Read Q'anjob'al Lm 3 Bible Online

Lm 3 - Q'anjob'al bible

Lm 3

¹Ayin ti', miman wal max yun waben yail jun yowal c'ul Dios.

²Max in yuktejtok xol k'ekk'inal bay junelnej k'ekk'olinak. Max in yak' bey bay yulak be yin tol c'am in tzektebal.

³Masanilc'al c'u cac'al ti' quin is mak'on yetok yowal c'ul.

⁴Max yak' ichambok in mimanil, coc'xac'al max yutcantok in bakil.

⁵Max quin is makchej yetok yailal c'al etnejc'ulal.

⁶Max quin yak' ayjok ec' xol k'ekk'inal, axcaxac'al yayji ec' eb camnak yettax payxa.

⁷Max quin is makchej yin tol c'amxa bay chi ca weli; yetok wal mimek cadena max quin is c'albaj.

⁸Caxc'al chi el waw yin in k'anon is colwal, c'amxa chi cha yab in tewilal chi wal bay.

⁹Max makchej el in be yetok ch'en, yuj tu' xan axac'al bay q'uex be chin toji.

¹⁰Lajan wal max yut ba Cham ayin, axca wal junok no oso chi c'ubaj el ba, axca wal junok no coj tol t'inan chi oc jucnaj win.

¹¹Max in jutxlay el yuj yul be, coc'xac'al max quin yutcantok cax max in beklaycan yuj.

¹²Max watx'nej oc is julbal, max in yaon oc satak is julbal tu'.

¹³A julbal max jultek win, najat wal max tojcan yich bay max lowi.

¹⁴Masanilxac'al eb wet animail chi buchwaj eb win; asanxanej ayin chin yak' binaj eb xol is buchwal k'anej.

¹⁵Max in ayji wal ec' yin yatakilal yuj; caw wal c'a' tzet max yak' wuq'uej.

¹⁶Max pojtok we yet max quin ayc'ay sat tx'otx' yuj; toxac'al max in can telan xol pokok yuj.

¹⁷C'amxa in junc'ulal, tokwal naanto el tzalojc'ulal wuj.

¹⁸Chi waloni, tol mayal pax wip; a tinani' c'amxa oc Jehová yipok in c'ul.

¹⁹A yet chin naontek in cusc'ulal c'al wec' in tx'oklil, caw wal ya' chi wabej.

²⁰A wal yet chin naontek juntzan tu', manxa animaok ay in c'ul chi wabej.

²¹Palta ay jun tzet yetal chi wochej tol ayc'al ec' yin in nabal, a ton jun tu' chi wochej chi wac'al oc yipok in c'ul.

²²A ton wal yuj is camc'ulal Jehová, xan c'am chon lajwi ayok, yujtol c'am chi lajwi is yabenc'ulal Cham.

²³Caw wal miman yayji ocok, axca tol ac' chi jil yet junjun k'inibalil.

²⁴Yuj tu' xan chi wala' tol in satak wal yayji oc Jehová; yuj tu' xan asan Cham ayoc yipok in c'ul.

²⁵Caw wal watx' Jehová yetok eb tol a Cham chi yaoc yipok c'ul, a ton eb tol chi bekc'al oc ba yul k'ab.

²⁶Yelxac'al watx' tatol chi jechbanejc'al yin numanil, masantac'al chi colwaj Cham jetok.

²⁷Yelxac'al watx' tol chi jaoc co ba yul k'ab Cham, yintaxc'al co yaliẍal.

²⁸Watx' tol chon cancan co tx'oklil c'al yin numanil, yak'ban chi yaoc Jehová yailal jiban.

²⁹Yowalil tol chon oc yin ayilal, chon ay nojan bay sat tx'otx', talaj chito tx'ox Cham is yabenc'ulal jin.

³⁰Caxc'al chon mak'layi, chon buchlayi, palta co chaokabi.

³¹C'am chon beklaycan yuj Jehová yin junelnej.

³²Caxc'al mi chi ya wal oc co yailal, palta chi cus pax c'ul, yujtol a is camc'ulal caw wal miman yayji ocok.

