Read Q'anjob'al Ez 22 Bible Online

Ez 22 - Q'anjob'al bible

Ez 22

¹Max k'anjab Jehová ayin, max yalon axca ti':

²Ach anima, ach ok al wuj jantak yailal ok oc yiban jun conob mak'om cam anima ti'. A yuj jantak tzet yetal tol yajbejtak max el yuneni,

³xan al bay: Caywal ti' yalon Jehová Cham Yajaw axca ti': Ex conob, tol che mak' cam eb cajyom e xol, cax che watx'nen aj juntzan yechelej tol chi etnentok e nabal, xan ayexc'al oc ok e yitek yailal e yiban.

⁴A yuj jantak anima max e mak' camok, xan ok jayoc e yiban tinani'. Yuj juntzan yechelej max e watx'nej ajok, xan mayal etax el e nabal, yuj tu' xan mayal jayoc lajub tiempoal e yiban. A yuj tu' xan ayin ok wak' yun eb conob yet ok ex baj eb, masanilxac'al nacionlak ok ex buchonok.

⁵Masanilxac'al nación ok buchwaj e yin, eb ay e cawilal, c'al eb ay bay najat, caw wal mimanbil e binaj yuj uchlejbail che yunej.

⁶A jantak eb yajaw cajan e xol tu', chi mak' cam eb anima, yujtol ay yikbej eb.

⁷C'amxa yelapnok e mam e txutx yul e sat. Che yetnej eb tx'ok conobal. Che tok'on ec' is tzet yetal eb c'amxa is mam, c'amxa is txutx, yetokc'al eb ix ix camnakxa yichamil.

⁸Tok ay yelapnok in cajlobal yul e sat, tamwal c'ual xewilal tol wet yayji ocok.

⁹A e xol ay mac chi naaj k'anej yin yet animail, yet chi mak'lay camok. Chex toj c'apax bay k'in chi chalay bay jolomlak witz yet chi oc ayilal bay comon dios. A wal tzet yetal q'uixwiltak che yun bay tu'.

¹⁰Ay ex chex mulji yetok yistzil e mam, ayex che mitx' oc e yetbi yet ayoc yin bisbal xajaw.

¹¹Ay ex chex mulji yetok yistzil e yet animail, ayex c'apax che mitx'oc e yalib, ayex che mitx' c'apax oc e yanab tol cutz'in e mam.

¹²Ayin wal caw Jehová in chi wala', tol ay eb e yajawil chi cha' tumin yet chi yaon oc camich yiban eb c'am mul. Che yetnej e yet animail yin e k'anon el miman yuca' e tumin che yak' majanej eb, comonc'al chex caktzaj oc yin e yet animail yuj e yion ec' tumin; axa ayin ti' xin, chin tojcan c'ayc'ulal e yuj.

¹³Caw wal aytek wowal yuj e yetnewomal, c'al yuj e mak'om cam animail.

¹⁴¿Chi mi e na' tol ok je' e tec'ban e ba in satak yet ok ex in beyc'ulnen elok? A tzet yetal mayal wal ayin Jehová in ti', yowalil ok wak' yunej.

¹⁵Ok ex in saklemnejtok bay xolak nación, c'al bay xolak masanil conob, caywal tu' ok yun in sakbanen el e yobtakilal tu'.

¹⁶Q'uixwiltakxac'al ok e yut e ba satak masanil nacionlak. Caywal tu' ok yun nachaj el e yuj, tol ayin ton Jehová in, ẍi Jehová, cachi, ẍi Cham.

¹⁷Max k'anjab Jehová ayin max yaloni:

¹⁸Ach anima, a eb et israelal c'amxa tzet chi oc eb wuj. Lajan wal eb axca tzet chi el xol ch'en plata yet chi ak'lay tz'a bay horno, chi yal elapnok a ton ch'en cobre, ch'en estaño, ch'en hierro, c'al ch'en plomo chi eli.

¹⁹Yuj tu' xan ayin Jehová Yajaw in ti' chi wala': Ayex ti', lajan exxac'al axca junok tzet yetal tol c'am yopiso, yuj tu' ok ex in wajbaj aj bay yul conobal Jerusalén.

²⁰Axca wal chi yun ch'en plata, ch'en cobre, ch'en hierro, ch'en plomo, c'al ch'en estaño, junejxac'al chi yun yalaytok ch'en bay yul junok horno, cax chi uljitok ch'en bay xol k'ak'ej tu', caywal tu' ok ex wut yetok yowal in c'ul. Ok ex in wajbaj ocok, cax ok waon oc e yailal.

²¹Ok ex in wajbaj ocok, cax ok waoc yailal e yiban yul conob yetok yowal in c'ul,

²²axca wal chi yun yuljitok ch'en plata bay yul junok horno. Caywal tu' ok yun nachaj el e yuj, tol ayin ton Jehová in max wiel yowal in c'ul e yin, ẍi Cham.

²³Max k'anjab Jehová ayin, max yalon axca ti':

²⁴Ach anima, al bay eb et israelal axca ti': A e tx'otx'al, man watx'ok yayji in satak; yuj wal yowal in c'ul, xan c'am jabok nab chi jay yiban tx'otx'.

²⁵A wal eb chi yaloc ba in chekbejok ayic' e xol, lajan wal eb axca no coj tol chi el yaw, chi coc'tzilnejtok is chibej. Junlajanxac'al chi yun mak'wi cam anima eb, cax chi yion ec' eb beyomal, c'al tzet yetal watx' ay bay eb anima tu'. Xiwil eb ix ix chi cancan yin c'am yichamil e xol yuj eb.

²⁶A eb sacerdote, c'am chi yikej eb in cuybej chi wak'a'; a tzet yetal tol caw wal watx' yul in sat, a chi yetnejtok eb. C'am q'uexanil yul sat eb tzet yetal watx' yul sat ley, c'al tzet yetal man watx'ok, tamwal chi cuylay eb anima yuj eb, yet chi yojtaknej el eb tzet yetal watx', c'al tzet man watx'ok. Tok chi na eb yin c'ual xewilal tol wet yayji ocok. Yuj tu' txequel tol c'am welapnok yul sat eb.

²⁷A eb yajaw yayji bay e conob ti', lajan wal eb axca no ok tol chi coc'tzilnejtok is chibej. Chi mak' cam eb eb anima, yujtol caw wal chi yochej eb chi oc yin beyomal.

²⁸C'al eb chi yaloc ba in chekbejok, chi makchej ay eb tzet yetal man watx'ok axca chi yun yoc tan yin junok icham na. Chi yalon eb tol ay tzet chi wak' yil eb, chi yalon el eb lek'tial k'anej. Chi yal eb tol ayin chi wak' yal eb juntzan k'anej tu', palta wal yel, ayin ti' c'am tzet chi wak' yalil eb.

²⁹A eb anima asanxanej yin yetnen yet animail chi yunej, c'al yin elk'an. A wal eb meba', eb c'am tzet ay, a eb chi yetnej eb. Yelxac'al man tojolok tzet chi yun eb yin eb tx'ok conobal.

³⁰Ayin ti' max in sayic' bay xol e conob ti', talaj ay junok watx'to wal is nabal, chi tewi ayin yuj is conob, yet watx' c'am chi wak' lajwok ayok, palta c'am junok max ilchaj wuj.

³¹Yuj tu' xan ayin wal caw Jehová in chi wala' tol ok watok yailal yiban eb, ok wak' lajwok ay eb yetok in k'ak'alc'ulal. Caywal tu' ok yun jayoc yiban eb yuj is yob unbenal, ẍi Jehová, cachi, ẍi Cham.