Read Q'anjob'al Nm 15 Bible Online

Nm 15 - Q'anjob'al bible

Nm 15

¹Max k'anjab Jehová bay cham Moisés, max yalon axca ti':

²Al juntzan ti' bay eb et israelal: A yet ok ex octok bay jun lugar ok wak' ayex yuj e cajay bay tu',

³ok je' e yak'on tz'a junok no wacax, ma junok no calnel, ma junok no chiwo yin xajanbalil caw wal watx' chi wabej, caxc'al yuj e yiken bay maxax e yak' e ti' e yak'oni, ma toc'al chi el yin e c'ul xin, ma yuj junok k'in.

⁴A mac chi yak' junok is xajanbal, yowalil chi yak' c'apax cabok libra harina caw wal watx', sombil yetok junok litro aceite.

⁵A yetok juntzan xajanbal mayal wal tu' che yak' junok litro vino yin ofrendail yetok junjun no calnel tu'.

⁶Tatol a junok no icham calnel chi ak'lay yin xajanbalil xin, chi ak'lay waxakeb libra harina chi somlay yetok ec'ban jun litro aceite;

⁷ec'ban c'apax jun litro vino che yak' yetok. Caw wal watx' jun ofrenda tu' chi wabej.

⁸Ta a junok no ach'ej wacax che yak' yin xajanbal tol chi tz'a'i, ma xajanbal yet che yikej bay maxax e yak' e ti', ma xajanbal yet junc'ulalil,

⁹chi ak'lay c'apax lajcawebok libra harina yetok cabok litro aceite,

¹⁰yetok c'apax cabok litro vino yin ofrendail. A jun ofrenda tu' watx' chi wabej.

¹¹A ton juntzan ti' yowalil che yak' yetok junjun no wacax tu', ma yetok junjun no icham calnel, ma yetok junjun no yunetak calnel, ma yetok junjun no yunetak chiwo che yak'a'.

¹²Atac'ala' jayc'on no' che yak' yin xajanbalil tu', caytu' c'apax bisil juntzanxa ofrenda che yak' yetok tu'.

¹³E masanil ayex israel ex ti' yowalil che yikej masanil juntzan ley ti' yet che yak'on tz'a e yofrenda tol watx' chi wabej.

¹⁴Ta ay junok tx'ok conobal, toc'al chi ec'jab e xol, ma tol junelnej cajan e yetok, ta chi yochej chi yak' tz'a junok is xajanbal tol watx' chi wabej, yowalil chi yikej masanil leyal axca che yikej ayex ti'.

¹⁵A jun ley tu' chi oc yopiso e yuj ayex ti', c'al yuj eb tx'ok conobal tu'. A jun ley tu' ok beyc'altok e xol yin tojbalk'inal.

¹⁶Junnej ley tol e yet yayji ayex ti', yetok eb tx'ok conobal, ẍi Cham.

¹⁷Max k'anjab Jehová bay cham Moisés, max yalon axca ti':

¹⁸Al bay eb et israelal masanil juntzan ti': A yet ok apnok oc eb bay jun lugar bay ok witok eb,

¹⁹axa ixim trigo chi yak' bay tx'otx' tu' ok lo eb, yowalil ok pojcan el eb janic'ok ixim yin ofrendail yet ok yak' eb ayin.

²⁰Axca chi yun yak'on eb ayin ixim babel chi tec'lay elok, cay c'apax tu', a jun babel pan chi watx'ji yin ixim harina yet ac' trigo tu' ok yak' eb yin ofrendail ayin.

²¹A jun makan ofrenda ti' ok yak'c'al eb yin tojbalk'inal.

