Read Q'anjob'al Lm 2 Bible Online

Lm 2 - Q'anjob'al bible

Lm 2

¹Caw wal miman max yun yowal c'ul Cham Yajaw, toxac'al max k'ekk'olcan el bay conob Sión tol watx' yili, max yuch lajwok watx'ilal yili Israel, tol c'amxa axca. Tokwal maxto natek Cham batxlub yakan tu' yuj yowal is c'ul.

²C'amxa junok conob bay cajan eb yinatil Jacob maxto cancan yuj Cham. A yuj yowal c'ul, xan yin wal jun bek max yak' lajwok ay is cuartel-lak eb aj Judá. Mayal ayc'ay jun nación ti' sat tx'otx' yuj, yetokc'al masanil eb yajaw yayji bay tu'.

³Yuj yowal c'ul tu', xan max yak' lajwok masanil is yipalil Israel. Max yiel Cham is colwal yin, yet max jayoc eb ajc'ul. Max yaoc Cham is k'ak'alc'ulal yiban yinatil Jacob, axca wal junok k'ak'ej chi ak'on lajwok masanil tzet yetal.

⁴A Jehová, lajan wal max yut ba axca junok ajc'ul, max yijbajtok is julbal yin; lajan wal axca junok c'aywajwom, max mak'on cam eb ochebil juj; axca wal junok k'ak'ej, caywal tu' yayji oc yowal c'ul yiban cajlobal eb aj Sión.

⁵Lajan wal max yun Jehová axca wal chi yun junok ajc'ul. Max lajwi ay Israel yin junelnej yuj. Max yuchay masanil cuartel c'al despacho Judá; txololixac'al jayoc yailal yiban eb aj Judá tu' yuj.

⁶Axca wal chi yun yetnelaytok junok awoj, caywal tu' max yun yetnentok Cham is templo bay chi oc wajayil. A' max ak'on tojcan c'ayc'ulal k'in c'al c'ual xewilal yuj conob Sión. A yuj yowal c'ul Cham, xan max yintaknejcan el Cham eb rey c'al eb sacerdote.

⁷Mayal yintaknej can el Jehová is yaltar, cax c'amxa yopiso is templo yuj. Mayal yacan oc yul k'ab eb ajc'ul yet chi uchlay ay is nail. Xiwilxa aw chi oc bay templo Jehová, axcaxac'al tol c'ual k'in.

⁸A Jehová max nabalnej el yuchon ay murallail conob Sión. Max cam wal naon tzet ok yun yuchon lajwok, c'amc'al xewilal max yunej, masantac'al max yi ba yuj. Junnejxac'al max yun yayc'ay bulnaj torreal c'al is murallail.

⁹A jun conob tu', c'amxa is puertail, max k'aj c'apaxtok is yijul ayocok. Max pojtok, toxac'al max aycan wekan sat tx'otx'. A is reyal, c'al eb ayoc yin yajawilal, axac'al xol eb tx'ok conobal max tojcan eb; c'amxa ley Dios bay tu'. Axa eb chekbej Jehová, c'amxa tzet chi ak'i yil eb yuj Cham.

¹⁰A eb yicham winakil conob Sión tz'inxac'al ẍi eb, chotan ay eb bay sat tx'otx'. Chi yajtok eb pokok yiban is jolom, chi yaon oc eb el pichilej. A eb k'opoj ix bay Jerusalén chi ay nojan eb sat tx'otx'.

¹¹Caw wal chi etax el in sat yuj ok'il, caw wal tol ok nic'chaj txam in c'ul chi wabej; c'amxa in tec'anil chi wabej, yet chi wilon lajwi ay eb wet conob, toltax eb unin tol lananto txutxwi, chi camil eb yuj wajil bay yulak calle.

¹²Chi yal eb unin bay is txutx axca ti': Ak' co pan, ak' co vino, ẍi eb. Axca wal tol yas chi on eb, cax chi ayc'ay eb bay yulak calleal conob, cax chi bekon ay ba eb yul k'ab is txutx, cax chi el c'ul eb.

¹³¿Mac yetok ok ex in lajbaj ex aj Jerusalén? Ex aj conob Sión, ¿tzet junok tx'oxbanilej chin tx'ox ayex, yin ex in mimanc'ulneni? Caw wal miman max yun e lajwi ayok, ¿Macto wal ok ex ak'on watx'jok ajok?

¹⁴A tzet max yal eb chekbej ayex, lek'tialc'al elok. Maj tx'oxlay el e mul yuj eb, xan maj q'uexchaj e nabal. Max al-lay el lek'tial k'anej ayex, max e yaon oc jun tu' yin e c'ul.

¹⁵A yet chi il-lay Jerusalén yuj eb chi ec' yul be, toxac'al chi tzak' eb k'ab, yin buchwaji. Chi uẍli eb, c'al yak'on bil eb jolom yin buchwaji, cax chi yalon eb axca ti': ¿A mi conob ti' chi binaj bay sat tx'otx' ti' tol manxa watx'ilok yili? ẍi eb, chi buchwaj eb.

¹⁶Masanilxac'al eb ajc'ul chi alon yobal k'anej yin. Tol wal chi uẍli eb, tx'umumixac'al chi yut eb ti', chi yalon eb axca ti': Mayal jak' lajwok ay yin junelnej. A ton wal jun c'ual ti' max jochej, xan a tinani' lanan wal jiloni, ẍi eb.

¹⁷Mayal yun tzet yetal nabil yuj Jehová, mayal wal yun is k'anej albil yuj yettaxc'al payxa. Max on yak' lajwok yin c'amxac'al yabenc'ulal. Max el wal yin c'ul yak'on tzewok eb ajc'ul jin, max yion wal aj can yikbej eb ajc'ul tu'.

¹⁸Ex aj Sión, k'anek colwal Jehová e yetok. Elokab yal e sat yet c'ualil c'al ak'balil. Manchak e bek e yok'i, c'amokab chex oc wanaj e yok'i.

¹⁹Coc'takc'al chex aj wan, cax chi aj e yaw yet ak'balil, yin e k'anon colwal bay Jehová. Ok'anek yin masanil e c'ul satak Cham. Aektok e k'ab bay Cham, k'anek yabenc'ulal Cham yuj eb e yuninal, yujtol a bay txiquinlak calle lanan camay eb yuj wajil.

²⁰Mamin Jehová, nato wali, tok wal ayxa junok caywal tu' chot axca ti'. ¿Tok mi wal moj ay eb txutxej chi chiaytok yune' tol lananto txutxwi? ¿Tok mi wal moj chi mak'lay cam eb sacerdote, c'al eb a chekbej bay yul a templo?

²¹Eb ach'ej c'al eb icham winak, mayal ay latz'an bay yulak calle; eb ach'ej c'al eb k'opojtak ix, max cam eb yuj espada. Yet c'ual aytek yowal a c'ul, max a mak'cam eb yin tol c'amxac'al a yabenc'ulal.

²²Mamin Jehová, a yet c'ual yowal a c'ul tzanxac'al bay max etek xiwil yatakilal yin conob Jerusalén, axcaxac'al chi yun jayoc eb anima yet c'ual k'in, tok ayto mactxel max colchaj el yet tu'. A eb max jil ch'ibok, max co cuyu', max mak'lay cam eb yuj eb ajc'ul.