Read Q'anjob'al Os 4 Bible Online

Os 4 - Q'anjob'al bible

Os 4

¹Ex wet israelal, abek is k'anej Jehová. Mayal tit yowal Cham yin masanil mactxel cajan bay jun nación ti', yujtol c'amxa watx'il xol anima masanil, c'amxa mactxel watx'to is nabal, c'amxa mac chi naon Cham.

²Tol wal chi aj can eb yin q'uexon is ti' yin tzet chi yala', c'al yalon lek'tial k'anej. Chi mak'wi cam anima eb, chi elk'an eb; asanxanej ajmulal chi yun eb, c'al yetnentok ba eb, cax coc'takxac'al chi mak'wi cam anima eb.

³Yuj tu', xan a is tx'otx' jun nación ti', ok can yin tz'inanil. A eb cajan bay tu', c'amxa yip eb. Ok cam no xolakilteal no', c'al no tz'iquin, c'al masanil no txay ay yulak a' mar.

⁴Chi yalon Jehová ayin axca ti': C'amokab mactxel chi teyelej ba; c'amokab mactxel chi tenchanej ba. Yujtol a eb et conob lajan eb axca mac chi teyelej ba yetok eb sacerdote.

⁵A yuj tu', a yet c'ualil, ok ex telc'oj ayex ti'. Axa yet ak'balil ok telc'oj eb in chekbej e yetok. Ayin ok wak' lajwok ay conob Israel, tol axca e txutx yayji.

⁶Caw wal c'amxa chin nalay yuj jun in conob ti', yuj tu' xan ok wak' c'ayilok. Axa ayex ex sacerdote, yelxac'al c'amxa chin e na'. Yuj tu' xan ok ex wiel yin e yopiso ti'. Yujtol max tojxac'al c'ayc'ulal in cuybej e yuj, yuj tu' xan manxac'al ok in natek eb e yinatil.

⁷Atac'ala' max yun yaj can is bisil eb sacerdote, caywal tu' max yun yaj can is mul eb in satak. Yuj wal tu' xan a is mimanbilal eb tu', yinxa q'uixwiltakil ok wutcanok.

⁸A yuj xajanbal chi ak'lay yuj is mul in conob, xan watx' chex lowi, yuj tu' xan che yochej tol chi occ'al mul in conob ti'.

⁹Yuj tu' xan lajanc'al ok yun yaben yail eb in conob e yetok ayex sacerdote ex ti'. A yuj e beybal tu' xan ok waoc yailal e yiban yetok eb conob.

¹⁰Yujtol c'amxa chin yak' serbil eb in conob, chi low eb, palta c'amxa chi noj c'ul eb chi yabej. Chi yun eb mul, palta c'am chi aj can eb.

¹¹A yuj ajmulal, c'al yuj uq'uej an, xan sucxac'al chi yuncan el nabal eb.

¹²A in conob ti', a bay junok te te' chi k'anlej yabej. Axa te te' tu' chi ak'on is nabal yaloni. Yuj is yajmulal eb tu', xan max etaxxac'al el eb. Axca wal chi yun bekoncan junok ix ix yichamil, cax chi mulji yetok junokxa winak, caywal tu' max in yut bekoncan eb, cax chi tzakloj eb yintak comon dios.

¹³A bay jolomlak witz, c'al bay chonlak tzalan, a tu' chi yak' tz'a eb incienso c'al yak'on eb xajanbal, cax chi ayji ec' eb bay yalan yenel xak te álamo, te ji, c'al te matx'ji. Yuj tu', a is cutz'in eb, c'al eb ix yalib eb, chi oc eb yin ajmulal.

¹⁴Palta man ok waoc yailal eb ix cutz'inej, c'al eb ix alibej yuj yajmulal, yujtol ajun eb chi unen ajmulal tu', cax chi yak'on eb xajanbal yetok eb ix ix chi beybalnen ajmulal. Yuj tu' xan a jun conob c'am is nabal ti', ok etax elok.

¹⁵Caxc'al max oc is mul conob Israel, palta c'amokab chi oc is mul conob Judá. C'amokab chi toj eb oc ayilal bay Gilgal, tamwal chi ajtok eb bay Bet-avén,*fn* tamwal chi yak' eb ti' yin in bi, ayin Jehová iquis in ti'.

¹⁶A conob Israel, caw wal tol pit, lajan wal axca junok no wacax tol c'amto chi mansonelayi. Ta axca tu', ¿tom wal ok je' in taynen eb bay yax ac'un axcaxac'al junok no yune' calnel?

¹⁷A pax conob Efraín xin, max tojxac'al yintak yechelej, palta yilxac'al ba.

¹⁸Masanil eb max ayc'ayi; axcaxac'al chi yun yayc'ay eb uq'uem an. C'amxa chi bek eb yunen ajmulal. A eb is yajawil eb chi yochejxac'al chi yun q'uixwiltakil.

¹⁹Axca chi yun yilaytok k'alem yuj cak'ek', caytu' ok yun yilaytok eb. Toxac'al ok q'uixwokcan aj eb yuj is xajanbal tu'.