Read Q'anjob'al Ez 7 Bible Online

Ez 7 - Q'anjob'al bible

Ez 7

¹Max k'anjab Jehová ayin max yalon axca ti':

²Ach anima, ayin wal caw Jehová, Yajaw in chi wal bay nación Israel: Mayal apni oc lajubal, mayal apni oc is lajubal tx'otx' tx'otx' masanil.

³Mayal apni c'apax oc e lajubal ayex Israel ex ti'. Ok wi wal el yowal in c'ul e yin, tol ok in k'anlej wal wabej tzetbil wal yayji oc e beybal, cax ok waon oc yailal e yiban yuj e beybal yajbejtak tu'.

⁴A tinani' manxa ok ex wut tol ay in yabenc'ulal e yin. Ok waoc yailal e yiban yuj e beybal yelxac'al yob. Ok wak' e yab yail yuj masanil yobtakilal max e yunej. Caywal tu' ok yun nachaj el e yuj tol ayin ton Jehová in, ẍi Cham.

⁵Max yalon Jehová: Ayin Jehová in chi wala': Ilabi lanan jayoc jun yailal tol c'am axca;

⁶lananxa jayoc lajubal, mayal jayoc lajubal e yiban.

⁷Ti wal chi jayoc c'ual yet chex lajwi ay e masanil ex cajyom bay jun nación ti'. Mayal jayoc is c'ual, cax asanxanej xiwc'ulal ay; ti wal chi lajwi tzalojc'ulal bay jolomlak witz.

⁸A wal tinani', ti wal ok wiel yowal in c'ul e yin, masantac'al ok yal sicbi in c'ul. Ok ex in beyc'ulnej yuj tzetbil yayji oc e beybal, ok waoc yailal e yiban yuj e beybal yelxac'al yob max el e yuneni.

⁹Manxa ok ex wut yin tol ay in yabenc'ulal e yin; palta tol ok waoc yailal e yiban yuj e beybal, tol ok wak' e yab yail yuj e yobtakilal tu'. Caywal tu' ok yun nachaj el e yuj tol ayin Jehová in chi waoc yailal e yiban.

¹⁰Mayal jayoc jun c'ual tol ayxamay yayji ocok, yet chi lajwi ay jun conob ti'. Mayal aj can yaxc'ayinakil bay yul is makbej, xiwilxa maynejbail.

¹¹A eb yobtakwom yaxc'ayinakxac'al eb. A jun bulan eb tu', c'amxa junok ok cancan xol eb. C'amxa jabok is beyomal eb okto canok, tamwal okto binaj is mimanbilal eb.

¹²Mayal wal jayoc jun c'ual tu', c'amokab chi tzalojc'ul eb manjom, tamwal cusaj c'ul eb txonjom. Ok waoc yowal in c'ul yiban eb masanil.

¹³A mactxel mayal txon is tx'otx', manxa ok je' yion paxok, yak'ban iquisto ec'ok yetok jun max manon tu', yujtol manxa ok je' tenlay oc wanaj jun yailal lanan jayocok. A eb yobtakwom, c'am junok eb ok je' colon ba.

¹⁴Caxc'al chi xulay trompeta yet chi watx'nej ba eb toj yin owal, palta c'am mac ok eltok yin owal, yujtol a yowal in c'ul ayoc yiban eb masanil.

¹⁵Bay yinel conob ay owal, axa bay yul ay ilya' c'al wajil. A mactxel ayic' bay is mulnajil, ok mak'lay cam eb, axa mac ayic' bay yul conobal xin, ok cam eb yuj wajil, c'al yuj ilya'.

¹⁶A mactxel chi toj col ba bay xolak witz, a bay tu' ok el yaw eb axca no cakmu bay yulak jobe, junjunc'al eb ok k'akwok yuj is mul.

¹⁷Masanil eb, toxac'al ok pax yip k'ab eb, c'al bilaj yakan eb yuj xiwc'ulal.

¹⁸Ok yaoc eb el pichilej yuj tx'oxon el eb yailal; masanilxac'al mimanil eb ok bilajok, cax cakxac'al yili sat eb yuj q'uixwilal, tzukbilxac'al el xil jolom eb ok ec' eb.

¹⁹Toxac'al ok k'okil eb ch'en plata, c'al ch'en oro bay yulak calle, axcaxac'al chi yun k'oklay el k'alem. Yujtol c'am chi je' col-lay el eb bay yowal in c'ul ayin Jehová in ti' yuj ch'en plata, c'al ch'en oro ayic' bay eb tu'. Tokwal chito je' yak'on noj eb c'ul yetok ch'en oro, yujtol a wal yuj ch'en, xan max ayc'ay eb yin yobtakilal.

²⁰Yuj wal tol ay ch'en ch'en watx'xac'al yili bay eb, xan max aj can maynen ba eb, a ch'en tu' max watx'nej oc eb yin yechelejal tol yajbejtak. Yuj wal tu' xan a juntzan ch'en tol watx'xac'al yili yuj eb tu', ok wutcan aj yin k'alemal.

²¹Ok witek eb tx'ok conobal ul yelk'anentok is beyomal eb, ok tit eb anima tol yelxac'al yajbil elok. Ok ul yion ec' eb is diosal eb tu', cax ok yetnentok eb.

²²Ok wiel in ba bay jun nación ti', cax ok yetnejtok eb elk'om in templo ochebil wuj. Ok oc eb yul yin yetnentok.

²³Watx'nej junok cadena yuj c'al-laytok eb preso, yujtol a bay jun nación ti' xiwil eb mak'om cam anima. A jun conob ti', nojnakxac'al el yuj yobtakilal.

²⁴Ayin ok witek juntzan anima yelxac'al yob, axa eb ok ioncan nalak bay jun conob ti'. Yujtol ok wak' lajwok is maynejbail eb mimek winak; cax ok etnelaytok juntzan lugarlak bay chi oc eb ayilal.

²⁵A yet ok aj can xiwc'ulal yin eb, ok yak' eb yip sayon watx'ilal, palta majxa ilchaj yuj eb.

²⁶Ok chaxac'al ba jayoc yatakilal; txololixac'al jayoc k'anej man watx'ok yali. Nabaxac'al ok say eb junok chekbej tol chi je' yalon tzet yetal ok ujok, c'amxa eb sacerdote ok cuywajok, tamwal eb cham icham winak ok je' yak'on nabalej.

²⁷A is reyal eb ok yaoc el pichilej, yetokc'al eb ayoc yin yajawilal, caw wal ok ayc'ay cusc'ulal yiban eb. Axa masanil eb conob, toxac'al ok bilaj eb. Atac'ala' jantak yayji oc is beybal eb, axca tu' ok wut eb. Ok in beyc'ulnej el eb axca wal chi yun beyc'ulnewi eb. Axca tu' ok yun yojtaknen el eb tol ayin ton Jehová in, ẍi Cham.