Read Q'anjob'al Ez 27 Bible Online

Ez 27 - Q'anjob'al bible

Ez 27

¹Max k'anjab Jehová ayin max yaloni:

²Ach anima, bitnej jun bit yet camich ti' yuj conob Tiro,

³a ton jun conob ay bay ti a' mar, jun tol watx' yak'on yin txon yetok juntzanxa conoblak ay bay tilak a' tu'. Al bay eb: Caywal ti' yalon Jehová Cham Yajaw: A eb aj conob Tiro chi maynej ba eb, chi na eb tol asannej oc is conob eb watx' yili.

⁴A is mojonail bay chi ec' eb, atac'al bay tilak a' mar. Caw wal watx' max yun watx'nen aj eb is barco.

⁵Watx'xac'al max yun watx'ji oc is chemteal, a ton te chemte' taj ibiltek bay jolom witz Senir. Max watx'nelay yoyal yetok te c'ute' chi tit bay Líbano.

⁶A te mak'bal bey barco, watx'nebil yetok te potxji chi tit bay Basán; axa piso max watx'nelay yetok te q'uisis chi tit bay tilak a' aej bay Chipre, tol ayoc marfil yelbubok.

⁷A wal k'ap ayaj can yet chi xulay bey barco, naba lino watx'nebil bay Egipto, ay c'apax oc yelbub yin, ac'al oc an k'ap tu' ayoc yin banderail. A is mantiadoal, a an tx'al morado c'al an yax tx'al ayoc yin an ibiltek bay conob Elisa, bay ti a' mar.

⁸A eb chi mak'on bey barco, aj conob Sidón c'al Arvad eb. Axa eb chi je' tx'umon xin, winak tol caw wal aj nabal, aj Tiro eb.

⁹Ajun eb icham winak aj Gebal tol jelan yin watx'nen bay chi etaxtok barco yetok eb. Masanil eb chi ec' yul barco, chi apni manjok bay conob Tiro.

¹⁰A eb winak aj Persia, aj Lidia c'al eb aj Libia; a eb ayoc is soldadook yin ak'oj owal. A makbal julbal eb, c'al ch'en toctor eb chi locbaj aj eb satlak murallail conob, axcaxac'al tol yelbub yili.

¹¹A eb winak aj Arvad, junej ay eb yetok eb is soldado Tiro, oyan oc eb yin muralla bay yinlak conob tu', axa bay is torre, ay eb winak aj Gamad. A is makbal julbalej eb locan aj bay satlak muralla. Axca tu' caw wal watx'xac'al yili.

¹²A eb aj Tarsis, chi yak' eb ch'en plata, ch'en hierro, ch'en estaño c'al ch'en plomo q'uexelok xiwilxa tzet yetal chi txonlay bay tu'.

¹³Yetok c'apax conob Grecia, Tubal c'al Mesec chi manji eb bay tu'. A tzet chi yak' eb tojolok tzet chi man eb bay tu', a ton eb mosejal, c'al juntzan tzet yetal tol bronce.

¹⁴Yetok c'apax eb aj conob Bet-togarma chi tojlanej eb tzet chi man eb yetok no chej yet mulnajil, no' chi k'anlay yin owal, yetokc'al no mula.

¹⁵A eb anima aj Rodas, c'al bay juntzanxa conoblak bay tilak a' mar, a tzet chi man eb, chi tojlanej eb yetok marfil c'al yetok ébano.

¹⁶A eb aj Edom, xiwilxa tzet yetal max man eb bay tu', max tojlanej eb yetok ch'en granate, yetok an k'ap tol cak yili, an ayoc yelbub, yetok an lino, ch'en coral, c'al ch'en rubí.

¹⁷A eb aj Judá, c'al eb aj israel max manji eb bay tu'. A yetok trigo chi el bay Minit, yetok pastel, yetok no yalcab, yetok aceite, c'al yetok bálsamo max tojlanej eb.

¹⁸Ilab c'apax Damasco, caw wal miman tzet yetal max man bay tu'. Max tojlanej eb yetok vino yet Helbón, c'al yetok lana yet Sahar.

