Read Q'anjob'al Dn 7 Bible Online

Dn 7 - Q'anjob'al bible

Dn 7

¹A yet jun ak'bal yet babel abil yoc Belsasar yin reyal bay Babilonia, ay tzet max yil Daniel yin is wayich. Axa yet max aj wan xin, cax max tz'iben is mimekal yelapnok is wayich tu'. A ton juntzan ti' max tz'ibej:

²Max wila' tol a canpaq'uil bay chi tit cak'ek', cax max xuon bay yiban a' aej, axa bilaj a' miman mar tu'.

³Axa max yunej, max txecloj aj canc'on mimek no' tol tx'ok tx'okc'al yili junjun. A bay yul a' mar max ajtek.

⁴A jun babel max ajolok, lajan axca coj, palta ay is xic' axca yet no águila. Yak'ban lanan wilon axca tu', cax max nic'lay el is xic', max ilay aj lecan bay sat tx'otx' tu'. Lajanxac'al yoc lecan axca anima. Max q'uexchaj is nabal, axca nabal anima max yunej.

⁵Axa no' yet is cab, lajan wal yili axca no oso, tz'eyan aj jun pac' is mimanil yintak jun pac'xa. A yul ti' no', ay oxeb bakil motx. Max wab yal-lay bay: Asi', cax cha chion jantak chibej chi yochej a c'ul, ẍi bay.

⁶Axa no' yet is yox, lajan wal yili axca no tz'ib coj. Ay caneb is xic' bay nan yichin, cax max wilon c'apaxok tol ay caneb is jolom, cax max ak'lay is yikbej.

⁷Axa no' yet is can max wil yin in wayich tu', caw wal yobxac'al yili. Xiwc'ulaltakxa yili ocok, cax yelxac'al xiwil is yipalil. Caw wal mimek ye, naba hierroxac'al elok. Masanil chi coc'axtok yuj, c'al turon aytok, cax chi tec'on ay jantakto chi can yuj. Yelxac'al q'uexan yili jun no' tu' yintakc'al juntzanxa no' max wil yin babelal. Ay lajoneb yuc'a'.

⁸Yak'ban t'anan in oc yin juntzan yuc'a' tu', axa max wiloni max ajol junxa yuc'a' yaliẍ bay nan xol tu', axa yet max ajol junxa yuc'a' tu xin, max ec' yikajtek oxeb yuc'a', axac'al jun tu' max can q'uexelok juntzan tu'. A jun yuc'a' tu' ay is bak' sat c'al is ti' axca yet anima, ayxamay k'anjab yin maynejbail.

⁹Max wilonc'al, cax max alay ay juntzan trono, axa Cham ayc'alta' ec' yin tojbalk'inal max ay chotan yiban junok yet. Sakxac'al yili is pichil axca yili ch'en sakbacom. Axa xil is jolom, sakxac'al yili axca sak lana. A is trono tu' yetok is ruedail, axca tol chi chaw k'ak'al.

¹⁰Ay jun k'ak'ej chi eltek satak Cham axca aej. A eb chi ak'on serbil, yinxa milal ay eb, yinxa millonal ay eb waan oc is satak Cham. Max el yich yoc beyc'ulal, axa jaklay juntzan tx'an libro.

¹¹Max in occ'al t'anan yin no no' yuj juntzan k'anej yet maynejbail lanan yalon jun yaliẍ yuc'a' tu'. Yak'ban lanan wilon xin, cax max mak'lay cam no' tu', coc'xac'al max yuntok, yin wal aymanil max k'oklaytok xol k'ak'ej cax max tz'atok.

¹²Yetok c'apax juntzanxa no no' tu', max ilay ec' is yikbej, asan xin maxtoc'al iquisbi ec' no' janic'okxa.

¹³Cax max wilonc'al yin in wayich tu' yet ak'balil. Max wila' tol ay jun mac chi tit bay xol asun, lajan wal yili axca anima.*fn* Cax max toj bay ayic' Cham ayc'alta' ec' yin tojbalk'inal, axa jitzlayxac'al oc bay is c'atan.

