Read Q'anjob'al Ez 4 Bible Online

Ez 4 - Q'anjob'al bible

Ez 4

¹Max yalon c'apax Cham ayin axca ti': A tinani' ach anima, iaj junok tx'otx' xan, cax chaon ay a satak, cax cha tz'iben ay yechel conob Jerusalén yin.

²Chi lajwi tu', chaon oc oyan yechel mitx'k'abej yet chi yoymanej conob axca yaliẍ muralla yinlak, yetok campamentolak c'al walubej,

³cax chaon c'apax oc junok ch'en sam a nan a xol yetok jun conob tu'. A jun tu', lajan axca junok muralla, cax chach oc satak jun conob tu', axq'uijanxac'al tol lanan ak'on owal yin. Caywal tu' ok yun yoc tx'oxbanilejal bay eb et conob Israel.

⁴Lajwi tu', ok ach ay telan bay yetc'ulal a q'uexan, caytu' ok yun aon oc yailal eban yuj is mul eb et conob. Ac'al bay jun a tz'eyil tu' ok ach ayc'al telanok yak'ban ayoc yailal eban yuj is mul eb.

⁵390 c'ual ok yun jun tu', chi yal elapnok junjun c'u yin junjun abil, ok yab yail eb aj conob Israel yuj is mul tu'.

⁶A yet ok lajwok jun tiempoal tu xin, axa pax bay yetc'ulal a watx', ok ach ay telanok. Caywal tu' ok yun yoc paxcan yailal eban yuj is mul eb aj conob Judá yin cawinak c'ual, junjun c'u yin junjun abil ok yab yail eb yuj is mul.

⁷Ok ach tok pax t'anan yin yechel Jerusalén bay oyanxac'al oc eb ajc'ul yin; cha balon octok a pichil yin a k'ab, cax cheon aj a k'ab tu' can, axa a k'anjab el yin jun conob tu' wuj.

⁸Axca tol ok ach in c'albaj ay yetok lasu, yet watx' c'am chi je' a meltzojtakbi masantac'al ok tz'aknaj c'ual yin a tx'oxon el yailal tu'.

⁹A yet c'amto chach c'al-lay tu', cax cheon c'apax aj janic'ok ixim trigo, cebada, mijo c'al avena yetok c'apax avas c'al an lenteja; soman chi yun yaytok yul junok xij. A yetok juntzan tu' cha watx'nej a lobej. A ton wal juntzan tu' ok a lo' yin 390 c'ual, yak'ban yet telan ach ay bay yetc'ulal a q'uexan.

¹⁰Echej nanok libra cha lo' junjun c'u, txequelc'al yorail chach lowi.

¹¹Txequel c'apax ay yorail yet choq'uen nanok litro aej yet junjun c'u.

¹²A jun a lobej tu' cha watx'nej, axca chi yun watx'ji ixim pan cebada. Satak eb anima tu' ok ak' taj ixim xol k'ak', a tza' eb anima ok a k'an a siok, ẍi Jehová.

¹³Lajwi tu', max yalon c'apax Jehová: Ok a lo juntzan a lobej man watx'ok satak ley tu', yuj a tx'oxon elok tol caytu' ok yun loon eb et Israelal loj man watx'ok satak ley bay juntzanxa nación bay ok in saklemnejtok eb, ẍi Cham.

¹⁴Axa in tak'wi bay Cham axca ti': C'amak Mamin Jehová, caw wal c'am bay chin mitx' junok tzet yetal man watx'ok satak ley. C'am bay chin chi' chibejal junok no no' tol toc'al chi camajok, tamwal no' chi mak'laycan cam yuj no chiwajwom no' xolak te', tamwal junok makan chibej tol man watx'ok yayji, quin chi.

¹⁵Axa yalon Jehová ayin: Chi je' a tza' no' wacax cha k'an yin sial xin, q'uexelok tza' eb anima tu', yet cha watx'nen a lobej tu', ẍi Cham.

¹⁶Max yalon c'apax Cham ayin: Ok wak' lajwok aj loj bay Jerusalén. Echebilxac'al ok yun lobej eb, c'al yuc'a' eb, xan a yet ok low eb tu' c'al yuq'uena' eb tu', yinxac'al bilc'ulal, c'al xiwc'ulal ayoc eb.

¹⁷C'amxa aej, c'al lobej eb, toxac'al ok c'ayaj c'ul eb yuj tzetbil yili oc junjun; yuj wal is mul eb xan yinxac'al c'ojanc'ulal ok yun lajwok ay eb, ẍi Jehová.