Read Q'anjob'al Nm 17 Bible Online

Nm 17 - Q'anjob'al bible

Nm 17

¹Lajwi tu xin max yalon Jehová bay cham Moisés axca ti':

²Al bay eb yajawil conob yet junjun tribu tol chi yitek eb junjunok is k'okoch, chi yal elapnok tol lajcaweb te' chi tit yin masanil, cax chi oc is bi junjun eb yin is k'okoch tu'.

³A te' yet is tribual Leví, is bi Aarón chi oc yin te', yujtol ok tit junjun is k'okoch eb yajawil junjun tribu.

⁴A tu' chacan octok te' bay yul mantiado bay chin chalej in ba e yetok, satak is caẍail trato, bay chin tx'ox in ba ayex.

⁵A tu' ok wak' elol wol is k'okoch mac chi yal in c'ul tol ok in sic'can elok, yuj tu' ok oc wanaj yalon eb anima ti' e k'umal, ẍi Jehová.

⁶Lajwi tu' max yalon cham Moisés bay eb yajawil conob yin junjun tribual: Junjunc'al eb max yak' eb is k'okoch bay cham, lajcaweb te' yin masanil; ayoc te' yet cham Aarón xol.

⁷Max yaon octok cham Moisés te' k'okochej tu' satak Jehová bay mantiado yet trato.

⁸Axa yet junxa k'inibalil max apni oc cham Moisés bay tu', max yilon oc cham te' k'okoch Aarón yet is tribual Leví, mayal elol is wol te', ayxa is xumaquil c'al ayxa is sat, k'inxa te almendra tu'.

⁹Max lajwi tu xin cax max yion eltek cham Moisés te' k'okoch tu' bay satak Jehová, cax max tx'oxon cham te' bay masanil eb yet israelal. Axa yet max lajwi yilon eb te', cax max yak'on cham te' yet junjun eb bay.

¹⁰Lajwi tu' max yalon Jehová bay cham Moisés axca ti': Acan octok te' k'okoch Aarón bay satak caẍail trato, c'ubajcantok te' bay tu' yet is nabaniltek juntzan anima tenomtak ti'; yuj tu' ok bek eb yalon yobal k'anej win, yet c'am chi cam eb, ẍi Jehová.

¹¹Max yikej cham Moisés yunen masanil tzet max yal Jehová.

¹²Max yalon eb israel tu' bay cham axca ti': Ta axca tu', ayoc camich jiban on co masanil.

¹³Tatol jichan chi cam masanil eb chi jitztek ba bay is cajlobal Jehová, ok on cam co masanil chi yal tu', ẍi eb.