Read Q'anjob'al Dn 4 Bible Online

Dn 4 - Q'anjob'al bible

Dn 4

¹Max yatok cham rey Nabucodonosor jun abix bay yul masanil is makbej axca ti': Ayin rey Nabucodonosor in ti', chi wak' cawil c'ul masanil conob, c'al nación tzanc'al tzet tiejal chi yala', a ton masanil cajyom bay sat tx'otx' tx'otx' ti'.

²Chi yochej in c'ul tol che yojtaknej el e masanil tzetak yetal tol c'ayubtakxac'al yoc tzet max yun Dios wetok, Cham Axac'al Ocok.

³Yelxac'al c'ayubtak yayji oc is yunben, manxa jantakok is mayk'ak'al, Yajaw ton Cham yin tojbalk'inal, axa is yikbej ok beyc'altok yin makquiltakil anima.

⁴Ayin Nabucodonosor in ti' max in ayji ec' yin tzalojc'ulal bay in palacio cax max in ajwal can yin beyomal.

⁵Palta a yet jun ak'bal, yet lanan in wayi max oc jun in wayich. A tzet max wil tu' yetok jun nabalej tu' max in ocxac'al yin xiwc'ulalil yuj.

⁶Yuj tu' max in chekon tol chin ul il-lay yuj masanil eb tz'akan c'ul ay bay Babilonia ti', yuj yalon eb ayin tzet wal yelapnok in wayich tu'.

⁷Cax max jayoc masanil eb tz'akan c'ul, eb aj bal, c'al eb chi nachaj el yuj tzetbil yayji oc waycan, c'al eb naom el k'anej, cax max walon in wayich tu' bay eb, palta maj wal je' yuj eb yalon ayin tzet wal yelapnok.

⁸Yinxa tzunanil max jayoc Daniel, a ton chi ikon c'apax Beltzasar, axca yoc bi in diosal, tol ayoc is jelanil juntzan dios yin, cax max walon in wayich tu' bay axca ti':

⁹Ach Beltzasar, tutun tol yajawil ayji xol eb aj nabal, wojtak tol ayoc is jelanil juntzan dios en, cax ojtak masanil tzet yetal tol c'ayubtak yoqui. Chi cam aben xin, tzet yetal max wil yin in wayich, cax ok alon ayin tzet yelapnok.

¹⁰A ton wal in wayich max wil ti' yet telan in aj in wayi: A bay nan tx'otx' tx'otx' ti' max wil jun te te' caw wal miman is tel.

¹¹Max ch'ibc'al aj jun te' tu', cax yelxac'al miman max yun yin. A is chon te' max ajtac'al apnok bay satcan, cax chi je' yil-lay tac'al bay lajubal tx'otx' tx'otx'.

¹²Xiwilxa watx'il yili is xak, cax yelxac'al xiwil sat, k'okbil wal chi yab sat tu' lo' masanil anima. Axa masanil no no', chi oc no' yebaj ba bay yenel te'. Axa bay yinlak is k'ab te' chi watx'nej no tz'iquin is wayub, axa masanil tzet iquis yulyibank'inal ti', k'okbil chi yab te' is lobejok.

¹³Axa max yun xin, max wilon jun ángel yin in wayich tu', tol chi taynej yulyibank'inal ti', lanan yaytek satcan.

¹⁴Max aj yaw yin ipejal, max yalon axca ti': K'akek aj te te' tu', tzoq'uek el is k'ablak te', cax che yion el is xak, che saklemnen ec' sat te' tu' masanil. Cax saklemokab cantok masanil no no' ayoc yalan yenel te', c'al masanil no tz'iquin ayoc yinlak k'ab te'.

¹⁵Asanxanej is k'ojal yetok is xe' che yak'can bay tx'otx' tx'otx' tu', cax che c'alon ay yetok cadena tol hierro c'al bronce. Chi can jun tu' xol ac'un bay tu', axa yal ak'bal ok ay yiban jun winak tu', axa an ac'un ok lo' yetok no no' bay xolak te',

¹⁶cax ok etax el is nabal. Lajanxa ok yun is nabal axca is nabal no no'. A jun makan yailal tu', ukeb abil ok yak'a'.

¹⁷A eb ángel chi taynen yulyibank'inal ti', max naoni tol chi yun jun yailal ti', yet watx' chi yojtaknej el eb anima masanil tol a Cham Axac'al Ocok ay is yikbej yiban nacionlak. A' chi ak'on yikbej yiban bay mac chi yochej, cax chi je' yaon oc yin yajawil bay junok nación, junok mactxel yaynakil yayji xol eb anima, ẍi jun ángel tu'.

¹⁸A ton wal in wayich max wil ti'. A tinani' xin, ach Beltzasar, al ayin tzet wal yelapnok, yujtol caw wal c'am junokxa eb tz'akan c'ul bay yul in makbej ti' chi je' nachaj el yuj. Palta ach ti' ok je' nachaj el oj, yujtol ayoc is jelanil juntzan dios en, quin chi bay Daniel.

¹⁹Axa Daniel xin, a ton chi ikon c'apax Beltzasar, max occan c'aan axca mi junok hora, cax max somchaj wal aj is nabal. Axa walon bay: Beltzasar, manchak ach oc il yuj jun in wayich tu', c'al yuj tzet wal yelapnok, quin chi bay. Cax max yalon Beltzasar ayin: ¡Ay mamin rey, matawal a yiban eb ajc'ul oc en ok ayc'ay tzet chi yal elapnok jun wayichej ti'!

²⁰A jun te te' max el tu' mamin rey, tol caw miman max yunej, a is tel tol max tac'al apni oc bay satcan, cax max je' yil-laytok tac'al bay najat.