²²Ta c'uxan chi toj c'ayc'ulal e yuj e yunen junok tzet yetal max wal bay Moisés ti' yettax babelal,

²³yuj e yikeni, c'al yiken eb e yinatil yet ok beyc'altok, yowalil ok e yikej masanil juntzan ok wal ti':

²⁴Tatol ay junok chekbanilej chi toj c'ayc'ulal e yuj e yunen e masanil, ok e yak' junok no ach'ej wacax tz'a yin xajanbalil tol watx' chi wabej, yetokc'al ixim trigo c'al vino che yak'c'alta' yin ofrendail yetok xajanbal tu', axca is leyalil. Yetok c'apax juntzan tu' che yak'on junok no mam chiwo yin xajanbalil yuj yak'lay tan mulej.

²⁵Axa junok sacerdote ok watx'nen jun tu' axcac'alta' is leyalil, yet watx' chi tancan el e mul e yiban. Ayin ton ok wak' tanil e mul tu' yujtol man yinok e c'ul max tita, xan maj e yunej, max e yak'on pax xajanbal yuj e mul.

²⁶A yuj e xajanbal tu', xan chi tancan el e mul tu' e yiban ayex israel ex ti', c'al eb tx'ok conobal ayic' e xol, yujtol e masanil max oc e mul.

²⁷Ta a junok anima chi oc is mul, yuj chi toj c'ayc'ulal yuj yiken junok chekbanilej, a yuj is mul jun mactxel tu', yowalil chi yak' junok no k'opoj chiwo jun abil is k'inal yin xajanbalil.

²⁸Axa junok sacerdote ok aon oc jun xajanbal tu' yiban altar axca is leyalil, caytu' ok yun tancan el is mul jun anima tu' yiban.

²⁹Ac'ala' jun ley tu' chi oc yopiso e yuj ayex ti', c'al yuj eb tx'ok conobal ayic' e xol, yet chi oc e mul yin tol man naanok e yuj.

³⁰Palta ta ay mactxel chi oc is mul tol yin wal c'ul chi tita, caxc'al e yet israelal, ma junok tx'ok conobal, a ayin chi oc is tenomtakil, xan a jun anima tu' yowalil chi c'aylay el e xol,

³¹yujtol max yintaknej el in k'anej naan wal yuj, max tenon in chekbanil, yuj tu' xan ac'al oc chi yitek is camichal yiban, ẍi Cham.

³²A yet ayic' eb israel bay takin tx'otx', ay junok eb tol lanan wajon si' yet c'ual xewilal.

³³A eb max ilon tu', max ilaytok nak satak cham Moisés, cham Aarón, c'al satak masanil conob yuj eb.

³⁴Max taynelay nak yuj eb, yujtol manto txequelok tzet ok utlayok.

³⁵Yuj tu xin, max yalon Jehová bay cham Moisés: A jun winak ti' yowalil chi cami; masanil eb et conob chi k'okch'ennen bay yinil campamento, ẍi Jehová.

³⁶Xan max yieltok eb nak bay yinil campamento tu'. A tu' max k'ok cam eb, axca max yun yalon Jehová bay cham Moisés.

³⁷Max k'anjab Jehová bay cham Moisés, max yalon axca ti':

³⁸Al juntzan ti' bay eb et israelal: Ayex ti' yetokc'al eb e yinatil yowalilokab chi oc yelbub txiquinlak e pichil, a juntzan tu' tx'al c'albil yuchay yetok yax tx'al.

³⁹A yet ok e yilon oc juntzan is yelbub tu', cax ok e naontek masanil chekbanilej max wala' tol che yikej, yet watx' man ok ex ikbelay yin yob beybalej yin ayilal bay yechelej yuj e nabal c'al yuj e yochwan yul e yet, axca che yunc'alta'a.

⁴⁰Cay wal tu' ok yun e naontek in chekbanil, cax ok e yikeni. Axca tu' ok yun e yaonxac'al oc e ba ayin tol wet ex.

⁴¹Ayin Jehová e Diosal in, max ex wieltek bay Egipto yet chin oc e Diosalok. Ayin ton wal Jehová e Diosal in, chi wal juntzan ti', ẍi Cham, cachi bay eb.