Read Q'anjob'al Dn 11 Bible Online

Dn 11 - Q'anjob'al bible

Dn 11

¹Ayin max wa c'apax oc yip is nabal Darío, reyal Media yet babel abil yoc yin reyal tu'.

²Axa tinani' xin, ok wak' ojtaknej el tzet yetal t'inan ok ujok. Aytoc'al oc oxwan rey bay Persia, cax ok oc junxa yet is can rey. A jun tu' yelxac'al miman beyom yintak eb oxwan tu'. A yuj is miman beyomal tu', ok yion wal yip is soldado, cax ok yak'on owal sic'libil yin reyal Grecia.

³Lajwi tu xin ok oc jun reyal Grecia caw wal ak'om owal. Yelxac'al miman ok yun beytok is makbej, cax ok yunen masanil tzet chi yochej c'ul.

⁴Palta xin, yet mayal yi yip is yikbej, can pojan ok yun pojaxtok. Axa is yikbej jun rey tu' majxa beyc'altok yin eb is yinatil, c'al is yipalil is yikbej, manxa lajanok yetok axca yet babelal. Ilab tol mayal pojaxtok, cax tx'okxa juntzanxa ok occan yin reyal is q'uexelok.

⁵A jun reyal sur yelxac'al ok yi yip, palta a junokxa is general cham babel rey tu', yelxac'al miman ok yun is yikbej yintak jun reyal sur tu', cax ok yajawbok yin jun makbej yelxac'al miman.

⁶Axa yet mayal eq'uel jayebok abil, a eb cawan rey tu' ok watx'nej eb junok is trato. A jun reyal sur ok yatok is cutz'in bay reyal norte, yet watx' a cab nación tu' ay junc'ulal nan xol. Palta man ok je' yuj ix yion bey jun trato tu', tamwal yichamil ix, xan ok mak'lay cam ix yetokc'al yichamil, c'al yune', c'al eb is chekbej.

⁷Palta xin, a junok yican ix, ok oc reyalok, cax ok yak'on owal yetok eb soldado yet norte. Ok ayc'ay eb yuj, masantac'al ok ayc'ay is conobal reyal norte yuj.

⁸Yetok c'apaxok, ok yitok bay Egipto is diosal eb tol ch'en watx'nebil, c'al yetok oro c'al plata chi k'anabax bay juntzan diosal eb tu'. Lajwi tu xin, ok eq'uel jayebok abil yin tol man ok yak' owal yetok reyal norte.

⁹Lajwi tu xin, a jun reyal norte tu' ok yak' owal yin reyal sur, palta man ok je' yuj, axa meltzoj bay is conob tu'.

¹⁰Ok aj wan eb c'ajol reyal norte tu' yin owal cax ok yaon oc eb jun miman bulan soldado. A junok eb tu' ok tok yetok is soldado yin yak'on ayc'ay reyal sur yaloni. Ok ec'tok eb axca junok elom aej cax ok yak'on pax owal masantac'al ok apnok oc bay is conob reyal sur.

¹¹A yuj tu' yelxac'al ok tit yowal reyal sur. Ok eltek yak'on owal yin jun miman bulan soldado ajc'ul tu' cax ok yak'on lajwok masanil.

¹²Yujtol ok cam jun miman bulan eb ajc'ul tu' yuj, ok maynen ba, palta man ok mayjok is yikbej tu'.

¹³A yet ok eq'uel jayebok abil, caw wal miman soldado ok yaoc cham reyal norte yintak eb ayoc yet yalantok, cax ok yak'on owal yin reyal sur yetok xiwil is soldado tol watx'xa yayji yetok is mitx'k'ab.

¹⁴A yet tu' xiwil eb ok pak ba yin reyal sur. A xol eb tu' ay juntzan et conob Israel caw wal yob is nabal, ok pak ba eb atac'ala' tzet albilcanok, palta xin, ok ayc'ayc'alta' eb.

¹⁵Ok jayoc reyal norte, cax ok oc oyan eb soldado yinlak jun conob tol caw wal tec'an, cax ok ayc'ay yuj eb. Tamwal eb soldado caw wal watx' yet sur, man ok je' tec'ban ba eb satak eb soldado ajc'ul tu'.

