Read Q'anjob'al Os 6 Bible Online

Os 6 - Q'anjob'al bible

Os 6

¹Ok yal eb conob axca ti': Sebaxek, meltzojokonek co masanil bay Jehová. A' max con coc'tzilnentok, cax ok con yanten paxok. Max on yak' yasjok, cax ok yanten pax co yas tu'.

²A wal yec'can cab c'ual, catatu' ok yak'on pax co cawil. Axa yet yox c'ual, ok on yictzonenajok, axa jiquisbi ec' is satak Cham junelxa tu'.

³Jak'ek jip jojtaknen el Jehová. Tutun t'inan ok jayoc Cham ayon, axca jojtaknen elok tol t'inan ok sakbok. Ok yitek Cham yaxilal axca wal chi yun yaxnab bay sat tx'otx' tx'otx' yet babel nab, c'al yet is lajub nabil k'inal, ẍi mi eb conob.

⁴Axca ti' yalon Jehová: ¿Tzet wal watx' ok wun e yetok ex aj Efraín? ¿Tzet wal watx' ok wun e yetok ex aj Judá? A e camc'ulal win tu', lajan wal axca asun yet k'inibalil, axca wal yal ak'bal yet ayto k'inibi, axa yet k'inibalil xin, cax chi c'ayajok.

⁵Yuj tu' xan max ex wak' c'ayilok axca max yun wak'on yal eb in chekbej. A yuj in k'anej max ex wak' c'ayilok. Miman txequel max yun e yailal axca wal yakan c'u.

⁶A wal tzet chi wochej tol chi ok' e c'ul yin e yet animail, c'al in e yojtaknen elok, tol e Diosal in, yintak pax e yak'on tz'a xajanbal ayin.

⁷A jun in conob ti', max ten in trato axca Adán. Yob max yut ba ayin.

⁸A eb anima bay conob Galaad, caw wal yaxc'ayinak eb, chic'xac'al chi ec'can bay tu'.

⁹A eb sacerdote, axca wal jun bulan elk'om yayji eb. Chi mak eb anima yet chi mak' camok. Bay beal Siquem chi mak'wi cam anima eb, c'al yunen eb masanil yobtakil.

¹⁰Caw wal yajbejtakxa yili eb aj Israel tu' chi wila'. A eb aj Efraín ayoc yin ajmulal; a eb aj Israel tu' max yetnejtok ba.

¹¹Ac'ala' c'apax ex aj Judá, mayal wala' tzet c'ual ok jayoc e yailal. A yet chi wochej chin q'uex tzet yetal ayoc yiban in conob Israel,