Read Q'anjob'al Ez 8 Bible Online

Ez 8 - Q'anjob'al bible

Ez 8

¹A yet oyebxa c'ual waay yet is wak xajaw yet is wak abil, chotan in ay bay watut yetok eb yicham winakil conob Judá. Axa max yunaj xin, max yaon oc Jehová Cham Yajaw is k'ab wiban.

²Max wilon jun tol axca wal yili junok winak. A bay is nan chi paxay bay yalan, axca wal k'ak'ej yili, axa pax chi paxaj yiban is nan tu xin, tol chi chaw yili axca ch'en bronce ayoc xol k'ak'.

³A jun winak tu', max yatek wiban jun axca wal junok k'abej max mitx'on in xil. A tzet max yak' Dios wila', axca wal tol a yipalil max in ion aj xol cak'ek', max in yiontok bay Jerusalén, max in yaon oc bay jun puerta ay bay yul yamak'il templo, a ton jun ay bay yetc'ulal norte. A bay tu' ay jun yechelej tol chi tx'emontek yowal c'ul Jehová.

⁴A bay tu' ay wal is mayk'ak'al co Diosal ayon Israel on ti', axca wal max yun tx'oxlay wil yet ayin ec' bay jun ac'al.

⁵Lajwi tu', max yalon ayin axca ti': Ach anima chach toj t'anan bay yetc'ulal norte, ẍi Cham. Max in toj t'anan bay puerta bay norteal altar. A bay tu' max wil jun yechelej tol chi tx'emontek yowal c'ul Jehová.

⁶Lajwi tu' max yalon ayin axca ti': Ila wal tzet yetal tol yajbejtak chi yun eb yinatil Israel ti'. Yuj wal juntzan tu' xan chin el najat bay in templo ti'. Ayto wal juntzanxa yelxac'al yob ok ela', ẍi Cham.

⁷Lajwi tu' max in yion eltok bay amak'. A bay is murallail yinlak, txequel junok olan.

⁸Cax max yalon Cham ayin: Bic'onej yul jun olan bay yul muralla tu', ẍi ayin. Xan max in bic'onej yul jun olan tu', cax max ilchaj junok puerta wuj.

⁹Axa yalon ayin tu': Ocantok yul, cax ok elon wali, tzet yetal yajbejtak chi yun eb bay tu', ẍi Cham.

¹⁰Max in octok xin, max wiloni, tol a bay sat pared tu', a tu' tz'ibibil oc masanil yechel no no' tol chi jutx ba sat tx'otx' ti', yetok yechel masanil no no' tol man watx'ok, atac'ala' ley, yetok masanil pojanil tzet yetal chi yaloc eb wet Israelal is diosalok.

¹¹Ay 70 yicham winakil conob Israel, a xol eb tu' ay c'apax ec' Jaazanías is c'ajol Safán. Ayoc eb yin ayilal bay juntzan yechelej tu'. Junjunc'al ibil aj junjun txayib yet incienso yuj, a yulak juntzan tu' wacaquixac'al yaj mubal incienso tu'.

¹²Axca tu' max yalon Cham ayin: Ila wal tzet chi yun juntzan yicham winakil conob Israel ti' yin ewantakilal. Junjunxac'al ayic' bay satak batxlub is diosal. A juntzan ti' chi na eb tol c'am chi wil eb, mayal mi in bekcan jun conob ti' yalon eb, ẍi ayin.

¹³Maxto wal yalon pax ayin axca ti': Ayto wal juntzanxa yelxac'al yob ok ela', ẍi Cham.

¹⁴Axca tu xin, max in yiontok bay puertail templo Jehová, a ton jun chi cancan bay yetc'ulal norte. A bay tu' chotan ay juntzan eb xal ix; lanan yok' eb xal yuj is diosal chi yik Tamuz.*fn*

¹⁵Lajwi tu xin, max yalon ayin axca ti': ¿Mayal mi wal el juntzan ti'? Palta tol oktoc'al el juntzanxa tzet yetal yelxac'al yob, ẍi Cham.

¹⁶Lajwi tu xin max in yiontok bay yamak'il bay yul templo, a ton bay nan xol altar yetok bay chon octok bay jun cuarto tol yet Cham yayji. A bay tu' ay 25 eb winak, tol a yichin eb aycantok bay templo yet Jehová, acantok eb bay yetc'ulal yichcan, nojan ay eb sat tx'otx', lanan yoc eb ayilal bay c'u.

¹⁷Axa yalon pax Jehová ayin axca ti': ¿Mayal mi ela'? Man k'okbilok bay conob Judá ay juntzan tzet yetal tol yajbejtak chi yun ti', palta toltax mayal noj yul nación ti' yuj yaxc'ayinakil chi yun eb. Tok junel cayelnej mayal tx'em eb yowal in c'ul, max wab wal jabil yobtakil chi yun eb tu'.

¹⁸Palta ayin ti', ok wak' yowalil yetok yowal in c'ul. Manxac'al ok ok' in c'ul yin eb. Caxc'al ok awjok eb ayin, palta manxac'al ok in tak'wok bay eb, ẍi Cham.