Read Q'anjob'al Ez 5 Bible Online

Ez 5 - Q'anjob'al bible

Ez 5

¹Max yalon c'apax Jehová ayin axca ti': A tinani' ach anima, iaj junok ch'en cuchillo caw wal el ye, axca wal junok ch'en navaja chi k'anlay yet chi tzuklay xilej; cha tzukon el xil a jolom c'al xil a ti' yetok ch'en. Lajwi tu', cheon c'apax aj junok echbal, oxeb makan chi yun echen a xil tu'.

²A yet ok ayc'ay conob tu', a junok makan a xil tu', a tu' chak' tz'a bay nan yul yechel conob tu'; lajwi tu', cheonpax aj ch'en cuchillo tu' junelxa, cha coc' c'upnen junokxa makan a xil tu' bay yinlak conob, axa junxa yet is yox makan xin, cha tiẍoncantok xol cak'ek'. Tx'oxbanil jun tu', tol ayinxa ok in tok yintak eb aj conob tu' yetok junok espada.

³Chi toj a sic'ontek jayebok a xil tu', cax cha c'alon oc yin ti' a pichil.

⁴A yin juntzan ayoc yin ti' a pichil tu', a tu' cheel jayebok, chaon octok tz'a xol k'ak'ej. Caywal tu' ok yun beyc'altoj k'ak'ej yin masanil et conob.

⁵Ayin wal caw Jehová in chi wala': A jun tu' chi tx'oxon el conob Jerusalén, tol oybilxa aj yuj juntzanxa nacionlak wuj.

⁶Palta a conob Jerusalén ti', yelxac'al max ec' yiban yoc tenomtakil bay in ley, c'al bay in chekbanil, yelxac'al yob eb yintak juntzan nacionlak bay is cawilal eb, yujtol maj yikej eb in ley, tamwal max beybalnej eb in chekbanil.

⁷Yuj wal tu' xan ayin wal caw Jehová in chi wala': Ayex ti' yelxac'al tenomtak ex yintak juntzanxa nacionlak ayic' e yinlak ti', c'am wal jabok che yikej in chekbanil, toltax max ex ec' yiban leyal is beybal eb anima ayic' e cawilal tu'.

⁸Yuj wal tu' xan ayin Jehová in chi wala': Ok in oc c'apax ajc'ulal e yin ex aj Jerusalén; satak wal juntzan nación tu' ok waon oc yailal e yiban.

⁹Max ex oc ayilal bay juntzan comon dios yajbejtak, yuj tu xin ok wun tzet c'amtoc'al bay maxax wun junelok axca ti', tamwal tol okto wun junelokxa.

¹⁰A wal ok yun e xol ti', ay eb mamej ok chion aytok yuninal. Ay c'apax eb uninalej, ok chion aytok is mam c'al is txutx. Ok wawal oc yailal e yiban. Axa mactxel okto iquisbokcan ec' xin, ok in saklemnejcantok bay canpaq'uil yulyibank'inal ti'.

¹¹Ayin wal caw Jehová in chi wala'. Yujtol ayex ti' yelxac'al max e yetnejtok in templo yuj e diosal tol yajbejtak, c'al yuj juntzan e beybal tol yelxac'al yob, yuj wal tu' xan ok ex wak' wal c'ayil yin c'amxac'al yabenc'ulalil. Majxac'al cusoc in c'ul e yin.

¹²A junok yet yox makan ex ayex ti' ok ex cam bay yul e conobal ti' yuj ilya', c'al yuj wajil. Axa junokxa yet is yox makan ex xin, ok ex mak'lay cam yinlak conob, axa junokxa yet is yox makan ex xin, ok ex in saklemnejcantok bay is canpaq'uil yulyibank'inal ti'. Ayin wal caw ok in tok e yintak yetok junok espada.

¹³Caywal tu' ok yun sicbok ay yowal in c'ul, watx'xac'al ok yun in can chi wabej. A yet mayal wiel yowal in c'ul e yin tu', catatu' ok nachaj el e yuj tol ayin ton Jehová in, max wal juntzan ti' yetok yowal in c'ul.

¹⁴Ayin wal caw Jehová in chi wala', tol c'amxa mactxel ok wak'can bay Jerusalén, masanilxac'al anima ok ec' bay is cawilal, yobxac'al ok yal eb yin.

¹⁵A wal yet ok waon oc yailal yiban yetok yowal in c'ul, masanilxac'al conoblak ay cawilal ok yajonok c'al buchwaj yin conob Jerusalén tu'. Tx'oxbanil yowal in c'ul yayji, yuj tu' xan caw wal ok xiw eb yuj.

¹⁶Axca wal chi yun julwaj junok mactxel yetok is julbal yin yak'on lajwok, caytu' ok yun ex wak'on lajwok yuj wajil. Tutun wal ayin ok watek wajil e yiban, c'amxa e lobej, caywal tu' ok yun e lajwi ayok.

¹⁷Ayin wal caw Jehová in chi wala' tol ayin wal ok watek wajil, ilya', c'al camich e yiban, c'al no chiwajwom no', pilan ok yitok no' eb e yuninal. Xiwil ex ayex ti' ok ex cam c'apax bay xol owal, ẍi Jehová.