²¹A is xak tol watx' yili, xiwilxa is sat, k'okbilc'al chi yab yet chi lo' masanil tzet iquis, cax chi oc masanil no no' yebaj ba yalan yenel is k'ab te'. Max watx'nen c'apax no tz'iquin is wayub xolak is k'ablak te'.

²²A' chi yal elapnok jun te' tu', achton ach ti' mamin rey, tol max ach ajxac'al can yin a mimanbilal, masantac'al max ajapnok a binaj tac'al bay satcan. Axa ekbej max makchaj masanil tx'otx' ti' yuj.

²³Cax max elon c'apax jun ángel taynemal yulyibank'inal ti' lanan yaytek bay satcan chi yaloni: K'akek aj te' miman te' tu', cax chi lajwi ayok, asanxanej is xe' yetok is k'ojal tu' che yak'canok. Cax chi c'al-laycan ay is k'ojal yetok cadena hierro c'al bronce. Chi cancan bay xolak ac'un, cax ayc'ayokab yal ak'bal yiban jun winak ti', axa ok ayjok ec' yetok no no' yin ukeb abil.

²⁴A tzet chi yal elapnok tzet max yal Cham Axac'al Ocok eban, mamin rey,

²⁵tol ok ach uktelay el bay xol eb anima ti', cax ok ach tokcan xol no no'. Axa ac'un ok a lo' axca no wacax, cax ok ayc'ay yal ak'bal eban. Axca tu' ok yun ayji ec' yin ukeb abil, mamin rey, masantac'al ok nachaj el oj is yipalil Cham Axac'al Ocok, tol a' ay yikbej yiban is yikbej eb anima, cax a' chi aon oc yin reyal mac chi yochej is c'ul.

²⁶A jun k'anej max al-lay tol chi cancan is xe' te te' yetok is k'ojal tu', chi yal elapnok tol ok ach meltzoj yin opiso junelxa yet mayal nachaj el oj, tol a Dios Yajaw bay yulyibank'inal ti'.

²⁷Yuj tu xin mamin rey, aoc masanil juntzan k'anej chi wal ti' yin a c'ul. Yuj tu' tojolc'al chot a ba, c'amxa chaoc a mul. Matawal cha bek a yobtakil cax chach colwaj bay eb chi etaxi. Tekan axca tu' chach ayji ec' yin junc'ulal, c'al aj can yin masanil tzet yetal, ẍi Daniel ayin, ẍi cham rey Nabucodonosor.

²⁸Masanil juntzan k'anej max al-lay bay cham rey Nabucodonosor tu' max yunej.

²⁹Junxa wal abil tu', a yet jun el chi ec'jab cham rey bay pananil yiban is palacio, bay Babilonia,

³⁰max yalon axca ti': Ila wal yili miman conob Babilonia ti'. Ayin wal caw, yetok wal wipalil, max in watx'nej aj yuj wikbej, yuj tx'oxon el ba tol miman welapnok, ẍi cham.

³¹Lanantoc'al yalon cham rey juntzan k'anej tu', cax max yaben yoc jun k'anej bay satcan, max yaloni: Chi cam aben juntzan k'anej ti' ach rey Nabucodonosor, a ekbej tu' mayal ilay ec' ayach.

³²Ok ach uktelay el xol eb anima, cax ok ach tokcan xolak no no'. Ac'un ok a lo' axca no no' yin ukeb abil, masantac'al ok yal nachaj el oj tol a cham Axac'al Ocok ay is yikbej yiban masanil anima, c'al yiban masanil nacionlak bay sat tx'otx' tx'otx' ti'. A' chi aon oc yin yajawil mac chi yochej is c'ul, ẍi jun k'anej tu'.

³³A wal yet jun bek tu' max yunen tzet albilxac'alta' el yiban cham rey Nabucodonosor tu', axa yuktelaycan el xol eb anima. Ac'un max lo' axca no wacax, cax max ayc'ay yal ak'bal yiban is mimanil. Max ch'ib is xil axca tz'upal no' tx'acbaj, axa yisk'ak, axca yet no tx'acbaj tu'.

³⁴Max yalon c'apaxtok cham rey Nabucodonosor axca ti': Yet max lajwi tiempoal yailal ayoc wiban, ayin Nabucodonosor in ti', max in aj t'anan bay satcan cax max watx'ji el in nabal yin in yaxc'ayinakc'ulal. Max walon watx' k'anej yin Cham Axac'al Ocok, axa wion aj can Cham tol ayc'al ec' yin tojbalk'inal: Yujtol Yajaw ton Cham yin tojbalk'inal, axa is yikbej ok beyc'altok yin makquiltakil anima.

³⁵A wal satak Cham, c'am wal jabok tzet chi je' yuj eb cajyom bay sat tx'otx' ti', cax chi yunenc'al Cham tzet chi yochej xol eb ayic' bay satcan, c'al xol eb cajyom sat tx'otx' ti'. C'am mac chi je' mitx'on oc waan is k'ab Cham cax chi yalon bay, ¿tzet yuj xan caytu' chonej? man ẍiok.

³⁶A wal yet jun bek tu' max meltzoj in nabal max wabej, c'al wion pax wikbej tol mimanbil, c'al in mayk'ak'al. Axa eb in chekbej c'al eb mimek yikbej bay in despacho, max jayoc eb in ul sayon ec'ok. Max in oc pax yin yajawilal junelxa bay in nación, cax max yion yip wikbej. Yelxac'al miman max yun yintak axca yayji yet yalantok.

³⁷A wal tinani' xin, ayin wal caw chi wiaj can Cham Reyal satcan, yujtol a masanil tzet chi yunej, watx'c'al elok, cax tojolc'al yin masanil, cax chi je' yion ay mac chi yaloc ba tol miman yelapnok, ẍitok cham Nabucodonosor.