Read Q'anjob'al Jon 3 Bible Online

Jon 3 - Q'anjob'al bible

Jon 3

¹Max k'anjab pax Jehová yet is cayelal bay Jonás. Max yalon axca ti':

²Asi' bay miman conob Nínive, cax chi toj alon el tzet yetal ok wal ayach ti', ẍi Cham.

³Yuj tu xin, max toj Jonás bay Nínive, axca wal max yun yalon Jehová bay. A jun conob tu', caw wal miman conob, ay mi oxebok c'ual tec'banil yec' yul jun conobal tu'.

⁴Axa yoc Jonás xol conob tu'. Yet babel c'ual max c'oli yalon el yin ipejal axca ti': ¡Yet wal cawinak c'u tinani', cax chi lajwi ay jun conob ti! ẍi.

⁵A masanil eb anima cajan bay jun miman conob tu', eb icham anima, c'al eb unin, max yaoc eb c'ul yin k'anej Dios, max oc eb yin c'ajbanc'ulal, cax max yaon oc eb el pichilej. Axca tu' max yun tx'oxon el eb is cusc'ulal.

⁶A yet max apni oc yabixal jun ti' bay cham reyal Nínive tu', max aj jucnajok, max yion el is pichil ayoc yuj yikbej yin reyal tu', max yaon oc el pichilej, axa xol tik'ak'il tan max ay chotanok.

⁷Xan a cham rey tu', yetok eb ayoc yin ikbej yetok, max yalil eb jun ley, chi yal axca ti': C'am junok on chon lowi. C'am c'apax junok on chi jak' lobej c'al yuc'a' co wacax, c'al co calnel.

⁸A ti' jet, co pichek co ba yetok el pichilej, yetokc'al co jobbejal no', yuj tx'oxon el ba co cusc'ulal; c'al co txajli bay Dios yetok masanil jip, cax chi co bekoncan masanil co yobtakil chi el juneni, c'al yaxc'ayinakil.

⁹Talaj chito wal q'uex Dios is nabal, cax chi oc wanaj yowal c'ul; axca tu xin, c'am chon camek, ẍi jun ley tu'.

¹⁰A yet max yilon Dios q'uexon eb aj Nínive is nabal, c'al bekoncan eb is yob beybalil, cax max naoni tol majto yak' lajwok jun conob tu', axca max yun chekon yal-lay elok.