Read Q'anjob'al Am 4 Bible Online

Am 4 - Q'anjob'al bible

Am 4

¹Abek ayex mimek beyom ix ex ti', ayex cajan ex bay tzalan bay ay conob Samaria, tol che yetnej eb meba', c'al eb ok'bal c'ul yili, cax che yalon bay e yichamil: Iektek an an, tol chi juq'uek an, quex chi.

²A Jehová Cham Yajaw max locbajtek ba yin yak'on is ti', chi aloni: Ok apnok c'ual, ok alay oc gancho e yin, cax ok ex jutxlay beyok, axa eb e yune' ok oc locan anzuelo yin eb, cax ok jutxlaytok eb.

³Ayin wal caw Jehová in chi wala', tol txololixac'al ok yun e yilay el bay ok mak'lay poj na tu', cax ok ex ilaytok najat.

⁴Asek bay Betel, c'al bay Gilgal, cax chex aj wal can e yaon oc e mul. Iektok e xajanbal yet junjun k'inibalil yin oxox c'ual, cax che yiontok e diezmo.

⁵Ak'ek tz'a ixim pan ay yich yin ofrendail, yuj e aloj yuj diosal. Alek el xol anima yuj jantak e yofrenda chi el yin e c'ul e yak'oni, tutun axca wal tu' chi yochej e c'ul che yun xin.

⁶Yuj tu', ayin max wak' e yab yail wajil bay masanil yul e conobal ti'. Tokwal yuj tu' max ex meltzojtek ayin.

⁷Max wak' c'apax yunej, tol c'amxa nab max ay yin oxeb xajaw yet c'amto chi elol sat e yawoj. Max ayc'ay nab bay junok conob, axa bay junokxa, c'am tzet. A bay junok makan, caw wal chi ayc'ay nab, axa bay junokxa, caw wal c'am tzet, xan max takaj awoj, ẍi Jehová.

⁸A jun cab conobal ex bay c'am chi yak' nab, max ex toj sayoj aej bay junxa conob bay chi yak' nab; palta maj yab a' yet chi ec'tok e takintial. Tokwal yuj tu' max ex meltzojtek ayin.

⁹Max ex wak' wal cuenta yetok owal cak'ek', c'al yetok juntzanxa yailal, cax max wak'on etaxtok e yawoj c'al e yuva; axa no chapulín max loontok e yigo, c'al e yolivo. Tokwal yuj tu' max ex meltzojtek ayin, ẍi Jehová.

¹⁰Max watek juntzan yailal e yiban, axca wal max yun waontok yailal bay Egipto, cax max cam eb e yach'ej bay xol owal, axa eb e yajc'ul tu' max ion can e chej, cax max e yab jabil camnak ayic' bay e campamento. Tokwal yuj tu' max ex meltzojtek ayin, ẍi Jehová.

¹¹Max ex wak' lajwok ay axca wal max yun wak'on lajwok ay Sodoma c'al Gomorra, xan ayex max exto cancan ti', axcaxac'al junok cux chi ilaycan eltek xol k'ak'ej, caywal tu' e yayji. Tokwal yuj tu' max ex meltzojtek ayin, ẍi Jehová.

¹²Yuj wal tu' xan axca tu' ok ex wut ex aj Israel. Yujtol axca ton tu' ok wunej, xan watx'nejek e ba, tol ok e yil-lej oc e sat wetok ayin e Diosal in ti', ẍi Jehová.

¹³Ayin Jehová in, max in watx'nej mimek witz, c'al cak'ek', cax chi wak'on yojtaknej el eb anima tzet nabil wuj. Ayin chin q'uex oc sakk'inal yin k'ekk'inalil, chin ec'jab bay yelxac'al can ayaj yiban tx'otx' tx'otx'. A in bi, a ton Jehová Dios, Yajaw in yin Masanil, ẍi Cham.