¹⁹A eb aj Vedán, c'al eb aj Javán yul makbej Uzal, max tojlanej eb tzet max man yetok ch'en hierro watx'nebilxa, yetok casia c'al canela.

²⁰Ata bay Dedán chi tit juntzan k'ap can tojol chi oc yiban ẍila no chej.

²¹A eb aj Arabia, yetokc'al masanil eb yajaw yayji bay Cedar max tojlanej tzet max man yetok no yune' calnel, no icham calnel c'al yetok no chiwo.

²²Eb txonjom aj Sabá, c'al eb aj Raama, max tojlanej eb tzet max man yetok perfume caw wal watx', yetok ch'en ch'en manxa watx'ilok yili, c'al yetok ch'en oro.

²³A eb aj conob bay Harán, c'al masanil eb aj Media, a ton eb tu' chi manji bay tu'.

²⁴Chi tojlanej eb tzet chi man tu' yetok pichilej watx' yili, yetok an k'ap púrpura, yetok k'ap tz'isbil oc yelbub, yetok alfombra xiwil is tz'ibil, c'al yetok lasu caw wal watx' tx'umlayi.

²⁵Mimek barco chi ikon ec' tzet yetal chi man eb c'al tzet yetal chi txon eb. Lajan ok yun conob Tiro axca junok te barco caw wal al yikatz chi ec' yiban a' mar.

²⁶A eb chi mak'on bey barco, najattac'al chi yitok eb te' yiban a', axa pax cak'ek' chi tit bay yetc'ulal yichcan, a' chi mak'on poj te' bay yiban a' tu'.

²⁷A yet chi etaxtok te' chi tojcan jantak beyomal, c'al txon, yetokc'al masanil tzet yetal ay, bay yich a' mar. Chi toj c'apax can eb chi ion bey te', yetok eb chi aon oc nipil, yetokc'al eb txonjom, yetok eb soldado, yetok juntzanxa eb ayic' yul te', bay yich a' tu'.

²⁸A eb ayic' tilak a' tu', chi yab eb yel yaw eb mulnajwom yin te' lanan paxay eb yich a'.

²⁹A eb chi mak'om bey juntzanxa te barco, chi aytek eb yul is barco tu'. A eb chi ion bey te' tu', chi oc waan eb ti a' mar.

³⁰Caytu' ok yun yaj wal nuk' eb anima yok' yuj cusc'ulal yuj conob Tiro. Ok yaajtok eb pokok yiban jolom, cax ok balon ec' ba eb xol tik'ak'il tan.

³¹Yuj wali, ok tzukon el eb xil jolom, cax ok pichon ba eb yetok el pichilej, ok ok' eb yin mimek cusc'ulal.

³²Ok bitnelay bit yet camich yiban. Ok al-lay yin cusc'ulalil axca ti': Tzetto wal conobal ok je' lajban ba yetok Tiro, a ton jun conob ak'bil lajwok ay xol a' mar.

³³A wal yet max toj txon bay yiban a' mar, max yitok tzet yetal ay yopiso yuj juntzanxa nación. Caw wal max aj can beyombi eb reyal yulyibank'inal ti' yuj.

³⁴A tinani', mayal lajwi ay yul a' mar. Atac'al bay yich a' max tojcanok; masanil tzetak yetal ibil oc yuj, yetokc'al eb max mulnaj bay, max tojcan eb masanil bay yich a'.

³⁵Masanil nacionlak bay tilak a' mar, toxac'al chi c'ayaj c'ul eb yuj. Eb is reyal eb, toxac'al chi xiwaj eb, txequelxac'al yili oc sat eb yuj xiwc'ulal.

³⁶A wal yet ok yilon oc eb txonjom bay juntzanxa nacionlak, toxac'al ok buchwaj eb yin. Tol ayxamay xiwc'ulalil max lajwi ayok, c'amxa yechel okto ayjok ec'ok, cachi, ẍi Jehová.