Read Q'anjob'al Ez 23 Bible Online

Ez 23 - Q'anjob'al bible

Ez 23

²A yet junel, ay cawan eb ix ix tol junnej is txutx eb.

³Yettaxc'al unin k'opoj eb, max yaon oc ba eb yin ajmul ixal bay Egipto. A bay tu' max cha eb pitz'lay yim, xan manxa k'opojok max yuncan eb.

⁴A ix babel chi yik Ahola,*fn* a ton ix chi tx'oxontek Samaria. Axa junxa ix nuejejal tu', chi yik Aholiba, a Jerusalén chi tx'oxtek. Ayin max waoc eb wetbiok, max el in c'ajol c'al in cutz'in yetok eb.

⁵Caw wal yob max yut ba ix Ahola, max yaoc mul yul in k'ab yetok eb soldado aj Asiria.

⁶A juntzan tu', a an yax k'ap ayoc is pichilok eb: Masanil eb, yajaw yayji eb, c'al capitán eb. Eb ach'ej tol ochbejtak yili, masanil eb ayoc yiban chej.

⁷A eb tol caw wal watx' yili xol eb aj Asiria, a wal yetok eb tu' max yaoc ba Ahola yin ajmulal. Max yaon c'apaxtok is nabal yin is diosal eb, max oc ayilal bay juntzan tu'.

⁸Ataxc'al yet ayic' bay Egipto max occan yin ajmulal, c'amc'al chi beka'. Yettaxc'al k'opojal, xiwil mactxel max yunc'al mulej yetok. Manxa k'opojok ix, yinxac'al ajmulal max occanok.

⁹Yuj tu' xan max waxac'al oc yul k'ab eb ay is camc'ulal yetok tu', a ton eb Asiria max yochejtok ix.

¹⁰Axa max yunej, max el t'iran yuj eb, max ilay ec' eb is yune' yuj eb, max tzoc'lay cam ix yuj eb. Caywal tu' max yun yaon oc eb yailal yiban. A tzet max utlay tu', caw wal miman max yun binaj xol eb ix ix.

¹¹A pax ix Aholiba, is nuej ix tu', max yil wal juntzan tu', palta yelxac'al max ec' yiban yaon oc ba yin ajmulal yintak ix Ahola.

¹²Max yac'apax oc ba yul k'ab eb aj Asiria, a ton bay masanil eb yajaw, eb soldado ayxamay yili is pichil eb ayocok, eb ayoc yiban chej, tol ach'ej, watx'xac'al yili.

¹³Max nachaj el wuj tol max yetnej c'apaxtok ba yetok eb tu', lajanc'al max yut ba axcac'al max yut ba junxa ix nuejejal tu'.

¹⁴Palta yelxac'al miman max yuntok is yajmulalil ix tu'. Max yiloc ix juntzan yechelej tz'ibbil oc yin sat pared, a ton eb caldeo cak yili pichil eb.

¹⁵Ayoc cinturón eb, c'al k'oxil is jolom eb, cochwal tol yajawil eb soldado, aj Caldea eb.

¹⁶A yet max yilon oc juntzan yechel eb aj Babilonia tu', caw wal max yochej ocok, xan max yatok chekbej bay Babilonia.

¹⁷Lajwi tu xin, max jayoc eb aj Babilonia max ul oc eb yin ajmulal yetok. Xiwil max yut ba yetok eb, masantac'al max yal yajlay aj eb yuj.

¹⁸Caytu' max yun yaonxac'al oc ba yin ajmulalil satak conob. Toltax max tx'oxxac'al el t'iran is mimanil, masantac'al wal max yal wal in yajon ajok, axca wal max wun yetok ix nuejejal.

¹⁹Palta yelc'ulal max occ'al yin ajmulal. Max naonc'altek is k'opojal yet payxa, yet max oc yin ajmulal bay Egipto,

²⁰yettax max yaon oc ba yul k'ab eb, caw wal chi yochelej ba yetok, a ton juntzan winak lajanxac'al chi yut ba axca no burro ma no caballo yin junok no txutxej.

