Read Q'anjob'al Os 5 Bible Online

Os 5 - Q'anjob'al bible

Os 5

¹Abek wal juntzan ti' ex sacerdote. Taynejek e yab ex conob Israel. Abek c'apax ayex yinatil ex eb rey: A e yiban ayex ti' ok oc jun yailal ti', yujtol ayex ti', axca wal junok yal e yayji bay Mizpa, axca junok tx'an yal e yayji c'apax bay jolom witz Tabor.

²Xiwil anima max e mak' cam yuj e tenomtakil, xan ok waoc yailal e yiban.

³Wojtak tzetbil yayji oc Efraín, tokwal man ojtakbilok Israel tu' wuj. Max oc conob Efraín tu' yin ajmulal, ac'al ton oc conob Israel max yetnejtok ba yin yajbejtakil.

⁴A wal yuj is yob beybalil conob tu', xan c'am chi je' meltzojtek eb ayin. Chi yaoc ba eb yin yak'on ayilal bay comon dios, xan c'amxa chin nalay yuj eb.

⁵A is maynejbail eb israel chi tx'oxon el is yobtakilal eb. A conob Efraín tu xin, a yin is yobtakil tu' chi telc'ojtok. Lajanxac'al ok yun yay pax c'ay Judá yetok eb.

⁶Ok in tok saylay ec' yuj eb yetok is calnel, c'al yetok is wacax chi yak' yin xajanbalil; palta manxac'al ok in ilchaj yuj eb, yujtol mayal wiel in ba xol eb.

⁷Yujtol caw wal yob max yut ba eb ayin, axca junok ix ay yune', palta tx'ok is mam yuj, caytu' yayji eb. Yuj tu' xan yin junnej xajaw ok yun c'aylay el eb yetok is tx'otx'al.

⁸Xulayokab no cacho yet owal bay Gabaa, cax xulayokab trompeta bay Ramá. Awjanek bay Bet-avén, ayokab xiwc'ulal xol eb anima yet Benjamín.

⁹Chi walil xol masanil eb is tribual Israel, tzet yetal tol yowalil ok jay yiban eb: A conob Efraín, caw wal ok lajwok ay yet jun c'ual yailal, ẍi Cham.

¹⁰Chi yalon Jehová: A eb yajaw bay Judá, lajan wal eb axca juntzan anima tol chi lacwi mojon, palta ok wak' lajwok ay eb yetok yowal in c'ul.

¹¹A conob Efraín ti', mayal low yin. C'amxa is satak, yujtol max yaxac'al oc yin c'ul tzakloj yintak eb c'am chi je' colwaji.

¹²Ayin chi wetnejtok conob Efraín axca no ij. Chi wetnej c'apaxtok conob Judá axca no k'osom.

¹³A yet ok yilon conob Efraín tol ya'ay, cax ok yilon c'apax Judá is yas, ok tokcan conob Efraín bay Asiria, ok k'anon is colwal jun rey binajbil yin yak'wi owal; palta maj je' yuj jun rey tu' yak'on watx'jok is c'ul, tamwal yanten is yas tu'.

¹⁴Axca wal chi yun makwaj junok no coj, axca tu' ok yun in makwaj yin Efraín, c'al yin conob Judá. Ayin ok in coc' tzilnejcantok eb, axa in toj tu'. Ayin ok in tzac'aj eb, tok ay mactxel ok je' colon el eb ayin.

¹⁵Axa in meltzoj yin aymanil bay cajan in masantac'al ok yojtaknej el eb is mul, cax ok jayoc eb quin ul sayon ec'ok. A wal nan xol is yailal eb tu', ok in saylay ec' yuj eb yin masanil is c'ul, ẍi Jehová.