Read Q'anjob'al Os 10 Bible Online

Os 10 - Q'anjob'al bible

Os 10

¹A conob Israel, lajan wal axca junok moc'an uva caw wal ay sat; palta yet-xac'al ocok. A yet watx' chi yun sat yawoj eb, a wal yet chi ajxac'al can is beyomal, xiwilxa altar chi watx'nej aj eb. Yelxac'al chi aj can eb watx'nen aj yili ch'en ch'en bay chi oc eb ayilal.

²A Israel ti', ca pojan yayji oc is yanimail. A tinani' xin, ok tojlanej wal el is yobtakilal tu'. A Jehová ok uchon ay masanil is yaltar eb, c'al yuchon aj ch'en ch'en ya yili yuj eb.

³Yuj tu' ok yal jun conob ti' axca ti': C'am co reyal, ilab tol c'am yelapnok Jehová yul co sat. Palta, ¿tzetto wal chi oc junok rey tu' juj? ẍi eb.

⁴Asan tol chi k'anjabc'al eb, chi yak'on eb ti' yin lek'ti trato. A jantak beyc'ulal man tojolok chi yut eb, lajan wal axca junok owal ac'un tol chi ch'ibaj bay chi oc mulnajil.

⁵A eb aj Samaria, ok bilaj eb yuj xiwc'ulal. Ok ok' eb, yuj ok ilaytok ch'en ch'en wacax ay bay Bet-avén. Yuj tu' xan chi cus c'ul eb conob, yetokc'al eb sacerdote, yujtol a watx'ilal yili tu', mayal c'ayajok.

⁶Toltax a jun yechel wacax eb tu', ok ilaytok bay Asiria, yet chi ak'lay bay cham miman rey. Caywal tu' ok yun cancan conob Efraín yin q'uixwiltakil. Toxac'al ok q'uixwok aj Israel yuj tzet max yut ba eb.

⁷Toxac'al ok c'ayaj conob Samaria yetok is reyal, axcaxac'al tojcan batxatxok junok c'ajil te' yiban aej.

⁸Ok lajwok ay templo is diosal eb tx'ok conobal, a ton bay juntzan tu' max oc conob Israel yin yobtakil. A yiban yaltar eb tu', a tu' ok ch'ibaj te' sak q'uix. Ok yalon eb anima yuj witzlak axca ti': Matawal chi je' chon mukaycan yalan juntzan witz tu', ẍi eb. Ok yalon c'apax eb yuj tzalanlak: Matawal chi je' chi tit weknaj juntzan tzalan tu' jiban, ẍi eb.

⁹Max yalon Jehová axca ti' A conob Israel ti', majc'al bek yaon oc is mul; ataxc'al yet max chaon el yich bay Gabaa tu'. Ayc'al oc eb mulji, yuj tu' xan tol ok tzakaytok juntzan yobtakwom ti' yuj owal bay Gabaa.

¹⁰A yet ok tit wal yin in c'ul, ok waoc yailal yin jun conob ti'. A yet ok waon oc yailal tu' yuj jantak is yobtakil eb, a nacionlak ok waj ba yin eb.

¹¹A yet yalantok, lajan conob Efraín axca junok no wacax mayal aytek is ti', yikemxac'al tec'wi trigo; a tel is nuk' manxa watx'ilok, majc'al waoc yugo yin. Palta a tinani', ok waoc yugo yin, yet ok oc wal yin mulnajil. A eb aj Judá, a yetok arado ok mulnajok, axa pax juntzanxa eb yinatil Jacob xin, a yetok rastrillo ok mulnaj eb.

¹²Yuj tu' xan max wal c'apax bay eb: A tojolal ok e watx'nej ayex ti', axa in camc'ulal ok e cha' paktzebalok. Watx'nejek e ba, bekek can e pitalil; mojxa che yaoc e ba yul in k'ab, masantac'al yet ok in jay waon ay colbanilej e yiban axcaxac'al nab, quin chi bay eb.

¹³Palta a eb asan yobtakil chi yunej, max cha' eb paktzil is man tojolalok tu'. Lanan chaon eb tzet yetal chi yi' eb yin is lek'tial k'anej. Yujtol max yaoc ba eb yipok is c'ul, c'al eb soldado tol xiwil bisil,

¹⁴yuj tu' ok aj uchnaj masanil eb soldado, cax ok lajwok ay is cuartel-lak; axca max yun lajwi ay conob Bet-arbel yuj cham rey Salmán, yet max oc owal, a ton yet max mak'lay coc'axtok eb xal txutxej, yetokc'al yune'.

¹⁵Yuj wal is miman yobtakilal xan caywal tu' ok yun yec'tok masanil yiban eb cajan bay Betel. Yuj tu' xan a cham reyal Israel ok cam yet wal k'inibalil, ẍi Jehová.