²¹A wal ach ti' ach Aholiba ochbejtakxac'al, a naontek ajmulal yet k'opoj ach yet max pitz'on eb aj Egipto em.

²²Yuj tu' xan ayin wal caw Jehová in chi wala': A wal ok wutej, a juntzan eb max a camc'ulnej, axa tinani', lananxa a yajon ajok, tzanxac'al bay ok ca tit eb yak'on ajc'ulal en,

²³axca eb aj Babilonia, c'al eb aj Caldea, eb aj Pecod, eb aj Soa c'al eb aj Coa, yetokc'al masanil eb aj Asiria, masanil juntzan ach'ej tol watx'xac'al yili, eb yajaw, c'al eb mimek yopiso, c'al eb soldado tol ayoc eb yiban chej.

²⁴Ok tit eb tu' en yetok xiwil carruaje, c'al xiwil soldado. Toxac'al ok oc oyan eb en, ibil oc arma yuj eb, c'al ch'en toctor, ibil c'apax oc makbal julbalej yuj eb. Ayin ok wak' yikbej eb yin ach beyc'ulnen yetok yailal, atac'ala' is leyalil eb.

²⁵Yetok wal in k'ak'alc'ulal cax ok wion wal el yowal in c'ul en. A eb tu' ok ach etnen wal sic'libil. Ok c'upil eb a txam c'al yetok a txiquin. A eb one' ok tzoc'lay cam eb yetok espada. Ok tzac'lay aj eb one', eb winak unin c'al eb ix, axa yin is lajubal xin, ok ach ak'lay tz'aok.

²⁶Ok yiel eb a pichil c'al yetok masanil ch'en ch'en ayoc yelbubok.

²⁷Caywal tu' ok yun lajwokcan apnok ajmulal max on bay Egipto, c'amxa yechel ok ochejtok juntzan tu' junelxa, tamwal okto a natek Egipto tu'.

²⁸A ton wal juntzan ti' chi wal ayin Jehová Yajaw in ti': Ayin ok ach waoc yul k'ab juntzan nación tol yob a c'ul yin, a ton juntzan tol yajbil oj.

²⁹Caw wal ok yak' eb tu' yobc'ulal en. A eb ok ioncan tzet yetal max e' yin a mulnajil, toxac'al ok ach elcan t'iran yuj eb. T'iranxac'al can el a mimanil chaoc yin ajmulal tu' yin c'amxa q'uixwilal.

³⁰Axca tu' ok yun jayoc eban, yujtol bekanxac'al max ot a c'ul yin ajmulal yetok juntzan nación tu', c'al oc yin ayilal bay juntzan is diosal eb.

³¹Yujtol axcac'al is beybal jun a nuej tu' max a beybalnej, yuj tu' xan a wal yailal max waoc yiban a nuej, a' ok waoc eban ach ti', axca wal tol ac'ala' tzet ayay yul junok vaso, chi wak' e yuq'uej.

³²Ayin Jehová Yajaw in chi wala': A tzet yetal max yuc' a nuej, a' ok oc' c'apaxok. A jun miman vaso tol caw wal miman yul, a ok oc'balnej. Masanilxac'al nacionlak ok ach buchonok, c'al ach yajon eb yuj jun miman vaso choc'balnej tu'.

³³A tzet ay yul vaso tu' ok ach oybok yuj, c'al a cusaj yuj. Caw wal ok ach xiwaj yuj yob tzet ok yitek eban. A ton jun vaso tu' max yuc'balnej a nuej Samaria.

³⁴Ayin wal caw Jehová Yajaw in chi wala', tol ok oc'balnej jun vaso tu', c'am tzet ok cancan yul. Lajwi tu' ok a mak'on pojok, axa yetok is pojilal ok ak' yasjoktok em.