¹⁶A jun ok je' yuj tu', ok yunxac'al tzet chi cha c'ul yin jun ok ayc'ay yuj tu'. C'amxa mactxel ok je' tec'ban ba satak. Ok oc bay tx'otx' yelxac'al watx', a ton Israel, cax ok yak'on c'ayil jantakc'al ok yochej c'ul.

¹⁷Caw wal ok texac'al yi yip watx'nen oc ba yiban is tx'otx' reyal sur. Axa yak'on jun trato yetok jun yet reyal tu', cax ok yaontok is cutz'in manxa watx'ilok yili bay jun rey tu', yet chi yak'on ayc'ay yaloni, palta man ok eloc axca max yun naon tu'.

¹⁸Lajwi tu' cax ok yak'on ayc'ay juntzan conoblak ay bay tilak a' mar. Xiwil eb ok ayc'ay yuj, yetok is yipalil, palta ay jun general ok tenon oc wanajok, axa yelcan q'uixwil reyal norte tu'.

¹⁹A yet tu' ok meltzoj bay is makbej bay ay juntzan is conob tec'an waayi, palta ok ayc'ayok axa c'aycan el tu'.

²⁰Tx'okxa junxa rey ok occan is q'uexelok, asan tol ok chektok jun k'anom el tojlabal yet chi aj can mimanbilal is yikbej. Jayebixto c'ual tu' ok ak'lay camok, caxc'al man satakok conob, tamwal xol owal.

²¹Lajwi tu' cax ok oc jun winak yelxac'al yob yin reyal, tol manxac'al is mojok chi oqui. Yin man naanok, ok octok yin reyal yuj yetnewomal.

²²Ok yak' lajwok masanil mactxel chi tec'baj ba satak, toltax cham sat sacerdote.

²³Cax ok ilay aytek sat eb yuj, a ton eb ok watx'nej trato yet watx'c'ulalil yetok. Caxc'al txennej anima ayoc yetok, palta ok ujc'al yuj.

²⁴A wal yet man naanok el yuj anima, cax ok octok yulak tx'otx' yelxac'al watx', cax ok yunenc'al tzetak yetal tol maj yun eb is yichmam. Ok pojon ec' xol eb ayoc yetok masanil tzet ok yi' yin owal. Ok naonc'al yak'on owal yin juntzanxa conoblak tol tec'an, palta man najatilok ok je' yuj.

²⁵Ok yaoc is yipalil yipok c'ul, cax ok yak'on owal yin reyal sur yetok jun miman bulan is soldado, palta yin c'apax ipejal ok tak'wok reyal sur tu', cax ok oc yak'on owal yetok jun miman bulan soldado caw wal ay yipalil tu', palta majxa je' tec'ban ba eb is soldado tu' yujtol ok ilay aytek sat reyal sur.

²⁶Ac'al oc eb awtebil low yuj bay meẍa, a eb tu' ok yak'lej yak'on ayc'ayok. Ok ayc'ay eb is soldado, cax xiwil eb ok camok.

²⁷A is nabal cawan eb rey tu', asan yin yak'on yobc'ulalil yin junjun. Yuj tu' xan ok ay chotan eb lowok cax ok yak'on eb lek'tial bay junjun, palta c'am junok eb cawan tu' ok yun axca chi yochej c'ul, yujtol c'amto chi apni oc is c'ual.

²⁸Axa reyal norte xin, a yet ok meltzojtek bay sur yetok masanil tzet ok yi' yin owal tu', ok oc ajc'ulal yin ayilal chi yun eb israel atac'ala' trato Dios yetok eb, cax ok yunen masanil tzet yetal tol nabil yuj. Lajwi tu' axa tojcan bay is nación.

²⁹A yet ok apnok jun c'ual tol nabil yuj xin, ok tok yetok is soldado yin owal yin sur. Palta a yet jun el ti' manxa ok je' yuj axca max yun yet babelal.

³⁰Yujtol ok jayoc eb soldado yul barco petoj bay yetc'ulal yayubc'u. A eb tu' ok tenon oc wanajok. Caytu' ok yun xiwaj reyal norte tu', axa meltzoj yintak tu'. Yuj tu', ok yion el reyal norte yowal c'ul yin is trato Dios yetok Israel. Ok cha yab is nabal eb maxax bekoncan jun trato tu'.

