Read Q'anjob'al Os 2 Bible Online

Os 2 - Q'anjob'al bible

Os 2

¹Al bay eb et conob axca ti': Conob Dios jayji, ayxa is camc'ulal jin, cachi, ẍi Jehová.

²Max yalon Jehová: Caxc'al a e txutx tu' manxa wetbiok, tamwal tol yetbi into c'apaxok, palta tewanek bay tol c'amxaokab chi yut ba yin ajmulal, cax chi bekoncan mac chi yochej tu', quex chi bay.

³Ta man ok yun axca tu', ok wiel is q'uixwil, yin in t'irban elok, axca yel t'iran yet max alji. Axca wal takin tx'otx' ok yuncan wuj, cax ok cam yuj takintial.

⁴Manc'al ok ok' in c'ul e yin, yujtol yune' ex yin yajmulal.

⁵A e txutx xin, max oc ajmulal. Max etax el is watx'ilal yet max yaloni: Ok tok in say mac ay in camc'ulal yin, mac chi ak'on in lobej c'al wuc'a', mac chi ak'on in lana, c'al in lino, waceite c'al in vino, ẍi.

⁶Yuj tu' xan, ok in makchej el be yetok q'uix, ok waon oc corral yinlak, xan majxa ilchaj be bay ok ca toji.

⁷Ok tzaklojc'al yintak mac chi yochej tu', palta man ok michchaj yuj. Ok sayic'ok, palta manxa ok ilchaj yuj, cax ok yalon axca ti': Ok in meltzoj bay nak wichamil yet babelal. Watx'ta wayji yetok nak, yintak pax tinani', ẍi mi.

⁸Palta maj yojtaknej elok, tatol ayin chi wak' is trigo, is vino, c'al is yaceite; tol ayin chi wiaj can plata c'al oro chi yak' bay Baal.

⁹Yuj tu' xan ok wiaj in trigo yet wal is c'ual yaji, c'al in vino, cax ok wion c'apax ec' in lana c'al in lino chi oc is pichilok.

¹⁰A wal satak mactxel ochebil yuj tu', a wal tu' ok in tx'ox wal el is q'uixwilal. C'amxa mac ok colon el yul in k'ab.

¹¹Ok wak' lajwok ay is tzalojc'ulal, c'al is k'in yet unin xajaw, c'al yet is c'ual xewilal, yetokc'al masanil k'in chi chac'alta'a.

¹²Cax ok wak'on lajwok ay is yuva c'al is yigo, a ton yin juntzan chi yal axca ti': A ton wal in tojol max yak' mac chi camil win ti', ẍi. A juntzan tu' ok wak' tojcan xolak ac'un, axac'al no xolakilteal no' ok loon satlak awoj tu'.

¹³Ayin wal caw Jehová in chi wala', tol ok waoc yailal yin, yuj tol max yaoc colk'abej c'al uej yelbubok, cax max yalten oc incienso bay juntzan yechel Baal. Max tzaklojc'al yintak mactxel camc'ulnebil yuj tu', cax c'amxa chin nalay yuj.

¹⁴Caxc'al axca tu' max yunej, palta ok in montej, cax ok wiontok bay tz'inan tx'otx' junelxa. A bay tu' ok wal watx' k'anej bay.

¹⁵Ok wak'on pax is yuva junelxa. A jobeal Acor manxa jobealok bilc'ulal ok yunej; palta axcaxa junok beal yipc'ulalil ok wutcanok. A bay tu' ok tak'wok ayin, axca wal max yun yet k'opojto, axca yet jun c'ual yet max eltek bay Egipto.

¹⁶Ayin wal caw Jehová in chi wala', tol a yet jun c'ual tu' ok yalon aj axca ti': Wichamil ach, ẍi. Majxa yala: Wajawil,*fn* man ẍiok.

¹⁷Junelnej ok wiel yin is ti' yin yak'on binaj juntzan Baal, c'amxa oxlajon bak'in ok yak' binajok.

¹⁸A yet jun c'ual tu' ok wak' in trato yetok no xolakilteal no', no tz'iquin, c'al no labaj yet c'amxa tzet ok ach yut no'; cax ok wion el bay jun nación ti' julbalej, lanza, c'al mitx'k'abej yet owal, yet watx' ok xew in conob ti' yin c'amxa tzet ok na'.

¹⁹Ach conob Israel, axca tol ok ach wi' yin tojbalk'inal, tutun wal axca wetbi ok onej yin tojolal, c'al bay ijanilal, yujtol ok ach in yabenc'ulnej, c'al ach in camc'ulneni.

²⁰Axca tol ok ach wi', ok wunc'al tzet max wala', catawal tu' ok in ojtaknen elok tol Jehová in.

²¹Ayin wal caw Jehová in chi wala': A yet jun c'ual tu', ok wal bay satcan, axa satcan ok yak' nab yiban tx'otx';

²²axa yak'on tx'otx' tx'otx' ixim trigo, yetok vino c'al aceite. Caywal tu' ok yun in paktzen txaj in conob tz'unbil wuj.

²³Ok in tz'un in conob bay sat tx'otx' tx'otx' yet chi oc wetok. Ayxa in yabenc'ulal yin ix Lo-ruhama. C'al bay nak Lo-ami ok wal axca ti': In conob ach, quin chi. Axa ok alon ayin: In Diosal ach, ẍi, ẍi Jehová.