Read Q'anjob'al Ez 25 Bible Online

Ez 25 - Q'anjob'al bible

Ez 25

¹Max k'anjab Jehová ayin, max yalon axca ti':

²Ach anima, meltzojantok acan bay yetc'ulal eb amonita, cax chalon el in k'anej yin eb.

³Al bay eb: Abek is k'anej Jehová Cham Yajaw; axca ti' yalon Cham: Ayex ti' caw wal max ex aj bulnaj yel e yaw e tzewi, yet max e yiloni tol lanan yetnelaytok in templo, yet lanan yuchlay lajwok conob Israel cax max ilaycantok eb aj conob Judá yin presoal.

⁴Yuj wal tu' xan ok ex waoc yul k'ab eb conoblak ay bay yichcan, yet watx' a eb ok yajawbok yin e tx'otx'al, ok watx'nen aj eb is campamento, c'al cajay eb bay yulak e cajlobal. Ok wajon eb sat e yawoj, c'al yuq'uen eb leche chi yak' e wacax.

⁵Lobal camelloxac'al ok wutcantok conob Rabá, axa e makbej xin ex aj Amón, lobal calnel ok yuncanok. Caywal tu' ok yun nachaj el e yuj tol ayin ton Jehová in.

⁶Ayin Jehová Yajaw in chi wala': A wal ayex ti' ex amonita toxc'a wal max e tzak' e k'ab c'al e canalwi yuj tzalojc'ulal yin e buchoncan el eb israel.

⁷Yuj wal tu' xan, ok wiaj in k'ab yin waon oc yailal e yiban, ok ex waoc yul k'ab juntzanxa nacionlak, yet watx' ok ilay ec' masanil tzetak yetal ay ayex. Ok ex in c'aywal el xol conoblak, ok ex wak' wal lajwok ay yin junelnej. Caywal tu' ok yun e yojtaknen elok tol ayin ton Jehová in, ẍi Cham, cachi.

⁸Ayin Jehová Yajaw in chi wala': A eb aj Moab, c'al eb aj Seir chi yal eb, tol lajanc'al Judá yetok juntzanxa nacionlak.

⁹Yuj tu' xan ok in cha' ayc'ay juntzan conob chi makon bay mojonal Moab, toltax juntzan caw wal watx' yili, ok ayc'ayok, a ton Bet-jesimot, Baal-meón c'al Quiriataim.

¹⁰Cax ok wak'on yunej, tol a conoblak bay yichcan, a' ok ioncan is tx'otx'al Moab yetokc'al is tx'otx'al eb amonita. C'amxa junok nación okto naontek Amón.

¹¹Cax ok waon oc yailal yiban Moab. Caywal tu' ok yun nachaj el yuj eb tol ayin ton Jehová in.

¹²Ayin Jehová Yajaw in chi wala': A Edom ti' max ec' yiban pakon ba yin Judá, xan caw wal miman is mul in satak.

¹³Yuj tu' xan chi wala' tol ok wiwal aj in k'ab yin waon oc yailal yiban Edom. Ok wak' lajwok masanil anima c'al no no' c'apaxok. Caw wal ok wak' uchchajcantok. Ok toktac'al bay Temán, masantac'al bay Dedán; masanil anima ok ak'lay cam yin owal.

¹⁴Ayin wal caw Jehová Yajaw in chi wala', tol a wal in conob Israel ok in k'anbalnej yin in paktzen bay Edom tu'. Ok utlay wal conob Edom tu' yuj, axca wal yayji oc in k'ak'alc'ulal. Caywal tu' ok yun yaben eb tzet ok wut in paktzeni.

¹⁵Ayin Jehová Yajaw in chi wala': A eb filisteo, max pak wal ba eb yin c'am yabenc'ulal yin eb ajc'ul oc yin eb yettax payxa, a ton eb aj Judá. Yin wal mimek yobc'ulalil max yun yak'on lajwok ay eb.

¹⁶Yuj tu' xan ayin caw chi wala' tol ok wiaj in k'ab yin waon oc yailal yiban eb filisteo ti'; ok wak' lajwok eb cereteo yin junelnej, yetokc'al eb aytocan bay tilak a' mar.

¹⁷Caw wal ayxa is may ok wut in paktzen bay eb; yetok wal yowal in c'ul ok waon oc yailal yiban eb. A wal yet ok wunen axca tu', ok yojtaknej wal el eb tol ayin ton Jehová in, chi wun axca tu', ẍi Cham.