Read Q'anjob'al Am 3 Bible Online

Am 3 - Q'anjob'al bible

Am 3

¹Ex conob Israel, abek wal tzet chi yal Jehová e yin, Cham max ex ion eltek bay Egipto.

²Chi yal Cham axca ti': Asannej wal ayex ti' max ex in sic'can el xol masanil juntzanxa conob ay bay masanil yulyibank'inal ti'. Yuj tu' xan ok waoc yailal e yin yuj masanil yobtakilal che yunej, ẍi Cham.

³Ta ay cawanok tol junej chi beyi, chi yal elapnok tol watx' yak'on eb chi yal tu'.

⁴Ta a no coj chi el yaw bay xolak te', ti tol mayal michchaj is chibej no' chi yal tu'. Ta a no' yune coj chi el yaw bay is wayub yulak nach'en, ti tol ay tzet mayal chaloj yuj chi yal tu'.

⁵Tatol chi ayc'ay junok no tz'iquin bay sat tx'otx', ti tol ay junok yal ayay chi yal tu'. Ta chi aj tz'itnaj jun yal ayay sat tx'otx' tu', ay tzet mayal oc yul chi yal tu'.

⁶Tatol chi xulay trompeta bay xol conob, chi xiwaj masanil anima. Ta ay tzet yetal chi ec'tok bay xol conob, ti tol a Jehová chi yak' yun axca tu'.

⁷C'am junok tzet yetal chi yun Cham yin tol c'am chi yal yin babelal bay eb is chekbej.

⁸¿Mac wal junok c'am chi bilaj yuj xiwilal, ta a no coj chi el yaw? ¿Mactxel junok man ok k'anjab elok, tatol chi yal Jehová Cham Yajaw?

⁹Alek el bay is cuartel-lak Asdod, c'al bay cuartel-lak bay Egipto: Jayanek bay jolomlak witz yinlak Samaria. Ilek wal bilc'ulal eb anima yuj jantak yobtakil chi uji, quex chi.

¹⁰A wal caw Jehová chi alon axca ti': Caw wal man yojtakok eb chi yun tojolal jabok. A wal yulak yatut eb, a tu' ay masanil tzet yetal toc'al chi yiec' eb bay anima, ẍi Cham.

¹¹Yuj tu' xan axca wal ti' yalon Jehová, Dios Cham Yajaw: Jun ajc'ul ok jayoc oyan yin is nación eb ti', cax ok yak'on lajwok ay is cuartel eb, cax ok yion eltek masanil tzet ay yul despacho eb tu', ẍi Cham.

¹²Axca ti' yalon Jehová: Axcaxac'al cabok yakan no calnel, ma jabok txam txiquin no' chi colchajcan el yuj junok ilom calnel yul is ti' junok no coj, axcaxac'al tu' ok yun eb israel cajan bay Samaria, a ton eb manxa watx'ilok wayubej bay chi wayi.

¹³Abek ayex ti', cax che yalon el bay conobal Jacob, tol ayin Jehová Dios in, Yajaw in yin masanil chi wala':

¹⁴A wal yet jun c'ual ok waoc yailal yiban Israel yuj mul chi yunej, ok wuchay masanil is yaltar eb bay Betel. A is txiquinlak juntzan altar tu' ok mak'lay ay weknaj sat tx'otx'.

¹⁵Ayin wal caw Jehová in chi wala', tol ok wak' lajwok ay nalak chi k'anlay yet tiempoal sic, c'al juntzan chi k'anlay yet tiempoal k'ak'. Ok wak' lajwok masanil juntzan na tol ayoc marfil yelbubok, cax ok wuchontok juntzan mimek nalak tu', ẍi Cham.