Read Q'anjob'al Ez 17 Bible Online

Ez 17 - Q'anjob'al bible

Ez 17

¹Max k'anjab Jehová ayin, max yalon axca ti':

²Ach anima, al junok abix bay conob Israel yin tx'oxbanilejal.

³Al axca ti': Tix wal chi yun yalon Jehová Cham Jajawil ti': Ay wal jun águila max apni oc bay Líbano; a is xic' caw wal miman, najattac'al chi apni oc jenanok, caw wal tz'ibibixac'al yili is xil. A tu' max apni oc no' bay jun te c'ute'.

⁴Max yion el no' chon jun te' tol can ayajok, max toji. A tu', max apni oc no' yaway bay jun conobal eb txonjom, bay jun conob caw wal xiwil tzet chi txonlayi.

⁵Lajwi tu' max yion aj no' jun wol uva, axa bay e tx'otx'al max bet yaway no' bay chi oc mulnajil bay tilak aej axca chi yun yawlay te bakmam.

⁶Axa yet max wolji an xin, caw wal miman tx'an max yunej, tol xiwil xak caxc'al txennej wal is tel ayajok. Max t'intok ba is k'ablak bay ayic' no águila cax max beyc'altoj xe' yul tx'otx'. Xiwil wol max aji, c'al k'ablak.

⁷Palta ay junxa no águila yelxac'al miman, yel miman is xic', xiwilxa is xil. Axa pax jun tx'an tu xin, atac'al bay awbil ayok, a tu' max beyc'altoj is xe, c'al is k'ablak bay yetc'ulal junxa no águila tu', yet watx' miman aej chi yak'c'al no' bay.

⁸Palta xin, tutun wal tol watx' tx'otx' bay awbil ayok. Ayc'al miman aej tu', xan chi je' beyc'altoj is k'ablak, c'al yak'on is sat yin is tiempoal, c'al yoc yin tol manxa watx'ilok yili, ẍi Cham, cachi.

⁹Al in k'anej ti' bay eb et conob: Cay wal ti' yalon Jehová axca ti': A jun tx'an ti', man ok aj can ch'ibi. A no águila yet babelal, a no' ok ocon ajtek is xe'. Caywal tu' ok yun yay bulnaj is sat pukayok. Ok tak c'apax juntzan is wol toltoc'al max ajolok. Man yowalilok tol miman ipej, c'al xiwilok anima ok ocon ajok.

¹⁰Caxc'al chi q'uexlay bay chi awlayi palta majxac'alta' ajol is wol. A yet ok low cak'ek' chi tit bay yichcan yin, ok takilok. Ok takil bay moj wal tol chi wolji, cachi bay eb, ẍi Jehová, cachi, ẍi Cham.

¹¹Max k'anjab Jehová ayin, max yalon axca ti':

¹²K'anlej bay jun conob caw wal tenomtak ti', tatol yojtak tzet chi yal elapnok jun abix ti'. Al bay eb xin: A reyal Babilonia max apni oc bay Jerusalén, max ul yiontok reyal Judá yin presoal bay Babilonia, yetokc'al eb ayoc yin yajawilal yetok.

¹³Lajwi tu', max yaon oc yin yajawilal jun yinatil eb chi occ'al yin reyal. Max watx'nen jun is trato yetok. Max yak'on pural yak'on is ti' yin tol yikem ok yut ba bay. Max yiontek eb mimek winak yayji bay jun conob tu' yin presoal,

¹⁴yet watx' a jun makbej Judá tu', chi cancan yin tol caw wal c'amxa yip, tol c'amxa chi je' yion aj wan ba, cax chi ayji ec'ok, asanxanej yin yiken jun trato tu'.

¹⁵Palta a jun yajaw tu', max yut ba yin tenomtakilal bay reyal Babilonia. A ti' yet tol max yatok chekbej bay Egipto, yet chi k'antek xiwilok chej, c'al xiwilok soldado. ¿Chi mi e na tol ok je' colon el ba axca tu'? ¿Tom wal ok je' colon el ba junok mactxel tol c'am chi yikej junok is trato?

¹⁶Ayin Jehová Yajaw in chi wak' in ti': A bay Babilonia ok cam mactxel c'am yelapnok bay max yak' is ti' tu' yul sat, cax maj yikej bay jun is trato max watx'nej yetok jun rey max ak'on yikbej.

¹⁷A reyal Egipto tu', caxc'al xiwil is soldado tec'an waayi, man ok je' colwaj yin owal yet ok watx'nen aj eb aj Babilonia walubej, c'al muralla bay yinlak conob Jerusalén yet chi mak' cam xiwilok anima.

¹⁸Max yintaknej el bay max yak' is ti', maj yun bay tzet chi yal is trato max watx'nej tu', caxc'al max yak' is ti' tol yikem ok yut ba, palta yuj max yunc'al juntzan ti', xan majxa je' colon ba.

¹⁹Ayin Jehová Yajaw in chi wak' in ti': Maj yikej yunen bay max yak' is ti' in satak, a ton yin jun trato max yak'a', bay max quin yak' binajok, yuj tu' xan ok waoc yailal yiban.

²⁰Ok watok junok in tx'an yal yiban. Caytu' ok yun cancan yul tx'an, ok witek bay Babilonia. A bay tu' ok oc beyc'ulal yiban, yujtol tenomtak max yut ba ayin.

²¹A eb is soldado caw wal tol jelan, ok cam eb yin owal, axa eb okto cancan xin, ok saklemcantok eb bay masanil yulyibank'inal ti'. Caywal tu' ok yun nachaj el e yuj, tol ayin ton Jehová in max wal jun ti'.

²²Ayin Jehová Yajaw in chi wala': Ayin caw ok wiel chon te c'ute' can ayajok. A junok yuninal chon te' ok wielok, ayin wal caw ok waway bay junok jolom witz yelxac'al can ayajok,

²³a ton bay jun witz yelxac'al can ayaj bay Israel. Axca tu xin ok ch'ibaj is k'ablak, miman c'ute' ok yunej tol caw wal yelxac'al watx'. A bay yich te' tu', ok cajay masanil pojanil no no', axa bay is k'ablak te', a tu' ok watx'nej masanil pojanil no tz'iquin is wayub.

²⁴Axca tu' ok yun yojtaknej el masanil te te'*fn* tol ayin ton Jehová in chi je' chin k'akaj te miman te' caw wal chi maynej ba, cax chi je' wak'on ch'ibaj te' txennej tel. Ayin chi wak' takaj te te' caw wal yax, cax chi wak'on yaxbok aj te' takin. Ayin wal caw Jehová in chi wala', cax chi wak'on yunej ẍi Jehová, cachi, ẍi Cham.