³¹Axa eb is soldado ok yetnejtok eb is templo Dios yetok cuartel junnej yayji yetok, cax ok tenlay oc wanaj yak'lay xajanbal yet junjun c'u, ok yaoctok eb tzet yajbil yuj Dios yul templo yuj yetnen elok.

³²Ok montej cham rey tu' eb et israelal tol maxax bekcan trato Dios. Axa pax eb conob pitz'an oc is c'ul yin is Diosal xin, ok tec'baj ba eb satak tzet ok uj tu'.

³³Xiwil eb et conob ok cuylay yuj eb aj nabal bay a conob tu', palta yin jayebnej c'ual cax ok mak'lay cam eb. Ok ak'lay tz'a eb, cax ok elk'anelaytok is tzetak yetal eb. Mosejalxa ok yuncan eb bay tx'ok conobal.

³⁴Ay janic'ok colwal ok cha' eb yet chi apni c'ual yuktelay ec' eb. Xiwil mac ok junanej ba yetok eb yin cabsatil.

³⁵Cax ok mak'lay cam jaywanok eb aj nabal max cuywaj bay xol a conob tu', yet watx' ok ak'lay porobal eb okto canok, yet watx' chi ilay el eb cabsat xol eb, c'al watx'nelay oc nabal eb, masantac'al chi apni oc lajub c'ual, axcatac'a tzet nabil yuj Dios.

³⁶A reyal norte ok yun masanil tzet chi yochej c'ul, axca ton tu' ok yun maynen ba cax ok yalon tol miman yelapnok yintak tzet chi alay oc diosal. Toltax ok yal yobal k'anej yin jun a caw Dios. Ok yunc'al masanil tzet yetal ok yochej masantac'al ok lajwok ec' yowal c'ul Dios yin is conob, yujtol a tzet nabil yuj Cham, okc'al yunej.

³⁷A jun rey ti' c'amc'al yopiso is diosal eb is yichmam yuj, tamwal ay yelapnok tzet ochebil yuj eb ix ix yul sat, tamwal junokxa tzet chi al-lay oc diosal, yujtol a jun ti' ok yal ba tol yelxac'al miman yelapnok yintak masanil juntzan tu'.

³⁸Palta xin, ok oc pax ayilal bay jun dios tol maj yiay ba eb is yichmam bay, a ton jun dios chi taynen conob tol tec'an, cax ok yak'on sabalej bay, a ton oro, plata, ch'en ch'en caw wal watx' yili, yetokc'al juntzanxa tzetak yetal tol xiwilxa canil is tojol.

³⁹A yuj is colwal jun tx'ok diosal tu', ok yak'on ayc'ay juntzan conob yelxac'al tec'an. A mac ok yaoc ba yul k'ab jun rey tu', yelxac'al mimek ikbej ok yi', cax ok ak'lay tx'otx' paktzebalok bay.

⁴⁰A yet ok apnok lajub c'ual, a reyal sur ok yak' owal yin reyal norte tu'. Cax ok eltek reyal norte tu' yin, yetok masanil yipalil, cax ok yak'on ayc'ay is nación jun rey tu', yetok carruaje yet owal, soldado ayaj yiban chej, c'al yetok xiwil barco. Ok yak' yowal yin xiwil nación bay ok ec'tok axca elom aej.

⁴¹Ok oc c'apaxtok bay yul tx'otx' yelxac'al watx'. Xiwil nación ok ayc'ay yuj. Axa pax eb cajan bay Edom c'al bay Moab xin, ok colchajcan el eb, yetok ec'banto nan eb aj Amón ok colchajok.

⁴²Ok yi' c'apax juntzanxa nación, tamwal ok colchajcan el Egipto.

⁴³Ok ilaytok masanil is beyomal Egipto axca oro, plata, yetokc'al juntzanxa tzet yetal watx'. Toltax ok can eb aj Libia c'al Etiopía yul k'ab.

⁴⁴Palta ok yab k'anej ok tit bay yichcan, c'al bay norte, cax ok oc cham yin xiwc'ulal yuj, xan ok eltek yetok yowal c'ul, naanxac'al yuj, tol ok mak' cam xiwilok anima.

⁴⁵Cax ok watx'nen aj is campamento bay nan xol a' mar yetok jun tzalan bay ay is templo Dios, a ton yet tu' ok apnok is lajubal, c'amxa junok mactxel ok je' coloni.