Read Q'anjob'al Dn 12 Bible Online

Dn 12 - Q'anjob'al bible

Dn 12

¹A yet tu' ok colwaj cham ángel Miguel, yajaw c'al taynemal a conob Israel. Ay wal mimek yailal yet tu'. C'am junelok maxax yak' axca tu' yettaxc'al max el yich tz'unchaj nacionlak. A wal yet tu', masanil eb a conob ok colchajok, chi yal elapnok, a ton mactxel tz'ibbil is bi bay yul tx'an libro.

²Xiwil eb camnakxa ok ictzoj ajok. Ay juntzan eb ok cha' k'inalej tol ayc'al yin tojbalk'inal. Ay pax juntzanxa eb xin, ok tokcan eb yin q'uixwiltakil xol yailal yin junelnej.

³A eb aj nabal, eb tol max ikban xiwil anima yin tojolal, ok jopopokc'al yili eb yin tojbalk'inal axca jopopial waycan.

⁴Palta ach ti' Daniel, makchejcan jun libro ti' cax cha c'uban cantok masantac'al yet ok apnok is lajubal. Xiwil anima ok tit lemnaj cayti' cax ok tok lemnaj bay tu', yuj yaj can yojtaknen elok, ẍi jun ángel tu' ayin.

⁵Max wilon cawanxa winak lecan ocok, junjunc'al bay junjun paq'uil ti a' miman aej Tigris.

⁶A junok eb tu' max k'anlen bay jun winak tol ayoc pichilej lino yuj, lecan oc bay yiban ti a', max yal axca ti': ¿Bak'in wal ok lajwok juntzan tzet yetal caw wal c'ayubtakxac'al yili ti'? ẍi.

⁷Axa jun winak ayoc lino pichilej yuj tu', max yion aj is k'ab cax max yak'on is ti' satak Dios tol ayc'al ec'ok, max yaloni: A yet ok lajwok nan is can abil, yet ok lajwok yetnelaytok is yipalil conob Dios, catatu' ok lajwok masanil juntzan tzet yetal ti', ẍi.

⁸Max wab wal tzet max yala', palta maj wal nachaj el wuj jabok. Xan max in k'anlej bay axca ti': Mamin, ¿tzet wal ok yun lajwok ec' masanil juntzan ti'? quin chi.

⁹Axa tak'wi ayin tu': C'amtoc'al cha na yin juntzan ti' Daniel, yujtol a masanil juntzan tzet yetal ti', toc'al ok c'uaycan ec'ok masantac'al yet lajubal.

¹⁰Yuj juntzan yailal tu' xiwil mactxel ok watx'jokcanok, c'al tojlojcanok, axa eb yobtakwom xin, ok ajc'al can eb yunen yobtakil. Manc'al ok nachaj el yuj eb tzet yetal lanan yec'tok. Axa eb anima ay is nabal xin, ok nachaj el yuj eb.

¹¹A yet ok occan waan yak'lay xajanbal yet junjun c'u, cax ok alay octok tzet yetal yajbil yuj Dios yul templo yuj yetnen elok, catatu' ok el yich 1,290 c'ual.

¹²Caw wal tzalojc'ulal yet mactxel tec'anc'al waay yin yechbanen yec'tok 1,335 c'ual.

¹³Palta ach ti' xin, tec'anc'al chot a ba masantac'al yet lajubal, catatu' ok ach xewok. Atoc'al yet lajub c'ual, cax ok ach aj wanok, axa a chaon a paktzebal tu', ẍi cham ayin, ẍi Daniel.