Read Q'anjob'al Nm 24 Bible Online

Nm 24 - Q'anjob'al bible

Nm 24

¹Axa yet max nachaj el yuj cham Balaam tol chi cha c'ul Jehová yet chi yalon cham watx' k'anej yiban eb israel, majxa toj cham k'anlej yabej axca ta' max yun yet babelal, asan tol max toj t'anan bay tz'inan tx'otx'.

²Axa yet max yilontok cham Balaam conob Israel, yinxac'al junjun tribual yayji is campamento eb, cax max oc Yespíritu Dios yin cham,

³xan max oc ijan yalon axca ti': A ton in k'anej ayin Balaam in ti', c'ajol in Beor, tol ay is may wilwani.

⁴Chi wab tzet chi yal Dios, chi wil c'apax yin wayichejal yuj Cham tol chic'al je' yuj. Chin ay nojanok, palta jakan in sat, yelxac'al watx' wiloni.

⁵Ex yinatil Jacob caw wal watx'xac'al yili e mantiado. Caw wal watx'xac'al jilontok e campamento, ex israel.

⁶Axcaxac'al txololial jilon an palma, caywal tu' e yilitok. Axca wal toj txololok junok awoj bay is ti' junok a' aej, axca wal tu' yayji ayok, axca te áloe awbil yuj Jehová ma axca wal yayji te c'ute' bay is ti a'.

⁷A bay ayic' eb israel tu', caw wal xiwil aej, watx'c'al chi yuc'a' eb, c'al yaon oc eb yal is yawoj. A is reyal eb caw wal ay is may yintak cham rey Agag. Caw wal miman yayji oc makbej is reyal eb.

⁸A Jehová Dios max ion eltek eb bay Egipto, yuj tu' xan a Cham ayoc yipok c'ul eb, axca wal no búfalo, a yuc'a' ayoc yipok is c'ul. A eb conob Israel chi c'ayil eb ajc'ul oc yin, chi mak' c'aj eb is bakil eb, cax chi eq'uel is julbal eb yulak is mimanil eb ajc'ul tu'.

⁹Lajan wal eb axca junok no coj telan ay wayi, c'am junok mactxel chi tec'baj ba tx'emoni. Al-layokab watx' k'anej yin mac chi alon watx' k'anej e yin, ayex israel ex ti', cax catabnelayokab mac chi alon yobal k'anej e yin, ẍi cham Balaam.

¹⁰A yet max yaben cham Balac juntzan k'anej tu', caw wal max tit yowal c'ul, max tx'oxon wal is k'ab yuj yowal, max yalon axca ti': —A yuj a catabnen eb ajc'ul oc win ti', xan max ach wawtej, axa tinani' oxelxa chalcan el watx' k'anej yiban eb.

¹¹Yelxac'al mi watx' chach meltzoj bay atut. Toxa max wala' tol miman tzet ok wak' ayach c'al tol caw wal miman elapnok, palta c'am chi je' c'ul Jehová caytu' chi yunej, ẍi cham Balac.

¹²Max tak'wi cham Balaam axca ti': —Jichan max yun walon bay eb a chekbej:

¹³Caxc'al tol nojnak a despacho yuj ch'en oro ma ch'en plata cax chak'on ch'en ayin, palta c'am chi je' in tenon bay chi yal Jehová, c'am chi je' wak'on watx'c'ulal tamwal wak'on yobc'ulal axca bay chi tit yin in c'ul wuneni, yujtol a tzet chi chek Jehová wala', a ton yowalil chi wala'.

¹⁴Watx' tol ok in meltzoj bay in conob; asan xin yet c'amto chin toji, ok walcan ayach tzet ok utlay a conob ti' yuj jun conobal anima tu' yet bak'in, ẍi cham.

¹⁵Max lajwi tu xin, cax max oc ijan cham yaloncan el axca ti': A ton in k'anej ayin Balaam in ti' c'ajol in Beor, ay is may wilwani.

¹⁶Chi wab tzet chi yal Dios, cax wojtak tzetbil yayji is nabal Cham Axac'al Ocok, cax chi wilon c'apax yin ilwalil, chi ak'lay wojtaknej yuj Cham tol chic'al je' yuj masanil. Chin ay nojanok palta jakan in sat, yelxac'al watx' wiloni.

¹⁷Ay junok mac tol najattoc'al ay chi je' wilontok, junok mac tol najatto chi tita. Ay jun axca waycan ok txecloj xol is conobal cham Jacob. Ay jun cham rey ok ak'on Yajawil eb yuninal israel; ok c'aylay el eb conob Moab yuj, a c'apax ok c'ayon el eb yinatil Set.

¹⁸Cax ok ayc'ay conob Edom yuj, ok occan tx'otx' Seir tu' yetok; palta a conob Israel ok yi yip.

¹⁹A xol eb yinatil Jacob ok eltek jun mac ok oc yin Yajawil. A' ok c'ayoncan el jantakto mac ok can yul jun conob tu', ẍi cham.

²⁰Max lajwi tu' cax max toj t'anan cham Balaam yin conob Amalec, cax max yaloncan el cham axca ti': A conob Amalec ay is may yayji ocok, palta ok c'ayil yin junelnej, ẍi cham.

²¹Cax max toj t'anan yin conob eb quenita cax max yalon axca ti': Caxc'al caw ay is may yayji e conob yin colon ba, caxc'al chonlak ch'en che yajtok e yatut,

²²palta ok c'aycan el e conob ex quenita, a jantak exto chex cancan xin, ok ex yicantok eb nak asirio is chekbejok, ẍi cham.

²³Lajwi tu' cax max yalon cham: ¿Ay tom mac ok iquisbok canok yet ok yunen Dios juntzan ti'?

²⁴Ay barco ok tit bay Chipre, ok jay bay ti a' mar, a' chi jay ul yetnen el conob Asiria c'al conob Heber, palta ok c'ay c'apaxcan el eb, ẍi cham Balaam.

²⁵Max lajwi yalon cham juntzan ti xin, cax max meltzoj cham bay is conob, axa meltzojcantok cham Balac bay yatut.