Read Q'anjob'al Lm 4 Bible Online

Lm 4 - Q'anjob'al bible

Lm 4

¹Mayal wal k'ekbi el yili ch'en oro. Mayal wal etax el yili is jopopial ch'en oro caw wal watx'. A masanil ch'en ch'en yet templo, sakleminakxac'al max yuncantok bay yulak calle.

²A eb ach'ej bay conob Sión, yelxac'al ochebil eb yintak ch'en oro watx'; axa tinani' xin, lajanxac'al chi utlay eb axca junok tx'otx' xij watx'nebil yuj junok comon tz'aklom.

³Toltax no txutx ok chi yak' txutxwok no yune', a pax eb ix wet conob ti', junelnej wal tol c'amxa yabenc'ulal eb axca no avestruz chi ec' bay tz'inan tx'otx'.

⁴A eb unin lananto txutxwi, caw wal chi cam eb yuj takintial, toxac'al chi occan lotzan yak' eb yul is jom. Chi k'an eb unin tu' is lobej, tokwal ay mac chi ak'on bay eb.

⁵Ay wal eb xiwil tzet chi lo yet payxa, axa tinani', lanan cam eb yuj wajil bay yulak calle. Axa mactxel max ch'ib bay yulak na ayxamay yili, axa tinani' a tu' chi cajay ec' eb bay xolak k'alem.

⁶A wal yailal max jayoc yiban in conob yuj is yobtakilal, yelxac'al ec'ban yintak yet eb aj conob Sodoma. A jun conob tu', yin junnej bek max yun lajwi ayok, tok ay mactxel max oc oyan yin yin yak'on owal.

⁷A eb yajaw co xol, jopopixac'al yili eb yintak ch'en sakbacom, yelxac'al sak yili eb yintak leche; yelxac'al cak yili is mimanil eb yintak ch'en coral; yelxac'al watx' yili eb yintak ch'en zafiro.

⁸Axa tinani', yelxac'al k'ek yili eb yintak ak'balil. A mac chi ilon eb bay yulak calle, c'amxa chi nachaj elok mactxel eb. Mayal oc lotzan tz'umal eb yin is bakil, takinxac'al eb axca te si'.

⁹Yelxac'al watx' yet mactxel max cam yin owal yintak mactxel tol a yuj wajil chi cami, yinxac'al c'ojanc'ulal chi yun cam eb yujtol c'amxa tzet chi lo eb.

¹⁰A wal eb xal ix watx' is nabal, chi yak' cam eb xal yune', cax chi txicon eb, chi chion aytok eb yune' tu' yuj yailal max jayoc yiban in conob.

¹¹Max yun wal axca jantak yowal c'ul Jehová, max bek ay Cham yowal c'ul tu'; max yaon oc k'ak'al conob Sión, masantac'al max yal lajwi ay is cimientoal.

¹²A eb rey bay yulyibank'inal, c'al eb conob, maj na eb tatol ay eb ajc'ul ok je' wal yoctok yul conob Jerusalén,

¹³axca max uj tu' yuj is mul eb chekbej Dios, c'al yuj mul eb sacerdote, tol max pulcantok chiq'uil anima c'am is mul yuj eb.

¹⁴Axa tinani', lajanxac'al yec'jab eb bay yulak calleal conob, axca yec'jab eb tol c'amc'alta' chi ilwi; caw wal tz'iltakxac'al pichil eb yuj chic', tok ayto mactxel chi cha c'ul chi oc lacan yin pichil eb.

¹⁵Manchak ex jayoc co c'atan, yujtol caw wal tz'iltak ex; manchak ex oc lacan jin, ẍi eb yet conob eb bay. Chi ec'jabtok eb xolak conob, tok ay mac chi chaon eb.

¹⁶Yetok yowal c'ul Jehová max yuchon saklemtok eb, majxac'al taynelay eb yuj. C'amxac'al yelapnok eb sacerdote yul sat Cham, tamwal ayto yabenc'ulal Cham yin eb icham winak.

¹⁷Nabaxac'al max on c'unbitok co makwaji, talaj ay mac max jayoc con is coloni. Atac'al bay co torre ayon ajtok co makon jun nación t'inan con is coloni, palta maj pax je' yuj.

¹⁸Ayxac'al oc sat eb ajc'ul jin, yin tzet chi yun co beyc'altok. C'am chi je' jeltok bay yulak calle; mayal jayoc lajubal jiban, mayal jayoc camich jiban.

¹⁹A mactxel chon ukteni, yelxac'al jelan bey eb yintak no tx'acbaj chi ec' jenenok bay satcan. Tzakanc'al eb jintak bay jolomlak witz; chon maklay yuj eb bay tz'inan tx'otx'.

²⁰A co reyal ayoc yipok co c'ul, cham sic'bil el yuj Jehová, mayal michchaj yuj eb. Ayon ti', max co na' tol a wal cham ok on colon bay juntzanxa nación.

²¹Ex aj Edom, tol che yak' yajawilal bay masanil is makbej Uz, tzewanek, tzalojanek, yak'ban chi to je'. Yujtol ok apnok c'apax oc yailal e yiban; axcaxac'al uq'uem an ok e yunej, q'uixwiltakxac'al ok e yut e ba.

²²Mayal wal yun jantak yayji oc e yailal, ex aj conob Sión. Man ok ex alayc'al tok yin presoal yuj Jehová yin junelnej. Axa ex ayex ti' ex aj Edom, yuj e yobtakilal, xan ok yak' c'apax Jehová yailal e yiban, caywal tu' ok yun txecloj eltek, jantak wal yayji oc e mul.