Read Q'anjob'al Os 9 Bible Online

Os 9 - Q'anjob'al bible

Os 9

¹Manchak ex tzaloj ex israel, manchak ex aj t'uknaj yuj tzalojc'ulal axca eb tx'ok conobal, yujtol max e bekcan e Diosal, axca chi yun bekoncan eb ajmul ix yichamil. Caw wal chex tzaloj e tx'oxon e camc'ulal bay Baal, yujtol watx' chi yun sat e yawoj yuj e yaloni.

²Yuj tu' xan a conob Israel, c'amxa is trigo, c'al is vino ok waja'. A is yac' vino manxa ok yabej.

³Majxac'al je' yayji ec' eb bay is conobal Jehová. Ok meltzojtok eb bay Egipto. A bay Asiria, a tu' ok lo eb loj man watx'ok atac'ala' ley.

⁴Manxa ok je' secon ay eb vino yuj yion can eb Jehová, tamwal ok cha' Cham is xajanbal eb bay tu'. A loj ok lo eb, axcaxac'al loj chi lolay yet ay camich, yuj tu' xan a mac ok loonok, man watx'ok ok yuncanok, atac'ala' ley. Ok je' yec' is wajil eb yuj, palta man ok je' yiontok eb bay templo Jehová.

⁵¿Tzet ok yun eb yet c'ual k'in, a ton juntzan k'in yet Jehová?

⁶Ok elaj eb bay jun uchlejbail ok jayok. Axa eb aj Egipto ok wajontok eb. A bay conob Menfis ok mukay eb. A bay ay is beyomal tol plata, c'al bay ay is cajlobal ok ch'ibaj q'uix ac'un.

⁷Mayal apni oc is c'ual jayoc yailal. Mayal apni oc is c'ual yet chi chaon eb tojol, axca wal is mojalil. A eb israel ok yab yail jun yailal tu'. Chi yal eb: A jun chekbej Dios tu', caw wal c'am is nabal. A jun mac ikbabil yuj Yespíritu Dios ti', mayal oc locoal, ẍi eb. Chi yal eb axca tu', yujtol xiwil yobtakil eb, caw wal miman is sawenal eb.

⁸A Dios max yaoc is chekbej yin taynemalok conob Efraín; palta a eb anima tu' chi watx'nen ay yal yulak be jun taynewom tu'. Toltax yin templo Dios chi yak' eb yobc'ulal.

⁹Max etaxxac'al el eb yin junelnej, axca max uj bay conob Gabaa.*fn* Palta a Jehová xin, ok natek is yobtakil eb tu', cax ok alay oc yailal yin eb yuj is mul tu'.

¹⁰Chi yal Jehová axca ti': A wal yet max in chalen in ba yetok Israel, caw wal max tzalojbi aj in c'ul, axca wal mactxel chi chaloj an uva yuj bay tz'inan tx'otx'. A wal eb e mam e yichmam, axca wal higo chi pet elolok, caywal tu' yayji eb yul in sat. Axa yet max apni oc eb bay Baal-peor xin, max yaoc ba eb yin ayilal bay Baal, xan caw wal yajbejtak max yut ba eb axca jun comon dios max camc'ulnej eb tu'.

¹¹A is mimanbilal conob Efraín, toc'al ok c'ayaj axca toj jennaj junok tz'iquin. C'amxac'al unin ok aljok bay, tok ayto eb ix ix ok oc yobixal, c'amxac'al unin ok il-layok.

¹²Ta ayto wal bay ok yak' ba ch'ibaj unin xin, ayinxa ok wiel bay eb. C'amxac'al junok ok wak'canok. Ok'bal c'ul juntzan anima tu' yet ok in el is c'atan eb.

¹³A yet max wil conob Efraín, axca wal junok an palma*fn* awbil bay manxa watx'ilok, caytu' yayji max wila'. Palta a tinani', ok yieltek eb yuninal yet chi mak'lay camok, ẍi Jehová.

¹⁴Mamin Jehová, ¿tzet ok in k'an ayach tol chak' bay juntzan anima ti'? Watx' mi, ta ay eb ix c'am unin chi yila'. Ta ay eb ix ay yune' xin, watx' mi, ta c'am chi yak' txutxwok yune'.

¹⁵Max yalon Jehová axca ti': A wal bay Gilgal max chail eb yich yobtakil, xan a c'apax bay tu' max el yich woc ajc'ulal yin eb. A yuj masanil yobtakilal chi yun eb, xan ok wieltok eb bay watut. Majxac'al in camc'ulnej eb, yujtol a masanil eb yajawil eb, yelxac'al tenomtak eb.

¹⁶A conob Efraín yasxa yayji. Lajan axca junok te' mayal takil is xe', c'amxa chi yak' sat. Caxc'al ay yuninal eb, palta ayinxa ok wak' cam yuninal eb camc'ulnebil yuj tu', ẍi Jehová.

¹⁷A jun conob ti', junelnej c'am chi cha yab bay in Diosal. Yuj tu' xan a Cham ok intaknen el eb, xan tol toxac'al ok ec'jabtok eb bay xolak tx'ok nacional.