok camok, yintak tol chi can yin yiquisal bay tzanc'al bay ok in saklemnejtok eb.

⁴Ach Jeremías, ayin chi wala', al in k'anej bay jun conob ti': Ta ay mac chi ayc'ayi, chi aj pax wan junelxa. Ta ay mac chi c'aytok bay yul junok be, chi meltzoj pax yintak junelxa.

⁵Palta ayex ti' ex aj Israel, ¿tzet yuj xan che pojil e ba ayin? Ex aj Jerusalén, ¿tzet yuj xan c'amxa chex meltzoj ayin? ¿Tzet yuj xan chex ocxac'al yin etnewomal, c'amxa chi yal e c'ul chex meltzojtek ayin?

⁶Max in taynej wal wabej, palta tok ay mac chi k'anjab yin jichanil. C'am wal junok chi na ba c'ul yin is yobtakil cax chi yaloni: ¿tzet wal max wun xin? man ẍiok. Chi tojcan masanil eb yul is be, axca toj lemnaj no chej yin owal.

⁷Toltax no cigüeña chi ec' jenenok bay satcan, yojtak no' bak'in ok meltzojok. Ilab no coc'al cuajte', no' q'uisom satcan, c'al no grulla, yojtak no' bak'in ok tok bay junokxa lugar. Axa ayex ti', ex in conob, caw wal man e yojtakok janic'ok in ley.

⁸¿Tzet yuj xan che yal ayex ti' tol aj nabal ex, tol e yojtak in ley e yaloni? ¡Ilab eb chi tz'iben ley, chi q'uextok eb tzet chi yal ley tu'!

⁹A juntzan jelan yalon tu' q'uixawtakxac'al ok yuncan eb, ok somchaj aj c'ul eb, ok low yin eb. Ilab tol max yintaknej el eb in k'anej. ¿Tzet wal ok yun yion eb is jelanil?

¹⁰Yuj wal tu' xan ok wacantok yistzil eb yul k'ab juntzanxa winak, yetokc'al is tx'otx' eb, tx'okxa mactxel ok ioncanok. Eb mimek winak c'al eb c'am yelapnok, asanxanej yion eb tzet yetal yin yobtakilal chi na'. Toltax eb in chekbej, c'al eb sacerdote asanxanej elk'an chi yun eb.

¹¹Cac'al tu' chi yochej eb chi watx'nej ay jantak yailal in conob, cax chi yalon eb tol watx'c'al yayji masanil, ti tol man watx'ok.

¹²Watx' mi wali, tol chi q'uixwi eb yuj juntzan tzet yetal c'am chi techaj wuj chi yun eb tu'; palta c'am chi q'uixwi eb. Manxa yojtakok eb chi cakbi sat yuj q'uixawc'ulalil. Yuj wal tu' xan ayin wal caw Jehová in chi wala', tol ok ayc'ay eb xol eb ayc'aynakxa. Yet ok alay oc yailal yiban eb, ok lajwok ay eb, ẍi Jehová, cachi, ẍi Cham.

¹³A wal caw Jehová chi aloni: Ok wiel eb cayti', yujtol axca wal jun tx'anil uva, ma jun teal higo c'am junok sat, toltax is xak lanan takilok, caytu' yayji eb. Yuj wal tu' xan a tzet max wak' bay eb ok can yul k'ab juntzan tx'ok conobal, ẍi Cham.

¹⁴Axa eb aj Judá ok yal eb axca ti': ¿Tzetto wal yuj xan chon cancan cayti'? Co wajbajek oc co ba, chon tojek bay conoblak watx' yoc is murallail. A bay tu' chon cami, yujtol a Jehová co Diosal chi ak'on co camichal. Mayal yak' aej aytok veneno xol juq'uej, yujtol max oc co mul bay.

¹⁵Max co na' tol ok on aj can, palta c'am tzet yetal watx' max jayoc ayon. Max co na' tol watx' ok yun co beytok, palta asanc'al ay is mayil max jay jin.

¹⁶¡Lanan jayoc eb ajc'ul jin! Chixa ablay bil jornaj yul txam chej eb bay Dan. Caw wal chi bil tx'otx' tx'otx' yet chi ok' no'. Chi jayoc eb ul yak'on lajwok jun co nación ti' yetokc'al masanil is tzet yetal, yetok co conobal, c'al co masanil cajan on cayti', ẍi eb aj Judá.

¹⁷A wal caw Jehová chi alon axca ti': Ok watok camich e xol, axca wal chi yun e chilay yuj no labaj caw wal ow is venenoal. C'am yelapnok eb chi je' mansonen no', ẍi Cham.

¹⁸A in cusc'ulal ti' c'amxa yanil, caw wal chi lajwi ay wanimail chi wabej.

¹⁹Caw wal chi ablay yel yaw in conob bay masanil yul makbej co conob. ¿Tom c'amxa ec' Jehová bay Sión? ¿Tom c'amxa ec' co reyal bay tu'? ẍi eb. Max tak'wi Jehová: ¿Tzet yuj xan max e tx'em yowal in c'ul yuj e yoc yin ayilal bay yechelej, juntzan yechelej c'am yopiso, tx'ok bay max tita? ẍi Cham.

²⁰Chi yal eb anima axca ti': Mayal eq'uel tiempo yet chon col-layi, axca yeq'uel tiempoal jooj trigo, c'al lajwi ec' sat juntzanxa awoj, ẍi eb.

²¹Caw wal ya' chi wab yuj yailal in conob. Mayal aj can cusc'ulal c'al xiwc'ulal win.

²²¿C'am mi wal yanil bay Galaad? ¿C'am mi mactxel chi je' yanten bay tu'? ¿Tzet yuj xan c'am chi je' yanchaj in conob ti'?