Read Q'anjob'al Ez 33 Bible Online

Ez 33 - Q'anjob'al bible

Ez 33

¹Max k'anjab Jehová ayin, max yaloni:

²Ach anima, al bay eb et animail, tol ayin chi wal axca ti': A yet chi waontek owal bay junok nación, a eb anima bay tu', chi siq'uil eb junok mac chi oc yin makwajwomal.

³A yet chi yilon jun makwajwom tu', tol lanan jayoc eb soldado ajc'ul, cax chi xuon is bocina yuj colon ba eb anima tu'.

⁴Palta ta ay junok c'am chi col ba yet chi yaben yok' bocina tu', axa chi yunej chi mak'lay cam jun tu' yuj eb ajc'ul, ac'al oc max yitek is camichal yiban.

⁵Max yab wal xulay bocina tu', asan tol maj yikej colon ba yetok masanil eb yet animail. Yuj tu' xan ac'al oc max yitek is camichal tu' yiban. Matawal max col ba, maj mi camok.

⁶Palta tatol a jun makwajwom tu' chi yil tit eb ajc'ul, cax c'am chi xu pax is bocina; axa yoc eb ajc'ul tu', cax ay mac chi cam yuj eb, a eb chi cam tu', chi cam eb yuj is mul, palta yowalil chi wak' yowalil bay jun makwajwom tu' is camichal eb, ẍi Jehová, cachi.

⁷Ach anima, ach max ach waoc yin makwajwomal bay eb et conob. Ach ok a cha in k'anej, cax ok alon bay eb.

⁸Ta ok wal ayach yuj junok yobtakwom tol t'inan ok camok, palta ach ti', c'am chal pax bay yet chi na ba c'ul, manak tu', a jun tu' ok cam yuj is mul, palta ok wak' yowalil ayach yuj is camichal tu'.

⁹Palta ta chal bay, yet chi na ba c'ul yin is yobtakil, cax c'am chi cha yabej, ok cam yuj is mul, palta ach ti', c'am tzet chi lowcan en, ẍi Jehová.

¹⁰Max yalon c'apax Jehová ayin: Ach anima, al bay jun conob ti' axca ti': Ayex ti' che yala': Caw wal xiwil co yobtakilal, yuj tu' xan lanan pax jip yuj co mul. ¿Tzetto wal ok yun jiquisbi ec'ok? quex chi.

¹¹Palta al bay eb tol ayin Jehová Yajaw in chi wala' tol c'am chi wochej chi cam eb yobtakwom. A wochwan tol chi q'uex eb is beybal cax chi iquisbic'al ec' eb. Ex israel bekekcan e yob beybalil tu', ¿tzet yuj xan ok ex camok? ẍi Cham, cachi.

¹²Ach anima, al bay eb et conob axca ti': Ta ay junok winak watx' is beybal cax chi oc is mul, man ok colchaj yuj is watx' beybalil yet yalantok tu'. Ta ay c'apax junok winak yelxac'al yob is beybal, cax chi naon ba c'ul cax chi yunen watx'il, man ok cam yuj is yobtakil yet yalantok. Axa pax junok watx' is beybal xin, cax chi oc pax is mul, a is watx' beybalil yet yalantok tu', c'amxa yelapnok yet chi iquisbic'al ec'ok.

¹³Ta ayin chi wak' in ti' yin is yiquisal junok anima watx', ta a jun tu' chi yaoc is watx' beybal tu' yipok c'ul, axa chi yunej chi oc pax is mul, c'amxa yelapnok is watx'ilal yet yalantok tu', asan tol ok cam yuj is mul mayal yaocok.

¹⁴Ta chi waxac'al oc camich yiban junok yobtakwom, axa jun tu' chi na pax ba c'ul, chi bekon yunen masanil yobtakil cax chi yunen watx'il.

¹⁵Chi yak'on meltzoj majanbilal tumin bay junok chi oc majan bay. Ta ay tzet yetal elk'anebil yuj, chi yak'on meltzojok; cax chi yiken leyalil chi on yiquisbi ec' eb anima. Wal yel, a jun tu' manto ok camok.

¹⁶Yujtol watx'xa tzet chi yunej, a jun tu', ok iquisbokc'al ec'ok, manxa ok in natek is yobtakil max yun yet yalantok tu', cachi.

¹⁷A eb et conob tu' chi yal eb tol man watx'ok chi wut in beyc'ulal; palta wal yel a eb, man watx'ok tzet chi yunej.