¹⁴Cax max ak'lay is yikbej c'al is mimanbilal yin reyal. Masanil nacionlak c'al tiejlak chi ak'on serbil. A is yipalil ayc'al yin tojbalk'inal, c'am yechel ok lajwok is yikbej.

¹⁵Max xiwcan aj in c'ul yet max wilon juntzan ti', cax max in ocxac'al il yuj.

¹⁶Max in jitzontok in ba c'atan junok waan oc bay tu', cax max in k'anlen bay tzet chi yal elapnok juntzan tu', axa chaon c'ul watx' alnen el ayin tu'. Max yalon axca ti':

¹⁷A canc'on no no' max el tu', a caneb nación bay yulyibank'inal ti', chi tx'oxo'.

¹⁸A yet ok lajwok ec' juntzan nación tu', cax ok alay oc masanil yul k'ab is conob Dios, Cham tol Axac'al Ocok, junelnej tol yet-xac'al jun conob tu' yin tojbalk'inal, ẍi.

¹⁹Maxtoc'al in k'anlej bay, tzetbil wal yayji oc no' yet is can tu', yujtol yel wal tx'ok yili no' yintak juntzanxa no' tu', yujtol xiwc'ulaltakxac'al yili no'. Naba hierroxac'al el ye, axa yisk'ak broncexac'al elok. Masanil coc'xac'al chi yuttok c'al turon aytok, cax chi tec'ontok jantakto chi cani.

²⁰Yetok c'apaxok, max in k'anlej tzetbil wal yelapnok lajoneb yuc'a', c'al yetok junxa yuc'a' tzunanxa max ajol tu', tol ay is bak' sat c'al is ti' yin yalon k'anej yet maynejbail. Cax yelxac'al miman yelapnok yintak juntzanxa is yuc'a' tu', tutun max el oxeb yuc'a' tu' satak.

²¹Max wiloni tol a jun yuc'a' tu' chi yak' owal yin eb is conob Dios, cax max ayc'ay eb yuj,

²²masantac'al max apni oc Cham Axac'al Ocok, a ton Cham ayc'alta' ec'ok, cax max watx'nen el k'anej yiban eb is conob, max ajapnok c'ual yion is conob yikbej.

²³Xan max tak'wi axca ti': A jun yet is can no' tu', a ton jun yet is can nación ok ayjok ec' bay sat tx'otx' tx'otx' ti'. Q'uexan yel yintak juntzanxa nación. Ok yiec' masanil tx'otx' tx'otx' ti', ok yajawbok yin tx'otx' yin c'am yabenc'ulal.

²⁴A juntzan lajoneb yuc'a' tu', a ton lajonwan eb rey. A eb ok yajawbok yin jun nación tu'. A yintak juntzan tu', ok aj wan junxa rey, tol yelxac'al tx'ok yel yintak juntzan yet babelal tu', ok c'ayil oxwan eb rey tu' yuj.

²⁵Cax yelxac'al yob ok yal yin Dios Cham Axac'al Ocok, cax ok yetnen is conob Cham, c'al yak'len q'uexon el leyal, c'al tiempolak albilcan yuj Dios. Axac'al yalan is yikbej, ok cancan is conob Dios, yin nan is can abil.

²⁶Axa yet c'ual beyc'ulal, cax ok ilay el is yikbej tu', ok lajwok ay yin junelnej.

²⁷Axa ikbej c'al ipejal yet eb rey bay sat tx'otx' ti', ok ak'lay bay is conob Dios Cham Axac'al Ocok. Axa is yikbej Cham ok ayjokc'al ec' yin tojbalk'inal. Masanil eb ayoc yin yajawilal yulyibank'inal ti' ok ak'on serbil Cham, c'al yiken eb bay, ẍi ayin.

²⁸A ton is lajubal juntzan tzet max al-lay ayin Daniel in ti'. Caw max somchaj in c'ul. Max pax in chiq'uil yuj bilc'ulal, palta c'amc'al junok bay max walil juntzan k'anej ti', ẍi cham Daniel.