Read Q'anjob'al Ez 30 Bible Online

Ez 30 - Q'anjob'al bible

Ez 30

¹Max k'anjab Jehová ayin, max yaloni:

²Ach anima, alil in k'anej axca ti': Caywal ti' yalon Jehová Cham Yajaw: Elokab e yaw yuj jun c'ual

³tol cawilxa ay; a ton is c'ual Jehová cawilxa ay. A jun c'ual tu' k'ektaninak ok yunej, a jun c'ual tu' xiwc'ulalxac'al ok yun bay nacionlak.

⁴Ok jayoc owal yin Egipto, axa Etiopía xin, ok bilaj yuj xiwc'ulal. A yet tu', xiwil eb aj Egipto ok ak'lay camok, c'al yelk'anelaytok is beyomal eb. Ok uchlay ay Egipto masantac'al bay is cimientoal.

⁵A juntzan conob ti', junej ok yun mak'lay cam eb yetok eb aj Egipto, a ton eb aj Etiopía, eb aj Libia, eb aj Lidia, eb aj Arabia, eb aj Cub, c'al yetok junxa conob tol ay trato yetok.

⁶A ton wal juntzan ti' chi wala': A juntzan nación chi colwaj yetok Egipto ok cam yetok xol owal. Ayin wal caw Jehová in chi wala', tol ok ayc'ay is maynejbail Egipto, ok toktac'al bay Migdol masantac'al bay Asuán, ẍi Cham, cachi.

⁷A wal Egipto tu', yelxac'al tz'inini ok yuncan yintak juntzanxa nacionlak, axa is conoblak yelxac'al miman ok yun yetaxcantok yintak juntzanxa conoblak.

⁸A yet ok waon oc k'ak'al Egipto tu', ok lajwok c'apax ay juntzan nacionlak chi colwaj yetok. Caywal tu' ok yun yojtaknen elok tol ayin ton Jehová in.

⁹A wal yet ok apnok oc yailal yiban Egipto, ok in chektok chekbej yiban a' mar yet chi al-lay yab eb anima c'am jabok tzet chi na bay Etiopía, yet watx' chi aj can xiwc'ulal yiban eb. A jun c'ual tu', mayal jayxac'al ocok.

¹⁰Ayin Jehová Yajaw in chi wala': Ayin wal ok wak' yun Nabucodonosor reyal Babilonia, yet ok yak' lajwok ay beyomal conob Egipto.

¹¹A jun tu' ok tok yetok is soldado, tol c'am yabenc'ulal, yet ok yak' lajwok ay eb nación tu'. A yetok espada ok oc eb yin Egipto, toxac'al ok can bulan camnak bay jun nación tu'.

¹²Cax ok wak'on tak c'apax aj a' miman aej Nilo. A yul k'ab eb anima yelxac'al yob, a tu' ok waoc jun nación tu'. Ayin wal caw Jehová in chi wala', tol toxac'al ok lajwokcan ay jun nación tu' yuj eb tx'ok conobal tu', yetokc'al masanil tzet yetal ay bay, ok uchchajcantok.

¹³Ayin Jehová Yajaw in chi wala': Ok wak' lajwok ay juntzan yechelej yetokc'al masanil juntzan comon dios ay bay conob Menfis. C'amxa mac okto yak' yajawilal bay Egipto. Ok wiaj can xiwc'ulal bay masanil yul nación tu'.

¹⁴A bay sur yul yet Egipto ok wak' lajwok ayok, cax ok waon oc k'ak'al conob Soán, cax ok waon oc yailal yiban conob Tebas.

¹⁵Ok in bek wal ay yowal in c'ul yiban conob Sin, a ton yipomal Egipto, cax ok wak'on lajwok eb conob xiwilxa bisil bay Tebas.

¹⁶Ok waoc k'ak'al Egipto, axa eb aj Sin toxac'al ok ec' tx'umumok yuj yail; cax ok ol-lay coj murallail conob Tebas, axa conob Menfis ok ocxac'al can yailal yiban.

¹⁷A eb ach'ej aj conob On, yetok eb aj conob Bubastis ok cam eb xol owal, axa jantakto eb cajyom bay tu', ok ilaytok eb yin presoal.

¹⁸A yet ok wak'on lajwok ay is yipalil Egipto, a ton yipalil chi maynej ba yetok tu', ok k'ekbok yakan c'u yiban conob Tafnes, cax ok tok bac'an jun asun yiban Egipto, axa masanil eb cajyom bay tu', ok tokcan eb yin presoal.

¹⁹Ayin wal ok waoc yailal yiban Egipto. Caywal tu' ok yun yojtaknen el eb tol ayin ton Jehová in, ẍi Cham.

²⁰A yet ukebxa c'ual waay babel xajaw yet 11 abilxa joc yin presoal, a yet tu' max k'anjab Jehová ayin, max yaloni:

²¹Ach anima mayal in mak' k'aj k'ab reyal Egipto. Tok ay mactxel chi anteni, tamwal ay mac chi c'alban oc yalan is ti', yet chi watx'ji ocok, cax chito je' k'anbalnen is yespada yetok.

²²Yuj tu' xan chi wal ayin Jehová Yajaw in ti': Tol ajc'ul in oc yin reyal Egipto; ok in mak' k'aj k'ab tu' cabil, jun watx'to yetok jun k'ajilxac'alta'a. Caywal tu' ok yun bekon el is yespada.

²³Ok in saklemnejtok eb anima aj Egipto bay xolak juntzanxa nacionlak. Sakleminakxac'al ok yun tojcan eb.

²⁴Ok wak' wal yipal is k'ab jun reyal Babilonia tu'. Ayin ok waoc wespada yul is k'ab, palta ok in mak' k'aj is k'ab reyal Egipto cabil. Caw wal ok k'akwok satak yajc'ul tu', axcaxac'al k'akwi junok lananxa cami.

²⁵Ok wak' yipal k'ab reyal Babilonia, cax ok wion el yip k'ab reyal Egipto. Ok waon oc wespada yul is k'ab reyal Babilonia, a wal jun tu' ok aj wan yin Egipto. Caytu' ok yun yojtaknen elok tol ayin ton Jehová in.

²⁶Ok in saklemnejtok masanil eb aj Egipto xolak conoblak c'al nacionlak. Caywal tu' ok nachaj el yuj eb tol ayin ton Jehová in, ẍi Cham.