Read Q'anjob'al Ez 19 Bible Online

Ez 19 - Q'anjob'al bible

Ez 19

¹Ach anima, ocan ijan yin jun bit yet cusc'ulal yuj eb reyal Israel cax chalon yin eb axca ti':

²A e txutx, lajan axca junok no txutx coj mimanbil, junej ay yetok no mamej; max watx'nej is wayub bay tu'. A bay tu' max ch'ib c'apax aj no yune'.

³Ay jun yune' max yak' ch'ibok, masantac'al max yal wal ch'ibajok. Max cuyaj mitx'on is chibej, toltax max chilay aytok eb anima yuj.

⁴Max yab wal juntzan nacionlak is k'umal tzet wal chi yunej. Max mitx'lay yuj eb yul junok yal, yetok gancho max jutxtok eb, masantac'al max apni oc bay Egipto.

⁵A yet max yilon jun txutx coj tu' tol maj yun axca chi yochej c'ul, max yiontok junxa yune', cax max yilon wal ch'ibok.

⁶Axa yet mayal wal oc yin mimanil xin, chixa betic' xolak no' mimek. Caywal tu' max yun cuyon ba mitx'on is chibej; axa max yun xin, chi chilaytok eb anima yuj.

⁷Xiwilxa uchlejbail chi yun bay yulak cuartel. Xiwilxa mimek conoblak chi yetnejtok; caw wal chi bil jun yulyibank'inal ti' yuj yel yaw.

⁸Lajwi tu xin, max oc eb conoblak cajan is cawilal tu' ajc'ulal yin; max watx'nen ay eb yal. Caywal tu' max yun yayc'ay yuj eb.

⁹Yetok gancho max yaon octok eb yul jaula, caytu' max yun yilaytok bay cham reyal Babilonia. Max alay octok preso bay tu', yet watx' c'amxa mactxel ok aben yel yaw bay jolomlak witz yul yet Israel.

¹⁰A e txutx, lajan wal axca junok an uva awbil bay tilak junok a' aej. Chi ajolok, yelxac'al miman chi yunej, cax chi yak'on is sat, xiwilxa wol chi tita, yujtol ayc'al oc yal.

¹¹Caw wal ch'enal te' max yun is k'ablak. A k'ablak tu' max oc is k'okochok eb rey. Yelxac'al miman max yun ch'ibaj is tel, masantac'al max ajapnok bay xolak asun. Ayxamay max yun yili, yuj miman is tel c'al yuj xiwil is k'ablak.

¹²Palta max yoc wal aj an uva tu' yetok yowal c'ul, max k'okay sat tx'otx'. Yuj cak'ek' max tit bay yichcan, xan max takaj yetok is sat. Max jech'lay el is k'ablak tol ch'enal te tu', max takajok axa yak'lay tz'a tu'.

¹³Axa tinani', a tu' awbil bay takin tx'otx'.

¹⁴Yuj jun k'ak'ej max ak'on tz'a is k'ab miman yin tu', max tz'a c'apaxtok is sat yetok. C'amxa is k'ablak tol ch'enal te' tol chito je' yoc is k'okochok eb rey, ẍi jun bit, ẍi Jehová. (A ton jun bit ti', bit yet cusc'ulal, a yuj tu' ok bitnelayok.)