Read Q'anjob'al Jon 4 Bible Online

Jon 4 - Q'anjob'al bible

Jon 4

¹Axa Jonás xin, caw wal yob max yabej yujtol max q'uex Jehová is nabal, xan caw wal max tit yowal.

²Yuj tu xin, max txajli bay Cham, max yalon axca ti': —Ila wal Mamin Jehová, a ton wal jun ti' max in na' yet ayinto wal ec' bay in conobal, xan max wochej max in elaj a satak, cax max in tojcan bay Tarsis. Yujtol caw wal wojtak, tol Dios ach, caw wal ay a mimanc'ulal, man c'unok tit owal. A yet chaloni tol ok aoc junok yailal, jun bek chi na pax ba a c'ul, yujtol caw wal miman a yabenc'ulal.

³Yuj tu' xan chin tewi ayach Mamin Jehová, tol cheil in k'inal, yelxac'al mi watx' tol chin cami, yintak pax tol iquis in ec'ok, ẍi Jonás.

⁴Axa max tak'wi Jehová bay axca ti': —¿Tom watx'xac'al chot a ba, yuj chi tit owal? ẍi Cham.

⁵Axa yeltok Jonás bay tiel conob bay yetc'ulal bay chi ajol c'u. A bay tu' max watx'nej aj xak te' yiban, axa yay chotan bay yenel tu', cax max yechbaneni tzet ok ec'tok bay yiban jun conob tu'.

⁶Max yak'on ch'ibaj Jehová jun moc'an te'. A jun te' tu' max ch'ibaj yenelok Jonás. Yuj tu' watx'xac'al max yun yayji ec'ok. Caw wal miman max yun tzalojbi aj c'ul yuj te'.

⁷Axa yet max k'inibi aj yet junxa c'ual, max yak'on pitzc'oj aj Jehová jun no k'osom max toj yul te', axa takaj tu'.

⁸Axa yet max aj can c'u xin, cax max yak'on tit Jehová jun cak'ek' tol ow k'ak'al bay yetc'ulal bay chi ajol c'u. Axa low yowal yakan c'u yin jolom Jonás tu', axa c'oli pax yip yuj k'ak' tu', cax chi yochejxac'al chi cami. —Yelxac'al mi watx' tol chin cami, yintak tol iquis in ec'ok, ẍi.

⁹Max tak'wi pax Dios bay axca ti': —¿Tom watx'xac'al chot a ba yuj chi tit owal, yujc'al tol max takaj te te' max ch'ibaj enelok tu'? ẍi Cham. —A toni, watx', caxc'al chin cam yuj wowal ti', ẍi Jonás.

¹⁰Max yalon Jehová axca ti': —Tokwal ach max aw te te' ti', tamwal ach max ak' ch'ibok. Yet jun k'ekbintakil max ch'ibi, axa yet junxa k'ekbintakil max takilok. Palta ach ayxac'al a cusc'ulal yuj te'.

¹¹Axa pax ayin ti', ¿tom man ok cus in c'ul yin jun miman conob Nínive ti', tol ec'ban 120 mil unin c'amto nabal; yetok c'apaxok, xiwil no no'? ẍi Jehová.