Read Q'anjob'al Ez 44 Bible Online

Ez 44 - Q'anjob'al bible

Ez 44

¹A jun winak tu', max quin yipaxtok junelxa bay puertail templo bay yina, bay yetc'ulal yichcan. Max wiloni tol makan jun puerta tu'.

²A bay tu' max yal Jehová ayin: A jun puerta ti', ok canc'al makanok; c'am yechel ok jakayok. C'am mactxel ok je' yoctok bay, yujtol a bay jun tu' max in octok ayin is Diosal Israel in ti'.

³Asan is yajawil conob chi je' yapni oc low bay tu' yet chi chi' junok xajanbal in satak. A tu' chi ca yoctok bay tenta bay amak', ac'ala' a tu', chi ca yel paxtok bay tu' junelxa, ẍi Cham.

⁴Lajwi tu' max quin yiontok jun winak tu' bay puerta ay bay norte, bay satak templo. Max wiloni tol max nojil yul templo yuj is mayk'ak'al Jehová. Caywal tu' max yun way paknaj bay sat tx'otx'.

⁵Cax max yalon Jehová ayin: Ach anima, chi cam wal eloni, c'al aben is leyalil jun templo ti'. Ok cam wal eloni, mactxel ok je' yoctek yul jun templo ti', c'al yeltok.

⁶Al bay jun conob tenomtak tu': Caywal ti' yalon Jehová: Bekek beybalej yajbejtak, ex conob Israel.

⁷Ayex ti', max e yetnej el in templo. Comonxac'al max e cha octok eb tx'ok conobal yul, a ton juntzan anima tol c'amoc yechel in trato yin is nabal c'al yin is mimanil. Max e yetnejtok yin e yak'on ixim loj, c'al seboal no no' yin xajanbalil, c'al chiq'uil no xajanbal tu', palta man lananok e yiken in trato.

⁸Caw wal tol maj e yikej in chekbanil yin xajanbal, palta tol max e yacan oc e yopiso tu' yul k'ab eb tx'ok conobal, cachi.

⁹A yuj tu' xan ayin Jehová in ti' chi wala': A bay in templo, c'amxa yechel ok octok junok tx'ok conobal tol c'amoc yechel in trato yin is nabal, c'al yin is mimanil, tamwal eb tx'ok conobal cajan ec' e xol.

¹⁰A eb levita tol max el in c'atan, yet max el masanil yet israelal eb ayin, a ton yet max toj eb yin ayilal bay tzet chi al-lay oc diosal, ok yi eb tenchebalil yuj is yobtakilal tu'.

¹¹Chi je' yoc eb yin yak'on serbil taynen puertail in templo, c'al yin junokxa ak'oj serbilal bay templo tu'. Chi je' mak'on cam eb no xajanbal bay in templo, a ton no' chi yak' eb conob yin ofrendail. Yowalil bekanokab c'ul eb yin yak'on serbil eb yet conob.

¹²A yet yalan, max ak'wi serbil eb yet conob yin ayilal bay tzet chi al-lay oc diosal. Caywal tu' max yun yikban eb yet israelal yin yobtakilal. Yuj wal tu' xan ayin wal caw Jehová Yajaw in chi wak' in ti', tol ok yi eb tenchebalil yuj is mul tu'.

¹³C'am chi je' yoc eb yin ak'oj serbil in satak yin sacerdoteal, tamwal chi mitx' eb tzet yetal miman yelapnok, tamwal tzet yetal tol wet yayji. Yowalil ok jayoc yiban eb yin yel q'uixwil yuj is yobtakilal eb max el yuneni.

¹⁴A tinani' xin, ok waoc eb yin comon mulnajil yin ak'oj serbilal bay in templo, yet watx' ok yil eb masanil mulnajil bay tu'.

¹⁵Palta a eb sacerdote levita, yinatil Sadoc, a eb tu' max in yak'c'al serbil eb, caxc'al mi a eb yet israelal max poj pax el ba eb yin in chekbanil, xan ayin wal caw Jehová Yajaw in chi wala', tol asan eb tu' chi je' jayoc in satak yin quin yak'on serbil. Chi je' yoc eb in satak yin yak'on seboal no no', c'al chiq'uil no' yin xajanbalil ayin.