³³Yujtol wal yel c'am chi cha c'ul Cham chi yaoc cusc'ulal c'al yailal jin.

³⁴A Jehová c'am chi cha' c'ul tol chi etax eb anima yuj cusc'ulal yul preso,

³⁵tol chi ilay el yikbej eb yin bay ay yalon yet, ak'bil yuj Cham Axac'al Ocok.

³⁶Man watx'ok chi yil Cham, tatol c'am chi beyc'ulnelay eb anima yin tojolal.

³⁷Tokwal ay mactxel chi yal junok k'anej cax chi yunen tzet chi yal tu', ta manak Jehová chi aloni.

³⁸Ta chi jayoc watx'ilal ma yailal, a Cham chi el yin c'ul yak'on yunej.

³⁹Tzet xan ok on alxok yuj tzet chon oni yak'ban iquis on. Yelxac'al watx' chi cus co c'ul yuj co yobtakil.

⁴⁰Co beyc'ulnejek wal el sic'libil, tzetbil wal yili co beybal, cax chi jaon wal oc co ba yul k'ab Jehová.

⁴¹Jaektok co nabal, c'al co txaj bay Dios aj satcan cax chi jaloni:

⁴²Max oc co mul c'al co tenomtakil ayach, maj pax ak' tanil co mul jiban.

⁴³Max jayoc yowal a c'ul jin, max on okteni, max on a c'ayil yin tol c'amxac'al a yabenc'ulalil.

⁴⁴Max a c'ubaj el a ba xol jun asun, yet watx' c'amxa chab co tewilal.

⁴⁵Axca k'alem max con ot satak masanil anima.

⁴⁶Masanilxac'al eb jajc'ul, max jak eb ti' con buchoni.

⁴⁷A xiwc'ulal, c'al tx'an yal, c'aybanilal, c'al uchlejbail max jayoc jiban, con chiokabi.

⁴⁸Caw wal chi el jililok yal in sat yuj cusc'ulal, yujtol lanan lajwi ay eb wet conob.

⁴⁹C'am chin bek wok'i, yuj wabenc'al yail,

⁵⁰masantac'al ok yal con yilon aytek Jehová bay satcan.

⁵¹Caw wal ya'xac'al in sat chi wabej yetok wanimail, yuj tzet chi ec'tok yiban eb ix ix bay yul in conobal.

⁵²C'am wal jabok tzet yujal, xan max quin is yukten eb ajc'ul axcaxac'al chi yun jukten junok no tz'iquin.

⁵³Iquis in wali max in k'okon aytok eb bay yul jun olan, cax max makchen can eb jun olan tu' yetok junok ch'en, c'amxa bay chi ca weli.

⁵⁴Max in aycantok laan xol aej, max in na' wali tol ok in c'ayxac'al elok.

⁵⁵Mamin Jehová, max in awji ayach tac'al bay najatil yich jun olan tu'.

⁵⁶Ab yoc yul in nuk'; manchak a bek a chaon ab in tewilal, quin chi.

⁵⁷Max cach jayoc in c'atan yet jun c'ual yet max ach wawteni, cax max alon ayin: C'am chach xiwi, cachi.

⁵⁸Mamin, max in a colcan el yul k'ab camich.

⁵⁹Mamin Jehová, ila wal chin utlay yin man tojolalok ti'. Ach ti' beyc'ulnej in el yin tojolal.

⁶⁰Ilab wal yili is yochwan eb, c'al naon eb yin tzet ok in yutej.

⁶¹Ab wal xin Mamin Jehová, jantak wal yayji oc tzet chi yal eb win, c'al masanil jantak tzet chi na eb win.

⁶²Ilab c'apax is k'anej eb ajc'ul tu' chi yala'. Junjunc'al bek chi yalon eb yobal k'anej win.

⁶³Ila wali, c'ualil c'al ak'balil chin is buch eb.

⁶⁴Mamin Jehová, paktzej bay eb axca wal is mojalil yuj tzet chi yun eb.

⁶⁵Ak' pitbok el is nabal eb, cax chaontok catab yiban eb.

⁶⁶Mamin, uktej eb yetok yowal a c'ul. C'ayokab aj eb oj bay yulyibank'inal ti'.