¹⁸Ta a junok anima chi bekcan yunen watx'il, axa yobtakil chi yunej, a jun tu' ok cam yuj tzet chi yun tu'.

¹⁹Palta ta a junok caw wal yobtakwom chi na ba c'ul, cax chi bekoncan is yobtakil tu', axa watx'il chi yunej, okto iquisbok yuj is watx' unbenal tu'.

²⁰Ac'ala' che yalon pax ayex ti' axca ti': A Jehová man tojolok chi yut is beyc'ulal, quex chi. Palta ayin ti', yin junjunal chi yun ex in beyc'ulnen el ayex israel ex ti', atac'ala' e yunben, ẍi Jehová, cachi, ẍi Cham.

²¹A yet oyeb c'ual waay yet is lajoneb xajaw yet lajcaweb abilxa joc yin presoal, ay jun winak maxax elaj bay Jerusalén, max jayoc ul yalon ayin tol mayal ayc'ay jun conob tu' yuj eb ajc'ul.

²²A yet k'ekbintakil yet ewi, yet c'amto chi jayoc nak max elaj tu', mayal yaoc Jehová is k'ab wiban. Axa yet k'inibalil yet max jayoc jun winak tu', a yet tu' max yak'on Jehová in k'anjab aj junelxa.

²³Max k'anjab Jehová ayin max yaloni:

²⁴Ach anima, a eb anima cajan bay conoblak uchbiltok yul yet Israel, chi yal eb: A Abraham junnej nail yayji, palta max cha jun tx'otx' tx'otx' ti' is satakok. Palta ayon ti' tinani', xiwilxa co beyi; yuj tu' xan jet-xa ton yayji oc tx'otx', ẍi eb.

²⁵Yuj tu' al bay eb: Axca ti' yalon Jehová Cham Yajaw: Ayex ti' che chi' no chibej yetokc'al is chiq'uil. Chex oc ayilal bay yechelej, chex mak'wi cam anima, chito wal e na' e yion jun tx'otx' ti'.

²⁶Che yetnej eb e yet animail yuj ay e yespada. Che yunen tzet yetal tol yajbejtak, chex mulji yetok eb ix ix ay yajaw. Chi lajwi tu', cax che yalon pax ajok tol e yet-xac'al yayji oc jun tx'otx' ti', quex chi, ẍi Cham, cachi.

²⁷Chalon c'apax bay eb: Axca wal ti' yalon Jehová Cham Yajaw: Ayin wal caw chi wala', tol ok mak'lay cam eb cajan bay conoblak uchbiltok. Axa eb cajan bay najattak elok, a no chiwajwom no' xolak te' ok chiontok eb. Axa eb chi ayji ec' bay yulak nach'en, ilya' ok on cam eb.

²⁸Cax ok cancan jun tx'otx' tu' yin tz'inanil, axa yetaxcantok tu'. Cax ok wak'on lajwok ay is maynejbail yuj yip tu'. Tz'inan tx'otx'xac'al ok yuncan mimek witz bay conob Israel, c'amxa mactxel ok ec' bay tu'.

²⁹A yet ok waoncan jun tx'otx' tu' yin tz'inanil yuj is mul eb tol yajbejtak chi yunej, catatu' ok nachaj el yuj eb tol ayin ton Jehová in, ẍi Cham, cachi bay eb.

³⁰Ach anima, a eb et conob tu' chach yak' binaj eb yet chi chalen ba eb bay murallail conob, ma bay tilak na, cax chi tz'ak yal-len eb bay junjun axca ti': Tonek, ton jabek k'anej Jehová, ẍi eb.

³¹Axca tu xin chi jayoc eb in conob tu', axca chi yunc'alta' eb, cax chi ay chotan eb a satak yin yaben eb tzet chala', palta c'am chi yikej eb beybalneni. A ti' yet eb, asan tzet yetal chi cha' c'ul eb, a' chi yunej, axa is nabal eb xin, ayoc eb naon yion tzet yetal yin yobal.

³²Ach ti' lajan ach yuj eb, axca junok mactxel tol caw wal watx' bitni, tol watx' yoc yul is nuk', cax watx' txalon arpa. Chi yab eb a k'anej palta c'am chi beybalnej eb tzet chala'.

³³Palta xin, a masanil tzet chal tu' ok yunej; a yet ok yunen masanil juntzan tu', catatu' ok nachaj el yuj eb tol ay jun in chekbej xol eb, ẍi Cham.