Read Q'anjob'al Ez 39 Bible Online

Ez 39 - Q'anjob'al bible

Ez 39

¹Ach anima, alil in k'anej bay Gog, cax chalon bay: Caywal ti' yalon Jehová Cham Yajaw: Ach Gog, yajaw ayji yin Mesec, c'al yin Tubal; ajc'ul in oc en.

²Ayin ti' ok wikbaj onej, cax ok ach wak'on tit bay najat bay norte, caytu' ok yun a jayoc bay siquilal tx'otx' yet Israel.

³A bay tu' ok in mak'il jun julbalej ayoc yul a q'uexan k'ab, c'al juntzan flecha ayoc yul a watx' k'ab, ok in mak' c'apax elok.

⁴Axa ach ti', yetok eb a soldado, c'al juntzan nacionlak ajun etok, ok ex cam bay jolomlak witz yul yet Israel. A bay tu' ok ex wak' bay no ostoc, c'al bay masanil pojanil no chiwajwom no'. A no' tu' ok ex chiontok.

⁵Toxac'al ok ex can bulan bay mulnajbal tx'otx'. Ayin wal caw Jehová in chi wak' in ti' yin jun ti'.

⁶Ok watok k'ak'ej bay yiban Magog, yetokc'al yiban masanil anima cajan yin junc'ulalil bay tilak a' mar. Caywal tu' ok yun yojtaknen el eb tol ayin ton Jehová in.

⁷Ok in tx'ox bay in conob Israel tol asannej in ocok, manxa ok yal in c'ul tol ok in intaknelay elok. Caywal tu' ok yun yojtaknen el nacionlak tol ayin ton Jehová in, is Diosal in Israel, asannej in ocok.

⁸A jun c'ual chi wal ti', lananxa jayi, ayin wal caw Jehová in chi wala' tol yowalil ok yunej, ẍi Jehová, cachi.

⁹Lajwi tu', a masanil eb cajyom bay conoblak yul yet Israel, ok eltek eb wajon masanil arma, yuj k'anon yin sial, a ton masanil pojanil makbal julbalej, yetok julbalej coc'al lanza, c'al mimek lanza, a ton juntzan tu' ok oc siok eb yin ukeb abil.

¹⁰Manxa yowalilok ok eltok eb wajoj si', tamwal toj tzoc'on eb si' bay xolak te', yujtol a masanil juntzan arma tu', a' ok k'an eb siok. Ayin wal caw Jehová in chi wala', tol axca tu' ok yun yion ec' eb is tzetak yetal eb max ion ec' yet eb yet yalantok.

¹¹A yet jun c'ual tu' ayin ok wak' bay ok mukay Gog yetok is soldado yul is makbej Israel, a ton jun jobe bay chi ec' eb ec'jabwom, bay sataktek a' mar. A bay tu', c'amxa mac ok ec'ok, yujtol a bay tu' ok mukay Gog yetok masanil is soldado; cax ok yikoncan aj jobeal yet is ejército Gog.

¹²Ukeb wal xajaw ok yak' eb israel yin mukoj camnak tu', catatu' ok q'uischaj aj bay yul is makbej.

¹³Masanil anima ok colwaj yin mukoj camnak. Ayin wal caw Jehová Yajaw in chi wala', tol caw wal binajbil ok yuncan xol conob Israel jun c'ual yet ok in tx'oxon el in mayk'ak'al.

¹⁴A yet mayal lajwi ec' ukeb xajaw tu', ay junxa bulan winak ok tojlanelayok yuj yec' yilon yulak makbej tu' masanil, yet chi mukon eb masanil mimanilej telton ba can ay bay tu'. Caywal tu' ok yun q'uischaj aj bay yul is makbej eb.

¹⁵A yet ok ilchaj bakil camnak yuj eb chi ec' sayon tu', ok yacan aj eb junok yechel, axa yet chi jay eb chi mukon camnak tu xin, a eb ok iontok mukon bay chi yik jobeal yet is yejército Gog.

¹⁶Yetok c'apaxok, a jun conob ay bay tu' ok yik Jun Ejército. Caywal tu' ok yun q'uischaj aj yul makbej Israel tu' yuj eb, ẍi Jehová.

¹⁷Max yalon Jehová Cham Yajaw ayin: Ach anima, al bay masanil no ostoc, c'al bay masanil no chiwajwom no': Titokab no' bay juntzanxa nacionlak, cax wajokab ba no' bay siquilal tx'otx' yul yet Israel, axca tol ok in watx'nej junok miman xajanbal yet chi low no'. Ok je' chion no' chibej, c'al yuq'uen no' chic'.

¹⁸A chibejal eb soldado ok chi no', c'al chiq'uil eb yajaw yayji bay sat tx'otx' ti', a ok yuc' no'. Ok chilay eb axca chi yun no icham calnel, c'al no yune' calnel, no chiwo c'al no bak'ech wacax chi tit bay Basán.

¹⁹A jun xajanbal ok in watx'nej tu', ok chi no' sebo masantac'al ok yal yaban ay no'. Ok yuc'c'al no' chic' masantac'al ok oybok no' axca eb uq'uem an.

²⁰Ayin wal caw Jehová in chi wala', tol a jun miman loj ok in watx'nej tu', a ton is chibejal no chej, c'al yetok yet eb soldado ayoc yiban no', masantac'al chi yal noj c'ul no'.

²¹Caywal tu' ok yun in tx'oxon in mayk'ak'al satak juntzan tx'ok nacional. Masanil nacionlak ok ojtaknen elok, tzetbil chi yun in beyc'ulnewi c'al waon oc yailal yiban eb.

²²Ataxc'al yet jun c'ual tu', c'al yet chi beyc'altok, a Israel ok yojtaknej wal elok, tol ayin ton Jehová in is Diosal eb.

²³Masanil juntzanxa nación ok yojtaknej elok tol a eb israel max toj eb yin presoal yujc'al is yobtakil, yujtol caw wal tenomtak max yut ba eb ayin, xan max in el tx'uman bay eb, max in bekoncan eb bay eb ajc'ul, axca tu' max yun yayc'ay eb, c'al mak'lay cam eb bay xol owal.

²⁴Max wut wal eb axca is mojalil is yobtakil eb, c'al is tenomtakilal eb, yuj tu' xan toxac'al max in el tx'uman bay eb.

²⁵Yuj tu' xan ayin wal caw Jehová Yajaw in chi wala': A tinani' ok in yabenc'ulnej wal conob Israel ti', a ton eb yinatil Jacob. Ok wion aj can eb junelxa, yet chin binaj yin watx'il, tol asannej in ocok.

²⁶A yet ok cajay eb junelxa bay is tx'otx'al, c'amxa tzet ok na eb, tamwal ay mac ok xibten eb. Cata wal tu' ok q'uixwok aj eb yuj tenomtakil, c'al yobtakil max yun eb ayin.

²⁷A yet ok wion eltek eb bay yulak tx'otx'al eb is yajc'ul eb, c'al in wajban oc eb junelxa, caywal tu' ok yun txecloj el yin eb, satak xiwil nación tol asannej in ocok.

²⁸Ayin max in chektok eb yin mosejal bay juntzan tx'ok nacional, ac'ala' ayin ok in wajbajtek eb junelxa bay is tx'otx'al. C'amxa junok eb ok cancan bay tu'. Caywal tu' ok yun yojtaknen el eb, tol ayin ton Jehová in is Diosal in eb.

²⁹Ayin wal caw Jehová in chi wala', tol manxac'al ok in el tx'uman bay eb junelxa, yujtol ok waoc Wespíritu yin conob Israel ti', ẍi Cham.