Read Q'anjob'al Ez 9 Bible Online

Ez 9 - Q'anjob'al bible

Ez 9

¹Lajwi tu xin, max waben yoc jun aw yin ipejal: Jayokab eb tol ok aon oc yailal yin jun conob ti', junjunxac'al ibil oc yarma yin yak'on lajwok, ẍi Cham.

²Axca tu xin max wiloni tol ay wakwan winak max wil yoctok bay yul miman puerta ay bay yetc'ulal norte, junjunc'al ibil oc junjun mitx'k'ab yuj eb, yin mak'oj cam anima. A nan xol eb tu', max wil tit c'apax jun winak ayoc pichilej naba lino yuj. A yin is nan, a tu' ayoc mitx'k'abej yet tz'ib. Max wil yoctok eb ukwan winak tu xin, max oc waan eb bay cawilal altar naba bronce.

³Axca tu xin, a is mayk'ak'al Diosal Israel max aj wan bay yiban juntzan yechel querubín, bay ayc'alta' ec'ok, cax max oc waan bay puertail templo. Axa max yun xin, max awtelay jun winak ayoc pichilej lino yuj, yuj Jehová, a ton jun ibil oc mitx'k'abej yet tz'ib tu' yin is nan.

⁴Max wab yalon Cham bay axca ti': Ec'an bay masanil yul conobal Jerusalén, cax chaon oc yechel yin is nan sat masanil mac chi ok' yuj yobtakil tol yajbejtak chi yun eb conob, ẍi Cham bay.

⁵Lajwi tu' max waben yalon c'apax bay eb winak ay yarma tu': Asek yintak nak tu' cax chex ec' bay xol conob ti' masanil; yin c'am yabenc'ulalil che mak' cam

⁶masanil eb icham winak, eb ach'ej, eb k'opoj, eb xal ix c'al eb unin. Palta c'am junok eb tol ayoc yechel che mak' camok. A tu' che chail yich bay in templo ti', ẍi Cham. Axca tu' max chaon el eb yich yin mak'on cam eb icham winak ayic' bay satak templo.

⁷Lajwi tu', max waben yal-lay bay eb: Asek bay templo chi toj e yetnejtok bay tu'; ak'ek noj bay amak' yuj mimanil eb chi cam tu', ẍi. Axa wilon yeltok eb xin, max oc ijan eb mak'on cam anima bay masanil yul conob tu'.

⁸Yak'ban lanan yunen eb axca tu', asanxanej in ayin ec' satak Cham, cax max in ay nojan sat tx'otx', caw wal max cus in c'ul, xan max el waw: Mamin Jehová Wajawil, ¿tom ok ak' lajwok masanil eb aytocan bay Israel yuj yowal a c'ul yin Jerusalén ti'? quin chi.

⁹Axa tak'wi Cham ayin axca ti': A wal is mul Israel, caw wal yelxac'al miman yayji ocok, yetokc'al yet Judá. Caw wal nojnak el yul juntzan conob tu' yuj mak'oj cam anima. C'amxa tojolal chi yun eb. Chi yal eb tol mayal in bekcan jun nación ti', c'amxa chi wil tzet yetal chi yun eb, yalon eb.

¹⁰A tinani' c'amxac'al in yabenc'ulal yin eb, tol ok waoc yailal yiban eb yuj masanil tzet yetal chi el yunen eb, ẍi Cham.

¹¹Yuj tu xin max wila', tol max meltzoj jun winak ayoc lino is pichilok tu', ibil c'apax oc yin is nan mitx'k'abej yet tz'ib, axa yalon tu' axca ti': Mamin, mayal wikej chekbanilej max ak' wunej, ẍi.