Read Q'anjob'al Jer 9 Bible Online

Jer 9 - Q'anjob'al bible

Jer 9

¹¡Matawal lajanxac'al in sat ti' axca junok nuk' aej tol chi el yakan, yet chin ok'i chi ec' c'u c'al ak'bal yuj masanil jantak eb wet conob max cami!

²¡Matawal a bay tz'inan tx'otx' ay bay watx' chin ayji, yet watx' chin el najat c'atan in conob ti'! Yujtol ajmulxac'al el eb masanil, cax etnewom eb.

³Caw wal jelan eb yin yalon lek'tial k'anej. Asan yuj lek'tial k'anej chi aj can eb. C'amxa k'anej yel chi al-layi. Yuj tu' xan chi yal Jehová, tol asanxanej yobtakilal chi yun eb. C'amxa chi yal c'ul eb chi yaloc Cham eb is Diosalok.

⁴C'amxa che yaoc eb e yamigo tamwal eb e yuẍtak yipok e c'ul, yujtol caxc'al yuẍtak ba, chi yak'lej lek'tial bay junjun. A ti' yet eb yamigo tu', chi nalej aj eb k'anej yin junjun.

⁵Junjunxac'al chi yilej aytek sat. C'amxa mactxel yel chi k'anjab bay junjun. Mayal k'ayil eb yak'on lek'tial. C'amxa chi je' naon ba c'ul eb.

⁶Max yal Jehová ayin: A a cajlobal ach Jeremías, a wal tu' ayic' xol eb etnewom. Yuj is camc'ulal eb yin etnewomalil tu', xan c'amxa chi yal c'ul eb chin yaloc eb is Diosalok.

⁷Yuj tu' xan ayin Jehová, Yajaw in yin Masanil chi wala': ¿Tzetto wal yetal junokxa chi je' wunen yetok jun in conob ti'? Asan tol chi waoc xol k'ak'ej, yet chi watx'nelay oc yin watx'il axca chi yun ch'en plata.

⁸A is ti' eb, lajan wal axca junok julbalej tol tojolc'al cam anima yuj. Asanxanej lek'tial chi ec' eb yalilok. Chi yak'lej eb cawil c'ul yetok yamigo yaloni, palta wal yel, lanan yaon oc telc'obalil bay.

⁹¿Tom man mojok waon oc yailal yiban eb yuj tzet chi yun eb tu'? Ayin caw Jehová in chi wala': ¿tom man mojok in paktzen bay jun in conob ti'? ẍi Cham.

¹⁰Chin ok'i, chin k'akwi yuj tzalanlak, chin c'uyuyi yuj lobal no no', yujtol mayal tz'atok. C'amxa mac chi ec' bay tu'. Tok ayto junokxa wacax chi ablay yel yaw. No xolakteal no', c'al no tz'iquin mayal toj no' elajok.

¹¹Chi yal Jehová: A jun conob Jerusalén ti', ok wutcan yin junok bulan ch'en bay cajan no ok. A conoblak Judá, tz'inan tx'otx'xac'al ok yuncanok. C'amxa junok anima ok cancan cajan bay tu', ẍi Cham.

¹²¿Mactxel caw wal aj nabal chi je' nachaj el juntzan ti' yuj? ¿Mactxel bay max yak' Jehová ojtaknelay el juntzan tzet yetal ti', axa ok alon el bay juntzanxa? ¿Tzet yuj xan max uchchajtok jun nación ti', takin tx'otx' max yuncanok, xan c'amxa junok mac chi ec' bay?

¹³Max tak'wi Jehová axca ti': Axca ti' max yunej yujtol max yintaknej el in conob cuybanilej max wak'a'. C'am chi yikej eb, tamwal beybalnen eb.

¹⁴Max texac'al yak' pitbok el eb is c'ul, cax max tzakloj eb yintak juntzan comon dios, axca max yun cuylaycan eb yuj yichmam.

¹⁵Yuj tu' xan ayin Jehová Yajaw in yin Masanil, is Diosal in Israel chi wala': Ok wak' tzet yetal c'a' lo eb, cax ok wak'on aej ayaytok veneno xol yuc' eb.

¹⁶Cax ok in saklemnej cantok eb bay juntzanxa nacionlak tol man yojtakok eb, tamwal is yichmam eb max ojtaknen elok, cax ok wak'on uktelay eb yetok espada, masantac'al ok yal c'ayil eb masanil, ẍi Cham.

¹⁷A Jehová Cham Yajaw yin Masanil chi aloni: Abek xin; ak'ek awtelaytek eb ix ix, eb ix tol ayc'alta oc yiban yin yok'i.

¹⁸Yalokab eb aj Jerusalén: Titokab eb yin aymanil, cax chi oc eb yin cusc'ulal juj, cax nojokab el co bak' sat yuj yal, axa yin xil co sat chi eltek jil-labok yal co sat, ẍiokab eb.

¹⁹Chi ablay yoc ok'il yuj cusc'ulal bay Sión: ¡Caw wal ok'bal on c'ul, mayal on lajwi ayok, mayal wal jab yail q'uixawc'ulalil! A tinani', yowalil ok co bekcan co conobal ti', yujtol mayal uchchaj ay jatut, ẍiokab eb chi ok' tu', ẍi Jehová.

²⁰Ex ix, abek wal is k'anej Jehová, ac'bajek wal e txiquin bay cuybanil Cham. Cuyek eb e yune' yok' yuj cusc'ulal, yetokc'al eb e watx'il anima, ocokab eb yin ok'ilal yuj camich.

²¹A camich mayal octok yulak co na, mayal apni oc yulak co despacho. Chi cam eb unin bay yulak calle, c'al eb ach'ej chi cam eb bay txonbal.

²²Max yal Jehová ayin: Al bay eb: axca ti' yalon Jehová: Toxac'al ok can bulan is mimanil eb anima, axcaxac'al can bulan is tza' no no' bay satlak ac'al, axcaxac'al chi yun yaycan c'otlabok jolom ixim trigo yintak eb joom trigo, c'amxa mac chi sic'on ajok, ẍi Jehová, cachi, ẍi Cham.

²³Max yalon pax Jehová axca ti': C'amokab chi yak' tzalojbok c'ul eb jelan yuj is jelanil, tamwal eb ay yip yuj is yipalil, tamwal eb beyom yuj is beyomal.

²⁴Ayin wal caw Jehová in chi wala', tatol ay mac chi yochej chi yak' tzalojbok c'ul, tzalojokab c'ul yin in yojtaknen elok, tol ayin ton Jehová in, tol watx' chi wut in ba bay sat tx'otx' tx'otx' yin camc'ulal, c'al yin tojolal. A ton wal juntzan ti' chi cha in c'ul, ẍi Jehová.

²⁵Chi yal Jehová axca ti': Lanan jay tiempoal yet ok waoc yailal yiban eb anima bay Egipto, bay Judá, bay Edom, bay Amón, bay Moab c'al eb cajan bay takin tx'otx', a ton eb tol chi tzukil xil jolom bay tz'eyil-lak sat. A masanil juntzan anima ti' chi yaoc eb circuncisión yechelok is mimanil; palta c'am chi yikej eb trato chi tx'ox jun yechelej tu', tamwal ay junok juntzan conob ti' chi iken in trato, tamwal eb israel chi iken c'apaxok, ẍi Jehová.