³⁵Yuj tu' xan ayin Jehová Yajaw in chi wala': Yujtol max in tojcan c'ayc'ulal oj, toxac'al max ach el tx'uman ayin, yuj tu' xan yowalil ok ab wal yailal yuj ajmulal tu', ẍi Jehová.

³⁶Max yalon Jehová ayin: Ach anima, alil jantak yailal ok jayoc yiban Ahola c'al yiban Aholiba. Watx' chi yun alon oc yin sat, jantak tzet yetal tol yajbejtak max el yunen eb.

³⁷A eb tu', max yaoc eb mul yul in k'ab, chic'takxac'al k'ab eb. Max in beklaycan yuj eb, axa bay comon dios max oc eb ayilal. Max yak'on tz'a eb is yune' yin xajanbalil bay juntzan comon dios tu', a ton juntzan wuninal max wil yetok eb.

³⁸Yetok c'apaxok, max yun wal eb juntzan ti': yin junnej c'ual max yun yetnentok eb in templo, c'al c'ual xewilal tol wet yayji ocok.

³⁹A ton yet c'ual yet max yak'on tz'a eb wuninal yin xajanbalil, yin yion aj can eb is diosal tu', a yet tu' max jay c'apax oc eb ul yetnentok in templo; a ton wal juntzan tu' max beybalnej eb yul watut.

⁴⁰Max yatok eb chekbej yet max awtelay eb winak cajan bay najat; axa eb ix cawanil xin, max achinwi eb, c'al bonon eb sat, max yaon c'apax oc eb ch'en ch'en chi yaoc eb yelbubok yin, yet chi chalay jayoc eb nak yuj eb.

⁴¹Max ay chotan eb bay jun tx'at manxa watx'ilok cawxi. Watx'xa c'apax yayji ay loj bay meẍa. Max yaon c'apax ay eb incienso, c'al aceite tol wet yayji ocok bay sat meẍa tu'.

⁴²Toxac'al chi weklabi jun bulan comon anima yin chaon k'in yetok eb; a ton juntzan uq'uem an max tit bay tz'inan tx'otx', a ton eb chi aon oc yelbub yin eb ix ix, chi yaoc eb brazalete yinlak is k'ab eb ix, chi yaon c'apax aj eb corona manxa watx'ilok yin is jolom eb ix.

⁴³Lajwi tu' max in naon yin juntzan ix caw wal yobxac'al yuj yajmulal: Yunokab eb winak yetok eb yin ajmulal tu' yujtol axcaxac'al tu' chi yun eb, quin chi.

⁴⁴Max jayoc eb way yetok eb yoblom ix, a ton Ahola c'al Aholiba, axca wal chi yun way eb winak yetok eb ix ajmul ix.

⁴⁵Palta a eb winak tol watx' is nabal xin, a eb ok alonok jantak wal yailal ok jayoc yiban eb ix, axca wal is mojalil yajmulal eb, c'al yuj is mak'oj cam animail eb, ẍi Jehová.

⁴⁶Ayin Jehová Yajaw in chi wala': Wajokab ba masanil conob yin eb ix tu' yet chi alay oc eb yin mimek xiwc'ulal, c'al yelk'anelaytok is tzet yetal eb.

⁴⁷Masanilokab conoblak tu' chi k'okch'ennen eb, c'al tzoc'lay cam eb yetok espada. Mak'layokab cam winak unin eb, c'al yix unin eb, cax chi ak'lay tz'a yatut eb.

⁴⁸Caytu' ok yun wak'on c'ayil jun beybalej tu' bay masanil yul is makbej Israel. Axca tu' ok yun nachaj el yuj masanil eb ix ix tol c'am chi beybalnej eb ajmulal.

⁴⁹A cawan eb tu' ok cha wal eb yailal yuj is yajmulalil, c'al yuj is mul eb yin yoc eb ayilal bay comon dios. Caywal tu' ok yun nachaj el e yuj ayex ti', tol ayin ton Jehová Yajaw in, ẍi Cham.