Read Q'anjob'al Os 14 Bible Online

Os 14 - Q'anjob'al bible

Os 14

¹Ex wet israelal, meltzojanek bay Jehová co Diosal. Caxc'al max ex ayc'ay wal yuj e mul,

²meltzojanek bay Jehová, cax chex tewi bay Cham axca ti': Ak' tanil co mul on, cax cha chaon co ayilal on, c'al co aloj watx' k'anej chi jal ayach.

³A Asiria c'am chi je' on col-lay el yuj. Tokwal chi je' c'apax co colchaj el on yuj no chej. Majxac'al jaloc co diosalok juntzan tzet yetal chi co watx'nej, yujtol asan wal en, ach Jehová, chi yi eb unin c'amxa mam, c'amxa txutx, mimanil is c'ul, quex chi.

⁴Chi yalon Jehová axca ti': Ok wak' jay is nabal eb yin is pitalil. Caxc'al man mojok, palta ok in camc'ulnej eb, yujtol manxa ok waoc yowal in c'ul yin eb.

⁵Axca wal chi yun xumaquil an chochol yuj yal ak'bal, ma axca te c'ute' bay jolomlak witz Líbano, tol najat chi toj is xe', caytu' ok wut Israel.

⁶Yuj tu' xan manxa watx'ilok yel k'uyan axca wal is k'ablakil te olivo, cax lajan wal yoc jabil axca wal yoc jabil te c'ute' bay Líbano.

⁷Ok in yaoc eb yipok c'ul junelxa. Watx'xac'al ok yun ch'ib axca ch'ib ixim trigo, watx'xac'al xumacli axca an uva, caw wal binajbil ok yun axca wal vino chi tit bay Líbano.

⁸Ex aj Efraín, tok ay yopiso juntzan comon dios tu'. Ayin ok in tak'wok ayex, c'al ex in tayneni. Axca junok te taj tol yax xak, caytu' wayji e yuj. Wuj wali xan chex aj can, ẍi Jehová.

⁹A eb jelan, c'al eb aj nabal ok nachaj el juntzan in k'anej ti' yuj eb. A is be Jehová, caw wal tojol. A eb watx' nabal, chi toj yul jun be tu'; axa eb tenomtak, chi telc'oj aj eb yul.