Read Q'anjob'al Ez 46 Bible Online

Ez 46 - Q'anjob'al bible

Ez 46

¹Ayin wal caw Jehová Yajaw in chi wala': A jun puertail yet is cab amak' bay yetc'ulal yichcan, a yin wakeb c'ual mulnajil, yowalil tol makanc'al, asan yet c'ual xewilal chi jakayi, yetok yet c'ual yet unin xajaw.

²A yet chi yak'on jun yajaw yayji junok xajanbal, a tu' chi octok bay babel amak', cax chi ocapnok bay tenta bay yetc'ulal yichcan. A tu' chi oc waan bay marcoal puerta, yak'ban jun sacerdote lanan yak'on tz'a no xajanbal, yetokc'al no xajanbal yet junc'ulalil chi yak' jun yajaw tu'. Axa jun tu xin, chi oc yin ayilal ayin bay yakantak puerta tu'. Chi lajwi tu' cax chi el bay tenta tu'. C'amxa chi makay puerta tu' masantac'al yet yayc'ualil.

³Axa yet c'ual xewilal, yetokc'al yet unin xajaw, yowalil chi oc eb conob yin ayilal ayin, a ton bay satak jun puerta tu'.

⁴A no no' yowalil chi yak' jun yajaw yayji tu' yet c'ual xewilal, yet chi ak'lay tz'a no' yin xajanbalil ayin, wakc'on no ach'ej calnel, yetok jun no icham calnel tol c'am jabok is tacnakil no' yukc'onal.

⁵Yowalil chi yak' 20 litro ixim harina yetok no icham calnel tu'. Axa yetok no ach'ejtak calnel xin, atac'ala' jantak chi el yin c'ul yak'oni. A yin jun 20 litro ixim harina tu', chi ak'lay c'apax nan is can litro aceite.

⁶Axa yet c'ual yet unin xajaw xin, yowalil chi yak' junok no ach'ej wacax, yetok wakc'on no ach'ejtak calnel, yetok jun no icham calnel. A masanil no' tu', c'amc'al is tacnakil.

⁷A yetok jun no ach'ej wacax tu', chi ak'lay 20 litro ixim harina. Cay c'apax tu' chi yun yak'lay yetok junjun no icham calnel. Axa pax yetok no ach'ej calnel tu xin, yalc'al jantak chi el yin c'ul yak'oni. Axa yetok junjun 20 litro ixim harina tu', chi ak'lay nan is can litro aceite.

⁸A yet ok octek jun yajaw yayji tu', a tu' ok octek bay tenta, ac'ala' a bay tu' ok ca yel c'apaxtok.

⁹A yet chi octek eb conob yin ayilal ayin yet k'in, yowalil chi yun eb axca ti': A mactxel chi octek bay puerta bay norte, axa bay puerta bay sur chi ca yeltok. Axa mactxel a bay puerta bay sur chi oqui, axa bay puerta bay norte chi ca yeltok. C'am junok chi meltzoj eq'uel junelxa bay puerta bay max oqui, palta tol axa bay puerta bay satak chi eli.

¹⁰A jun yajaw yayji tu', yowalil chi octek yetok eb conob, cax chi el paxtok yetok eb.

¹¹A yin mimek k'in, c'al c'ual wajayil chi ak'lay 20 litro ixim harina yin junjun no wacax. Cay c'apax tu' chi ak'lay yin junjun no icham calnel. Axa pax yin junjun no ach'ejtak calnel xin, yalc'al jantak chi el yin is c'ul eb yak'oni. A yetok junjun 20 litro ixim harina tu', chi ak'lay c'apax nan is can litro aceite.

¹²A yet chi el yin c'ul jun ayoc yajawilal tu' yak'on junok xajanbal ayin, axca junok no no' chi ak'lay tz'aok ma junok no' chi ak'lay yin yet junc'ulalil, yowalil chi jaklay puerta bay yetc'ulal yichcan, cax chi yak'on xajanbal, axca wal chi yak' yet c'ual xewilal. Axa yet mayal eltok xin, cax chi makaycan jun puerta tu'.

¹³Junjunc'al c'u yet k'inibalil, yowalil chi ak'lay junok no calnel jun abil is k'inal, tol c'am jabok is tacnakil, yet chi ak'lay tz'a no' yin xajanbalil ayin.

¹⁴Junjun k'inibalil chi ak'lay junok ofrenda ayin. Ukeb litro ixim harina, yetok jun litro aceite chi seclay ay bay yiban ixim harina. A jun ti', yowalil chi ikelay yin tojbalk'inal.

¹⁵A junok ach'ej calnel yetokc'al ofrenda yin ixim harina, c'al aceite, yowalil chi ak'lay tz'a yet junjun k'inibalil.

¹⁶Ayin wal caw Jehová Yajaw in chi wala': Ta a mac yajaw tu' chi sa' tx'otx' bay yuninal, a ton is satak tol yet, a jun tu' chi occan yin satakejal bay yinatil.

¹⁷Palta ta a junok yajaw tu' chi sa' tx'otx' bay junok is yak'omal serbil chi sataknej, masantac'al yet chi jayoc abil yet bekbanilal. A yet tu', chi oc pax jun tx'otx' tu' is satakok jun yajaw tu' junelxa, axa can tx'otx' sataknej eb yuninal tu'.

¹⁸A jun yajaw tu', c'am yikbej tok'on ec' is satak junokxa mactxel. A tzet yetal yet, a' chi yak' sataknej yuninal. Axca tu xin, c'am mactxel xol in conob chi cancan yin tol c'am is satak, ẍi Cham.

¹⁹Lajwi tu xin, max quin yiontok jun winak tu' bay chon octok bay jun pac' puerta, bay juntzan cuarto yet eb sacerdote chi can bay yetc'ulal norte. Cax max tx'oxon ayin bay yetc'ulal yayub c'u bay yintak.

²⁰Max yalon ayin axca ti': A ton cayti' yowalil ok txic eb sacerdote no no' chi ak'lay yin xajanbalil yuj yak'lay tan yobtakilal, ma yuj tojlanelay mulej. A cayti' ok watx'nelay c'apax ixim harina ok ak'lay yin ofrendail. Axca tu xin, c'am chi ilay eltok juntzan tzet yetal tu' bay babel amak', yet watx' c'am chi occan is mayk'ak'al juntzan tzet yetal tol yet Dios yayji oc yin eb anima, ẍi jun winak tu'.

²¹Lajwi tu' max wiloni, tol max in yitok jun winak tu' bay jun babel amak', max in yionc'al ec' bay canebal is txiquin.

²²Max wilonc'al bay junjun txiquinlak amak' tu', ay junjunxa yaliẍ amak'. Lajanc'al yechel masanil. Ay 20 metro is tel yetok 15 metro is sat.

²³A yinlak juntzan amak' tu', ayaj jun muro naba ch'en, axa bay yichlak jun muro tu', a tu' ayaj bay chi oc k'ak'.

²⁴Lajwi tu xin, max yalon ayin axca ti': A ton bay juntzan cocina ti' chi txic eb chi mulnaj bay templo ti' no xajanbal chi yak' eb conob, ẍi jun winak tu' ayin.