¹⁶Chi je' c'apax yoctok eb yul in templo, chi oc eb bay altar yin quin yak'on serbil eb. Asan eb chi ilon in mulnajil bay tu'.

¹⁷A yet chi octok eb bay puertail yet is cab amak', yowalil chi yaoc eb is pichil lino. A yet ayoc eb yin yopiso bay tu', ma bay templo c'am chi yaoc eb is pichil tol lana.

¹⁸Yowalil ayaj lino k'oxilok jolom eb. Yowalil lino c'apax is calzoncillo eb ayocok. C'amokab chi c'al eb nan, yet watx' c'am chi el yal eb.

¹⁹A yet c'amto chi eltek eb bay babel amak', bay ayic' eb yet conob, yowalil chi yican el is pichil chi k'an yin yopiso bay yul templo tu', cax chi cancan yul juntzan cuarto bay yul tu'. Axa junokxa pichil eb chi yaocok, yet watx' c'am chi occan is ay is mayil jun pichilej tu' yin eb ayic' tu'.

²⁰C'am chi tzukxac'al el t'iran eb is jolom, tamwal chi chaxac'al ch'ibtok eb is xil, txennejc'al chi yun tzuklay elok.

²¹C'am junok sacerdote chi yuc' vino yet chi octok bay yet is cab amak'.

²²C'am chi je' yion eb eb ix ix camnakxa yichamil, ma bekbilcan yuj yichamil; palta asan junok ix k'opoj ix Israel, ma junok yistzil junok camom sacerdote, chi je' yion eb.

²³A eb sacerdote tu', yowalil chi cuywaj eb bay in conob yin yojtaknen eb tzet yetal sic'bil el wuj, c'al tzet yetal man sic'bilok el wuj, yin tzet yetal watx', c'al tzet yetal man watx'ok, atac'ala' ley.

²⁴Ac'ala' ta ay bay chi oc owal, a eb chi beyc'ulnen elok atac'ala' yalon in ley. Chi yiken eb leyalil juntzan in k'in, cax chi yiken eb jun c'ual xewilal tol wet yayji ocok.

²⁵C'am bak'in tol chi mitx' eb junok mimanil camnak, yet watx' c'am chi yetnejtok ba eb satak ley. Asannej ta a' is mam eb, ma is txutx eb, ma a' junok is c'ajol eb, ma is cutz'in eb, ma junok yuẍtak eb, ma junok yanab eb tol c'amto yichamil cax chi cami, chi je' mitx'on eb.

²⁶Lajwi tu' yowalil chi sakbanej ba eb, atac'ala' ley, cax c'am chi oc eb mulnaj yul templo ukebok c'ual.

²⁷A yet ok ocpaxtok eb bay yul templo yet chi yiken eb is yopiso junelxa, ayin wal Jehová in chi wala', tol yowalil chi yak' eb junok xajanbal yuj tancan el is yobtakil eb.

²⁸C'amc'al junok satak eb sacerdote chi yi bay e conob, axca tol ayin, ayin oc is satakok eb.

²⁹A is lobej eb sacerdote a ton tzet yetal chi ak'lay ayin yuj eb yet conob, yetokc'al no xajanbal chi ak'lay ayin yuj yak'on tan yobtakilal, c'al yuj tojlabalok mulej, yetokc'al masanil tzet yetal chi yak' eb yet israelal ayin. A juntzan tu' yetc'al eb yayji ocok.

³⁰Yetok c'apaxok, a eb sacerdote tu', a wal babel sat awoj caw wal watx', yowalil chi cha' eb, yetokc'al masanil ofrenda. A yet ok e watx'nen ixim pan, a wal ixim caw wal watx' ok e yak' bay eb, yet watx' chi wak' in watx'c'ulal e yiban.

³¹A eb sacerdote tu', c'am chi je' chion eb junok no tz'iquin, ma junokxa no no' tol toc'al chi camajok, ma toc'al mak'bil cam yuj no chiwajwom no'.