Read Q'anjob'al Am 1 Bible Online

Am 1 - Q'anjob'al bible

Am 1

¹A ton juntzan k'anej ti' max yal Amós, jun ilom wacax aj conob Tecoa. Cab abil yalantok jun miman quixcab, max yaloncan el Dios juntzan k'anej ti' yin conob Israel, yet ayoc Uzías yin reyalil bay Judá, axa Jeroboam, c'ajol Joás, ayoc yin reyal bay Israel.

²Max yalon Amós: Axca bil mak'waj c'u, caytu' chi yun yoc nuk' Jehová tac'al bay jolom witz Sión bay Jerusalén. Masanil is lobal no no' chi etaxtok, cax chi takaj an ac'un bay jolom witz Carmelo.

³Axca wal ti' yalon Jehová: A wal eb cajyom bay Damasco, caw wal xiwil yobtakil max yun eb, xan yowalil ok waoc yailal eb, yujtol yelxac'al max etax eb aj Galaad yuj eb, axca wal tec'lay trigo.

⁴Yuj tu' xan ok waoc k'ak'al yatut eb reyal yinatil Hazael. A jun k'ak'ej tu' ok ak'on lajwok cuartel-lak cham Benhadad.

⁵Yowalil ok in mak' poj masanil puertalak bay conob Damasco. Cax ok wak'on c'ayil masanil eb cajyom bay jobeal Avén, c'al eb yajaw bay Bet-edén, xan ok ilaytok eb sirio yin mosejal bay Kir, ẍi Jehová.

⁶Axca wal ti' yalon Jehová Cham Yajaw: A wal eb aj Gaza, caw wal xiwil yobtakil max yun eb, xan yowalil ok waoc yailal eb, yujtol max yitok eb juntzan conob masanil, cax max txonontok eb bay Edom yin mosejal.

⁷Yuj tu xin, xan ok waoc k'ak'al is murallail Gaza tu'. A jun k'ak'ej tu' ok ak'on lajwok ay cuartel-lak eb.

⁸Ok wak' lajwok ay eb cajyom bay Asdod, yetok mac ayoc yajawil bay Ascalón. Yetok wal masanil wipalil ok in tok lemnaj yin Ecrón, cax c'amxa junok eb filisteo tol man ok camok, ẍi Jehová Cham Yajaw.

⁹Axca wal ti' yalon Jehová: A wal eb aj Tiro, caw wal xiwil yobtakil max yun eb, xan yowalil ok waoc yailal eb. Max ya wal oc eb jun conobal anima yin mosejal bay Edom, c'amxa jabok max natek is trato yin amigoal.

¹⁰Yuj tu' xan ok waoc k'ak'al murallail Tiro. A jun k'ak'ej tu' ok ak'on lajwok ay cuartel-lak eb, ẍi Cham.

¹¹Axca wal ti' yalon Jehová: A wal eb aj Edom tu', caw wal xiwil yobtakil max yun eb, xan yowalil ok waoc yailal eb. Tol max yuktej eb eb yican, a ton eb israel, yin mak'on cam eb yin c'amxac'al yabenc'ulal, cax bekanxac'al c'ul eb yunen yetok yowal c'ul. Majxa toj c'ayc'ulal yowal c'ul eb tu' yuj.

¹²Yuj tu' xan ok waoc k'ak'al conob Temán. A jun k'ak'ej tu' ok ak'on lajwok ay cuartel-lak eb aj Bozra, ẍi Jehová.

¹³Axca wal ti' yalon Jehová: A wal eb aj Amón, caw wal xiwil yobtakil max yun eb, xan yowalil ok waoc yailal eb. A yuj yion eb janic'okxa tx'otx', xan max jak eb is mimanil eb ix yobix cajan bay Galaad.

¹⁴Yuj tu' xan ok waoc is k'ak'al muralla bay Rabá. A jun k'ak'ej tu', ok ak'on lajwok ay cuartel-lak eb. Ok el aw yuj owal. A owal tu', axcaxac'al owal cak'ek' ow ok yunej.

¹⁵Axa reyal eb, ok tokcan preso bay tx'ok conobal, yetok is soldado tol mimanbil, ẍi Jehová.