Read Q'anjob'al Ez 24 Bible Online

Ez 24 - Q'anjob'al bible

Ez 24

¹A yet lajoneb c'ual waay yet is lajoneb xajaw, a yet baloneb abilxa joc yin presoal, a yet tu' max k'anjab Jehová ayin, max yalon axca ti':

²Ach anima, tz'ibejcan tzet c'ual, c'al jantak waay xajaw tinani', yujtol a wal yet jun c'ual ti' chi oc reyal Babilonia yak'on owal yin Jerusalén.

³Alcan el jun abix yin tx'oxbanilejal bay jun conob tenomtak tu'. Ala': Ayin Jehová Yajaw in chi wala': A ajtok junok xij yiban k'ak', cax chaon aytok aej yul.

⁴A aytok chibej yul, a ton no' caw wal ochebil, tol bijquiẍtak chi yunej, a wal no xubej c'al no bak'chil yichin chi aytok, yetok no bakil tol caw wal watx'.

⁵Itok junok no calnel caw wal watx', miman si' chi octok yalan jun xij tu', yet watx' chi uki wal sic'libil, masantac'al chi yal tajtok no' bak tu'.

⁶Yujtol ayin Jehová Yajaw in chi wal axca ti': Ok'bal c'ul jun conob tol mak'om cam anima, lajanxac'al axca junok xij tol k'uxtakxac'al. A is k'uxtakilal tu' c'amxa chi eli. Yin junjunal chi yun eon ajtek no chibej tu', c'am cha sic'lej.

⁷Caw wal nojnakxa el jun conob tu' yuj chic' chi puli; manak bay sat tx'otx' max pulay chic' yet chi mukay el yuj pokok; palta tol a yiban ch'en tol c'am tzet yetal ay yiban, a tu' max pulay chic' tu'.

⁸Ok canc'al can juntzan chic' tu' bay yiban jun ch'en tu' wuj, yet watx' txequelc'al yayji, xan chi titc'al yowal in c'ul cax chin paktzejc'al.

⁹Ayin Jehová Yajaw in chi wal axca ti': Ok'bal wal c'ul jun conob tol mak'om cam anima. Ayin caw ok in watx'nej jun miman k'ak'ej.

¹⁰Titokab mimanok si', ocokab k'ak'al; caytu' chi yun taj no chibej tu', masantac'al chi yal tanaj masanil yal, cax chi tz'atok no bak ayaytok yul tu'.

¹¹Lajwi tu', chaon ajtok jun xij tu' yiban k'ak' yin tol c'am tzet ayaytok yul, masantac'al chi yal cakxiq'uil ch'en xij tu' tz'a'i. Caytu' ok yun sakbok el is tz'iltakilal, masantac'al chi yal c'ayaj is k'uxtakilal.

¹²Nabac'al max in c'unbi el wak'on wip; tamwal chi el k'uxtakil tu' yuj k'ak'ej.

¹³A jun k'uxtakil ti', chi tx'oxon el yajmulal conob Jerusalén. Max wak' wip in sakbanen el yobtakilal tu'; palta c'amc'al chi sakbi elok. A tinani' xin, c'amxa tzet watx' chi yun sakbi elok, masantac'al ok yal lajwok wion el yowal in c'ul yin, catatu' ok sakbokcanok.

¹⁴Ayin Jehová in chi wala': Mayal jayoc tiempoal waon oc yailal, manxa ok in mitx' waay in ba. C'amxac'al in yabenc'ulal, tamwal okto na ba in c'ul. Ayin wal caw chi wala' tol ok wawal oc yailal axca wal is mojalil is yob beybalil, ẍi Jehová, cachi, ẍi Cham.

¹⁵Max k'anjab Jehová ayin, max yalon axca ti':

¹⁶Ach anima, yin junnej bek ok wak' cam etbi tol caw wal ay a camc'ulal yin. Palta man ok a tx'oxil a cusc'ulal yuj, tamwal ok ach ok' yuj.

¹⁷Yinc'al ewantakilal ok ab yailal, man ok a pich a ba yetok el pichilej, axca chi yun juntzanxa eb anima. Ayc'al aj k'oxil a jolom, ayc'al oc a xanab ok ach ec'ok. Man ok a makchej a sat yuj a tx'oxon el a cusc'ulal, tamwal ok a lo' loj chi lolay yet ay camich, ẍi Jehová ayin.

¹⁸A yet k'inibalil max in k'anjab yetok eb anima, axa yet yayc'ualil max cam wetbi, axa yet junxa k'inibalil max wunen axca max yal Jehová ayin.

¹⁹Axa masanil eb anima bay conob ti' max alon ayin: Al ayon tzet chi yal elapnok juntzan tzet yetal chon tu' jin, ẍi eb ayin.

²⁰Max walon bay eb: A Jehová max k'anjab ayin, max yalon axca ti':

²¹Al bay eb et israelal: Caywal ti' yalon Jehová Cham Yajaw axca ti': Ok wak' etaxtok in templo, tol chi cam e c'ul e yilon ocok, caw wal che yochej c'apaxok, tol ay wal oc e mimanbilalok, c'al e yipomalok. Yin owal ok mak'lay cam eb e yuninal max cancan bay Jerusalén yin owal, ẍi Jehová.

²²Palta ok e yun c'apax ayex ti' axca tzet chi wunej. Man ok e makchej el e sat yuj e tx'oxon el e yailal, tamwal ok e lo' loj chi lolay yet ay camich.

²³Man ok ex ec' yin tol man makanok e jolom tamwal yin tol c'amoc e xanab. Man ok e tx'oxil e cusc'ulal tamwal e yok'i. Ok paxxac'al e yip yuj e yobtakilal, junjun exxac'al ok ex oc yin cusc'ulalil.

²⁴Ayin ok in oc yin tx'oxbanilejal ayex. A masanil tzet chi wunej, a ok e yun pax ayex ti', a wal yet ok yunen masanil juntzan ti', catawal tu' ok nachaj el e yuj tol a Jehová Yajaw toni, cachi, ẍi Cham.

²⁵Max yal c'apax Cham ayin: A tinani' ok wiel yipomal Israel, a ton in templo, yelxac'al miman chi tzalojbi eb yuj watx'il yili, tol ayoc nabal eb yin, caw wal chi yochej eb. Ok wak' c'apax c'ayil yuninal eb.

²⁶A yet jun c'ual tu' ay junok ok elcan bay tu' ok ul yal yabixal ayach.

²⁷Ac'alto yet tu' ok je' a k'anjab junelxa, xan ok ach k'anjab yetok jun mac ok elcan tu'. Caywal tu' ok yun oc yin tx'oxbanilejal bay eb conob, xan ok nachaj el yuj eb tol ayin ton Jehová in, ẍi Cham ayin.